首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 六十六卷的聖冊
六十六卷的聖冊
卷期：第631號 本次： 日期：1937/10 刊名：台灣教會公報 頁數：10-13
篇名：六十六卷的聖冊 [ La̍k-cha̍p-la̍k koàn ê Sèng-chheh ]
作者：許水露 Khó͘ Chuí-lō͘
  顯示 : 漢羅 全羅 並列  

六十六卷的聖冊

許水露

(接9月第9面)

1937年10月631期      10-13

 

  第10講：撒母耳上卷

  撒母耳上卷；就是六十六卷的聖冊的第9卷。當士師時代的末年，通講以色列是最黑暗的時代。因為若看下面所記彼幾項，就會徹底te̍k知：─

  1)天災地變(路得1：1)。

  2)政治混亂(士師17：6，18：1，19：1，21：25)。

  3)宗教退化(士師17：1-13，18：14-31)。

  4)社會腐敗(士師19：1-13)。

在這款最第一烏暗時代的了後，上帝閣再看顧伊的百姓，施落伊的仁愛，竉倖一位盡忠偉大的差用撒母耳。(伊是最後的士師，也是最代先的先知)，來擔任政治佮宗教兩个要職，做過渡時代的大人物。對士師的政治變做國王的政治，對祭司的掌教變做先知的掌教。本事通看出兩个無siâng的王。一个是上帝親身揀召的(Tāi-pi̍t =代表聖靈)；閣一个是民選，是上帝所無歡喜的(掃羅=代表邪神)。所以咱著愛切切自省，看咱自己屬佇tá-lo̍h一个神。

  I. 本書的書名。

本書怎樣會叫做撒母耳記。因為本身是記載B. C. 1710-1056 ，共115年久的事，從中詳細記載撒母耳的事蹟，所以叫做撒母耳記。以外也有詳細記載掃羅王佮Tāi-pi̍t王的事蹟。In彼兩个王，攏是撒母耳所設立--的。

  II. 本書的著者。

本書1：─24：的著者就是撒母耳。25：─31：是先知拿單佮迦得寫--的(1代29：29)。撒母耳的略歷：伊的阿公名叫耶羅罕，阿爸=以利加拿，阿母=哈拿。本鄉= 以法蓮山地的拉瑪瑣非城。伊的老母哈拿熱心祈禱上帝，上帝有聽伊的祈禱；有拭伊的目屎，才賞賜撒母耳予伊。「撒母耳」解說是「上帝聽記」(神聽)。

  1) 幼年時代的撒母耳。伊出世了，老母哈拿，日夜熱誠祈禱上帝照顧，老母常教伊祈禱。到3歲斷奶了，老母照約束將撒母耳獻予上帝，佇會幕交代祭司以利照顧。伊佇以利兜，服侍以利，離開骨肉的至親，虔誠服侍上帝：3擺得著上帝的指示，拯召(2：18，26；3：1─18)。

  2)主理奮興會的撒母耳(7：2─6)。約櫃佇基列耶琳20年。撒母耳佇逐所在巡迴佈道，也有設先知學(神學校)，養成傳教家，預備日後的奮興會。百姓漸漸感覺離開上帝心艱苦，就決心除偶像，全心服侍上帝。佇米斯巴開大奮興會，百姓禁食，認罪，懺悔；撒母耳替百姓祈禱，認罪。

  3)做先知的撒母耳(8：4-22)。撒母耳佇上帝的面前，向上帝祈禱，將人的事對上帝講明。佇人的面前代表上帝，將上帝的事對in講。伊一生為國，為民，任勞，任怨，到年老百姓當面拒絕--伊。伊當然痛心，若是伊猶過phoe命為著百姓懇切祈禱，盡力犧牲佇國家。百姓拒絕伊，叫伊替in設立王，伊也無怨妒，歡喜替in設法。這款豪傑的品性，高尚的人格，實在真通欣羨。

  4) 生榮死哀的撒母耳(25：1)。聖經講，撒母耳死了眾百姓聚集為著伊大啼哭；通講「伊活是為著上帝，死是利益」(腓立比1：21)。伊煞伊的艱苦猶存在。伊的人格的感動力佮事業的影響，到這霎猶留佇世界。

  III.本書著作的年代。

  1) 1：─24：大約佇B. C. 1096-1075寫--的。

  2) 25：─31：大約佇B. C. 1000-985寫--的。

  IV.本書的鍵語。

本書的鍵語：─

  1. 「懇切的祈禱」。

  2. 「耶和華有聽人的祈禱」。

本書通講是說明祈禱的論文集。通講佇人生一切的經驗中的祈禱佮能力：─

  1)哈拿懇切祈禱，得著撒母耳(1：10─28)。

  2)對撒母耳懇切祈禱，以色列百姓得著得勝(7：5─10)。

  3)撒母耳懇切祈禱，上帝煞受氣(8：5─6)。

  4)祈禱的人得著上帝的祕密(9：19─23)。

  5)無祈禱是罪(12：19─23)。

  V. 本書的使命。

  1. 表示多妻主義所生出的煩惱(1：6)。

  2. 無盡忠教囝所生出的災禍(2：22─25)。

  3. 表示只靠儀式佮固執的危險(4：3─12)。

  VI.本書的特色。

  1. 「萬軍的耶和華」，這句話佇本書起頭用(1：3)。

  2. 設立「先知學」(神學校)(10：5，19：20)。

  3. 教示「聖靈的恩賜」(10：6，9 ；11：6，16：13，18；16：14)。

  4. 起初譬喻「君王做牧者」(2撒8：2)。

  VII.本書的分段。

  第1段：撒母耳的治世(1：─7：─)。

  [哈拿迫切祈禱愛得著囝，上帝就賞賜撒母耳予--伊]。

  I.撒母耳的出世(1：─2：11)。

  1)尊重主的，主的確尊重i(1：)。

 哈拿是以法蓮人，丈夫以利加拿有娶兩个某。一个是「哈拿」，解說是「恩惠」，閣一个是「毗尼拿，解說是「珍珠」。按呢這个(哈拿)是上帝的恩惠；閣這个(毗尼拿)是丈夫的寶貝。猶太人看婦人人無身孕做第一見笑；親像東洋民族一樣。毗尼拿生兩个，哈拿無生半个；真見笑迫切祈禱上帝。佇伊的祈禱中有7个大特色：─

  (1)痛苦的祈禱(1：10)。

  (2)下願的祈禱(1：11)。

  (3)無煞的祈禱(1：12)。

  (4)靜默的祈禱(1：13)。

  (5)拚心透露的祈禱(1：15)。

  (6)無失志的祈禱(1：16)。

  (7)信心的祈禱(1：18)。

伊有7大特色的祈禱，所以上帝有賞賜伊一个囝，名叫「撒母耳」。解說「上帝聽見(神聽)，祈禱得著(求得)」。看撒母耳一生也是真重祈禱；又閣為王通夜祈禱，一生將祈禱做生活，佇聖內設祭壇(祈禱室)。有熱心祈禱的老母，才有熱心祈禱的囝。撒母耳斷奶後，老母哈拿就chhoā伊到聖殿獻予上帝，完全奉獻。老母來的時，手牽珍重的獨生囝，倒去的時孤單，空。伊甘願做模範的老母，有這款的賢母，才有這款拯救以色列的撒母耳。天下偉大的人物，攏是在佇賢母手中來成--的。哈拿講，「尊敬主--的，主的確尊重--i」。

2)藐視主--的，主的確藐視--i(2：)

(1) 1─10，是哈拿 û-giân-tek的祈禱。

   a)哈拿掠得著上帝做bû-siōng的快樂。

  b)哈拿掠上帝做至聖，至公，眾-得，智慧的

上帝。

 哈拿尊重上帝，所以上帝特別看顧伊，閣賞賜伊3男2女(2：21)。

  (2) 11─17。以利無致意教囝，囝藐視上帝，上帝就藐視伊。以利做祭司，做全國最高的領袖，siāng時伊兩个囝也咧幫贊--伊。可惜以利失落家庭教育，所以囝不孝，好啉酒，食肉，褻瀆，藐視上帝；所以上帝藐視伊。

  2. 撒母耳的受召(2：18─3：)

  1) 18─21。幼年撒母耳順從，老母得著祝福。

  2) 22─36。讖語以利家欲拄著災禍。

  3) 3：1─18。撒母耳3擺得著上帝的啟示佮拯召。

  4) 19─21。撒母耳做先知。

  3. 撒母耳的服務(4：─7：)

  1)藐視主--的，主的確藐視--伊。

人若果然藐視主，雖然有約櫃相佮佇咧，也無路用。以色列百姓佮腓利士人相刣，受刣死4000人，然後才扛約櫃做護身符(以法櫃為護身符)；結局無路用，上帝的神離開伊。後來以色列百姓30000人陣亡。以利兩个囝也陣亡，約櫃受搶去。彼時以利98歲聽著這个消息，就對座位向對後面，跋倒佇門邊，頷頸折，就死。以利的新婦聽著這个消息，臨產紲死；共伊囝號名「以迦博」，解說是「榮光離開以色列」。

  2)藐視主--的，主的確責罰伊(5：─6：)。

  腓利士人將上帝的約櫃，下佇大袞的廟裡，大袞跋倒佇上帝的面前，瘸跤折手。通知邪不鬥正。後來腓利士人遍身生毒瘡，趕緊將約櫃送交迦得，上帝閣攻擊in。閣送交以革倫，上帝也攻擊in，濟濟人驚到死。原來約櫃佇以色列百姓是祝福百姓，外邦人得袂著；約櫃佇遐，彼所在拄著大災殃。親像保羅講，「耶穌基督的芳氣，佇活人的中間發出芳氣，予in活，若是佇死的人的中間，就變做死的氣，予in死」。腓利士人拄著種種的災殃，著驚緊將約櫃送還原位，紲帶賠償的禮物來獻：五个金瘡像(金痔瘡)，5个金老鼠(金老鼠)。後來約櫃下佇基列耶琳，直到Tāi-pi̍t做王的時才閣用。

  3)敬畏主--的，主的確敬畏伊(7：)。

撒母耳百姓祈禱：─

  (1)除滅偶像；(2)用寶血洗清；(3)禁食認罪；(4)完全順服。

祈禱的時，主顯出大權能。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461