Pêng-hô
Gô͘ Chheng-ek
1937年10月631期 22
Lâng ài pêng-hô. Chóng-sī pêng-hô ê ì-gī chāi tī an-choân(安全). Seng-bēng châi-sán bô an-choân ê só͘-chāi, boē thang sǹg choè sī pêng-hô ê só͘-chāi. To̍k-e̍k-gú ê pêng-hô kap an-choân sī siāng chi̍t jī(Fricde). Pêng-hô kap an-choân si̍t-chāi boē thang saⁿ pun-lī.
Pêng-hô ū nn̄g khoán; chiū-sī lâng ê pêng-hô kap Siōng-tè ê pêng-hô. (1) Lâng ê pêng-hô sī hiān-chōng î-chhî ê pêng-hô, sī thò-hia̍p-tek, sī it-sî-tek, sī piáu-bīn-tek; lāi-tiong ū gî-sim àm-kuí tī-teh, ū chi̍t ji̍t oē po̍k-hoat, m̄-sī thiat-té-tek éng-kiú-tek ê pêng-hô. Chit khoán pêng-hô bô an-choân-sèng tī-teh, m̄-sī chin-si̍t ê pêng-hô. Chit khoán pêng-hô sī ēng hiān-chōng î-chhî kap thò-hia̍p choè in ê sìn-tiâu, bô ēng chèng-gī choè ki-chhó͘, kiat-kio̍k sī teh choè beh lâi ê tò͘-cheng ê chún-pī nā-tiāⁿ. (2) Siōng-tè ê pêng-hô sī ēng Siōng-tè choè tiong-sim, ēng chèng-gī choè ki-chhó͘. Bô ha̍h chèng-gī ê hiān-chōng tio̍h táⁿ-phoà, put-gī ê hun-chú tio̍h châu-bia̍t. In-uī chèng-gī kap put-gī choân-jiân bô ū thò-hia̍p ê û-toē. M̄-sī piáu-bīn-siōng ê pêng-hô, tio̍h ū tuì sim-toé ê pêng-hô, chiah sī chin-si̍t ê pêng-hô.
Siōng-tè ê pêng-hô , chiū-sī lâng tio̍h kap Siōng-tè hô. In-uī lâng nā bô kap Siōng-tè hô, chiū bô an-choân . Taⁿ lâng tek-choē Siōng-tè, thún-ta̍h Siōng-tè ê chèng-gī, beh cháiⁿ-iūⁿ oē tit kap Siōng-tè hô. Tek-khak m̄-sī ēng thò-hia̍p, ia̍h m̄-sī jiōng-pō͘; chiū-sī lâng ê choē-ok tio̍h kái-siau, lâng ê thài-tō͘ tio̍h piàn-hoà oāⁿ-sin. Chóng-sī choē-ok ê kái-siau m̄-sī tuì chêng-ì(情意) lâi khang-khang sià-bián kap khoàⁿ choē-ok choè bô iàu-kín, chiū-sī tio̍h ēng chèng-gī choè ki-chhó͘ ê giâm-giâm ê sím-phoàⁿ, koh só͘ ū ê choē-ok lóng siū giâm-hoa̍t(嚴罰); chiū-sī tio̍h ū Iâ-so͘ ê Si̍p-jī-kè sio̍k-choē(贖罪). Tuì chit khoán thiat-té-tek ê chóng chheng-sǹg koh têng phah-khí, thài-tō͘ tuì sim-toé it-piàn oāⁿ-sin, tuì poē-ge̍k piàn choè sūn-thàn; án-ni chiah oē tit kap Siōng-tè hô.
Kin-á-ji̍t ê lâng choē-choē teh chú-tiuⁿ "pêng-hô", ia̍h m̄-bat pêng-hô ê chin ì-gī. Só͘ chú-tiuⁿ--ê choē-choē sī hiān-chōng î-chhî, iú-bêng bû-si̍t ê pêng-hô, sī uī-tio̍h beh moá-chiok ka-kī ê su-io̍k , kiò lâng m̄-thang hoán-tuì i ê pêng-hô. Nā-sī Ki-tok-kàu ê pêng-hô koat-toàn m̄-sī án-ni, sī ēng Siōng-tè ê chèng-gī choè ki-chhó͘ ê pêng-hô. Só͘-í tio̍h uī-tio̍h Siōng-tè ê pêng-hô lâi bô sioh lán ê hi-seng.
