Gâu-lâng ê Sèng-chheh-koan
Lo̍h Sian-chhun e̍k
1937年11月632期 29-30
1. アブラハム、リンカーン. "Goá sìn Sèng-chheh sī Siōng-tè só͘ hō͘ lâng tē-it hó ê un-sù, tuì kiù-sè Chú só͘ chhut it-chhè ê hó, lóng sī tuì chit pún chheh lâi hō͘ lán."
2. ジヨーヂ、ワシントン. "Nā bô Siōng-tè kap Sèng-chheh, beh lâi sì-chiàⁿ tī-lí sè-kan, che sī put-khó-lêng ê sū."
3. ナボレオン. "Sèng-chheh m̄-sī phó͘-thong ê chheh nā-tiāⁿ; sī ū oa̍h-miā ê mi̍h, ū khuì-la̍t thang iâⁿ lóng-chóng tí-te̍k i ê."
4. ヂヨン、ラスキン. "Goá só͘ siá ê chheh nā ū sím-mi̍h thang khó-chhú ê, si̍t-chāi chí-ū sī tuì goá choè gín-ná ê sî, goá ê lāu-bú ta̍k-ji̍t tha̍k Sèng-keng ê chi̍t chām hō͘ goá thiaⁿ, koh ta̍k ji̍t o̍h chi̍t chām kì-tiâu tī sim-nih ê kiat-kó."
5. アンドルー、ヂヤツクソン. "Hit pún sī lán Kiōng-hô kok só͘ kun-kù ê chio̍h-poâⁿ."
6. ロバート、イー,リー. "Tī goá só͘ tú-tio̍h ê kan-lân khùn-khó͘ ê sî, chit pún Sèng-chheh m̄ bat bô sù goá kng-bêng kap khuì-la̍t."
7. ホレース、グリーレイ. "Tuì tì-sek chiūⁿ, á-sī siā-hoē-chiūⁿ lâi beh sok-pa̍k tha̍k Sèng-chheh ê lâng, sī put-khó-lêng ê sū. Sèng-chheh ê tō-lí, chiū-sī jîn-luī chū-iû ê ki-chhó͘."
8. チヤールス、テイケンズ. "Sin-iok Sèng-chheh sī éng-oán tī-teh, éng-oán hián-bêng tī sè-kài ê choè tē-it hó ê chheh."
9. ジヨーヂ、ミユーラー. "Goá sìn, goá kàu taⁿ soà-chiap teh choè iú-iōng ê hōng-sū ê kang, hit ê tē-it goân-in sī goá kàu taⁿ sī choè Sèng-chheh ê ài-tho̍k-chiá. Chi̍t nî tha̍k Sèng-chheh 4 pái hō͘ i liáu, sī choè goá kàu taⁿ ê si̍p-koàn, ēng kî-tó ê cheng-sîn lâi sêng-siū tī goá ê sim, soà lâi si̍t-hêng goá só͘ chhē-tio̍h ê kà-sī, goá 69 nî kú sī chi̍t ê hēng-hok ê lâng, koh goá hi-bōng goá só͘ thiàⁿ ê hiaⁿ-tī chí-bē in oē thang hēng-hok, hēng-hok koh HĒNG-HOK"ジヨーヂミユーラー i ū tī Eng-kok êブリストルê toā ko͘-jî-īⁿ choè chhut bô lūn sím-mi̍h lâng to bē-bat chhòng ê tē-it chhut-miâ ê Ki-tok-tô͘ phok-ài sū-gia̍p, ū kàu-io̍k chi̍t-bān ê gín-ná. I ū tiāⁿ-tio̍h i ê sūn-sū, hō͘ i kang-tiâⁿ khah ū ha̍p-lí-tek, kū-thé-tek ê só͘-chāi thang lâi chèng-bêng Siōng-tè, iáu-kú teh thiaⁿ lâng ê kî-tó. I it-seng ê kò͘-sū tha̍k liáu chhin-chhiūⁿ kî-īⁿ ê siáu-soat ê khoán. I ê lêng-le̍k sī tuì ài tha̍k Sèng-chheh lâi tit-tio̍h--ê.
