樂生院
吳清鎰
1937年10月631期 30
列位兄姊！樂山園的消息，咱佇本報常常捌讀著。總是樂生院咱較毋熟似。樂生院就是官設的癩病院。遮所收容的患者男女總數，現時四百四十名。對5，6年前khai-設以來，陳溪圳牧師有常常去遐傳道理，總是對今年4月以來，有黃六點傳道師專務佇遐做主的工，來聽的人有時七八十，總是相接紲來聽的人亦有三四十人。佇9月5日，雙連的小會聚集佇樂生院，有13个癩患者來問道理，逐个道理不止明，閣in佇院內的生活亦不止好模樣，實在會堪得做主的學生，所以有攏總共in接納，行洗禮，紲守聖餐。患者的中間，有的對以前已經信道理，閣醫生職員，看護婦亦有的是信者。彼日陪餐者總共29名(4名是人客)。按呢算是相當的數額，向望遮的會做酵母，漸漸曠闊上帝的國佇彼中間。In對佇現時，檢采通講是絕望，總是引chhoā in來信主得救；佇一陣得著安慰，閣佇別日通得著報賞，是咱大家所有份的責成。
願咱大家大大關心佇這號特殊的傳道。願上帝大大施恩賞賜福氣滿滿佇in中間。 |
