首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 主日學的使命
主日學的使命
卷期：第631號 本次： 日期：1937/10 刊名：台灣教會公報 頁數：1-3
篇名：主日學的使命 [ Chú-ji̍t-o̍h ê Sù-bēng ]
作者：
  顯示 : 漢羅 全羅 並列  

主日學的使命

1937年10月631期      1-3

 

今年10月17日的聖日，就是世界主日學的紀念日。現在佇南部有96間的主日學，8252名的學生，1085名的先生。請列位教會的當局者佮教師(主日學的先生)，閣一擺斟酌來檢討，到底主日學的使命是甚物？近來各中會的教育部真致意咧研究白話字的教授法，也有編輯教科書。這卻是好。總是無論怎樣備辦，都無有完全--的。又閣若傷極端鼓吹，驚了有時會失落主日學真的目的。教授白話字是小可問題nā-tiāⁿ。不過是一个橋而已；因為是愛in趕緊會讀聖經。佇現在的時局，著細膩考慮。

主日學的教育，毋是干焦宗教教育nā-tiāⁿ。宗教教育，不過是咧涵養宗教tek情操。總是咱主日學的教育，是純粹福音主義的教育。換話來講，就是徹底tek的聖冊主義的信仰教育。主日學的教育，毋是欲陶冶宗教tek情操；是欲培養活信仰的教育。若毋是倚靠聖神的能力，就袂通得著這款對主耶穌有正真正銘的信仰佇咧。

這霎愛將鄙人所觀察，咱現時主日學的缺點幾若項，記佇遮做參考：─

  (1)教師的方面：真正獻身的教師猶真少；較濟是用鼓舞--的，抑是出對序大的命令。又閣in的頭腦所印象--的，濟濟掠教白話字是主日學第一要緊的工；講道理的時間凊彩放予伊過去。拍算講予囡仔聽是真快，本身也無致意備辦。檢采備辦學課是有，毋過備辦祈禱，就無。本身無愛祈禱，也無咧赴教師的祈禱會，欲thài有力，通教示細囝。本身無疼上帝，欲怎樣教學生會通疼上帝！矛盾真濟！向望對這時起，家己反省，閣這擺將你本身獻予主用。你所做的工，是有價值的工，求一个囡仔，是你將來佇天國一頂的冕旒。

  (2)父兄的方面：主日學是教會的義務教育；應該著逐禮拜送恁的囝兒來教會。閣一面佇恁的家庭，著佮主日學同步調。要緊著顯出好的模範，佇恁的家庭。因為囡仔蹛佇家庭的生活，比佇教會生活是較長的時間。批評主日學--的是真濟；果然同心為著主來疼主日學--的猶真少。

  (3)教會的方面：教會的當事者(長老，執事)，濟濟猶無理解主日學；致到嫌主日學的開費重，薄遇主日學的教師。教會毋但著監督主日學，著gâu扶持主日學。主日學是教會第一的職能；因為主日學就是教育tek傳道(教育的傳道)。換話來講，主日學就是教會的本體。今仔日的主日學，就是明仔日的教會。所以此去著盡力注重佇主日學的工作。

  (4)主日學本身的方面：現代的教會，是無冷無熱；主日學也是按呢。若毋趕緊閣大整理，驚了僫得救治。欲怎樣整理？照鄙人咧看，才久，無論佗一中會的教育部，對主日學的指導的根本方針有錯誤佇咧。啥事？因為看主日學教育佮一般宗教教育是相同。

著會記得，主日學教育，若毋是純然福音主義教育；就無彩咱咧經營主日學。逐个主日學教師，著徛佇一款的確信，來活動。做主日學教師，逐个著把握聖冊中基督教信仰的絕對性，紲10分認識主日學教育的獨異性；若無，就驚了你所著磨--的，歸佇空空。所著整理的要點愛講幾項：─

  1)著12分明瞭佮堅持主日學的目的。各教會的主日學，若袂通chhoā囡仔到佇耶穌，就你所做的工，無各樣下一塊石窒礙in的前途。欲chhoā囡仔到佇耶穌，有兩步：─

    (1)教養囡仔(教養兒童)。參看箴言22：6 ，4：25─27。

    (2)扶助囡仔(扶助兒童)。參看太19：13─14，25：34，耶利米13：20。

    (2)教職員著有真正的奉獻：─

       a)校長，著做忠實的指導者。

       b)教師，著做熱心的教育者。

       c)職員，著做同心的活動者。

  3)對經營佮管理上特別注意6項：─

      a)教職員配置。

      b)囡仔的禮拜。

      c)執行的順序。

      d)訪問。

      e)特別日。

      f)補充機關。

   4)幼稚科是主日學中，最第一要緊--的。Siāng時也

著組織家庭科(用老母做中心)。

  農學的原則：無有好的秧，就無有好的收成。所以對抱細囝的老母，著鼓舞in入家庭科。

   5)專任的主日學主事，著緊實現。

今仔日濟濟主日學的當局者抑是教師，無10分明白一般教育學佮主日學教育的各樣佇佗落；致到用一般教育學的目的論，用方法論來拍亂主日學教師修養會兼講習會。講師咧教主日學白話字教授法，囡仔心理教授法；也有教育部咧編輯教材；對按呢濟濟主日學教師，咧躊躇，taⁿ毋知這个有合佇囡仔心理無？有照教育學的指示無？這款予主日學教師陷落佇偏路(邪道)的例--的袂少。所以若毋是有專門研究的先生來指導，此去對主日學的一切，有危險佇咧。因為做教師--的，一時感染著現代教育學，心理學；毋過家己對聖冊......無有確信佇咧，就致到in本身的態度抑是教授，袂通予囡仔滿足，紲失落in的威信。

  上要緊--的，無論咧教聖冊抑其他......若予囡仔有10分的消化，就佇遐囡仔自然有利益佮興味；按呢就自然心理學教授法會生出來。

    出在你想出甚物進步tek的心理學，文化學說的教授法；若無有聖神的啟導，咱的主日學教育是空空。

   6)各中會的教育部著有協力一致。

   7)青年的聖經科，著用國語來教。

  結論。列位！因為紙面有限的關係，袂通詳細說明；總是大向望疼主的同勞者，毋通失落主日學的本質。

也希望毋通過頭佇研究白話字教授法；紲忽略佇主日學中心使命(禮拜；聖冊)。最後一句，願主賜福佇眾主日學的同著磨的兄姊，對這時起加倍堅心壯志獻予主用。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461