Saⁿ nî ūn-tōng te̍k-kì
Siau Lo̍k-siān
1937年11月632期 26-28
1. Sin chhut-hoat ê kàu-hoē.
(1) Sìn-gióng ê si̍t-liāu būn-toê. Kūn-lâi koan-hē lâng ê sin-thé ê êng-ióng ū chin-choē khoán ê gián-kiù; in-uī kàu taⁿ iáu-bē tit-tio̍h chin ha̍h, chin-lí-sióng ê chia̍h-liāu. Lán ê sìn-gióng ê chia̍h-liāu sī lán put-sî ê būn-toê; chóng-sī lán khoàⁿ choè sī lō͘-bé ê būn-toê, tì-kàu chia̍h-mi̍h choē-choē iūⁿ, só͘ iúⁿ-chhī ê lâng gō͘ hoe cha̍p sek. Sìn-gióng ê kî-hêng, êng-ióng put-liông, bô hong-chiam, bô chú-chí ê lâng choē-choē.
Iâ-so͘ kóng, "Goá sī oa̍h-miā ê piáⁿ, chiū kūn goá--ê koat-toàn boē iau." Lán ê chia̍h-liāu tī Chú ê lāi-bīn í-goā bô hó ê chia̍h-liāu. I ê jîn-keh , I ê si̍p-jī-kè ê cheng-sîn, I ê toā-liōng, kóng-toā ê sim, I tuì chin-lí, chèng-gī ê ióng-kám, I ê chheng-khì ê sim, lán tuì chiah ê ū sím-mi̍h lô-le̍k á-bô? Lán pàng-sak lán tē-it lí-sióng ê chia̍h-liāu, iā ta̍k ji̍t teh chia̍h jîn-chêng bí, phè ké-hó ê chhài; chia̍h miâ-siaⁿ, chia̍h tē-uī, chia̍h kim-chîⁿ. Che àn-choáⁿ oē iúⁿ-chhī sìn-gióng kiān-choân ê lâng? Che cháiⁿ-iūⁿ oē hō͘ kàu-hoē bêng-liāng, ū êng-kng? Lán ēng Ki-tok-kàu ê miâ teh thoân-kàu, teh choè sìn-chiá, teh choè choē-choē iūⁿ ê kang; chóng-sī lán kap Chú saⁿ-kap khiā-khí, lóng bô khoàⁿ-kìⁿ sím-mi̍h kang, sím-mi̍h lô-le̍k.
(2) Tuì chit ê sî-kio̍k lán kám-kak sím-mi̍h? Kiám bô hō͘ lán kám-kak sìn-gióng m̄-sī kan-ta goá sìn Siōng-tè chiū chheng-chhó. M̄-sī chi̍t keng, chi̍t pō͘-hūn, chi̍t kàu-phài ê oa̍h-tāng choè boán-chiok, sī tio̍h hō͘ Ki-tok-kàu ū la̍t. Kàu taⁿ lán bô iau-kiû ha̍p-tông ê kang. Kàu kin-á-ji̍t lán boē choè sím-mi̍h , sī tong-jiân. Lán m̄-sī tú-tio̍h sím-mi̍h būn-toê chiah beh lâi phun-cháu. Kiám m̄-sī pêng-sî tio̍h khoà-lū, cháiⁿ-iūⁿ hō͘ Ki-tok-kàu ū la̍t. Kin-á-ji̍t lán tio̍h hoán-hoé ê, sī kàu-taⁿ bô saⁿ pang-chān, bô ū hia̍p-le̍k tī Hok-im ê kang; suî-lâng kò͘ ka-kī, chi̍t lâng kò͘ chi̍t kak, bô sêng-ì, bô tiong-si̍t tī Ki-tok-kàu. ǹg-bāng lán koh têng chhut-hoat.
(3) Tio̍h ū cho͘-chi̍t-tek ê piàn-kek. Lán kàu-hoē ê chō͘-chit m̄-sī kan-ta tuì goā-kok the̍h pān lâi èng-iōng, sī tio̍h ha̍h tī Tâi-oân--ê chiah oē ēng-tit. Kan-ta jîn-chêng-siōng ta̍k ê khah chhìn-chhái, bô teh siūⁿ kàu-hoē ê sún-sit loā-toā. Tuì chit khoán bô ì-kiàn ê kàu-hoē, ko͘-put-chiong tio̍h ū it-tēng ê kui-kú lâi pang-chān in khah ū lō͘ thang kái-koat in ê būn-toê; in-uī kàu-hoē ê cho͘-chit sī ài ū chhù-sū, kui-kú sī ài pang-chān kàu-hoē hoat-tián. Só͘-í nā ū sím-mi̍h khoat-hām, ū chó͘-tòng kàu-hoē chìn-tián ê, chiū-sī sit-lo̍h hoat-kui ê bo̍k-tek.
(4) Tī-hoē tio̍h ū chek-jīm. Sió-hoē kàu Tiong-hoē kok Pō͘-kio̍k, nā bô chek-jīm ê choè sū, kan-ta thàn jîn-chêng, bô teh siūⁿ kàu-hoē ê sún-ek, sī hō͘ kàu-hoē ná soe pāi, tek-khak bô ná heng-sēng, só͘-í chit tiám lán tio̍h khoàⁿ choè iàu-kín.
(5) Tio̍h ū khah choē keng ê to̍k-li̍p kàu-hoē. Beh khah khoài tit-tio̍h che, tio̍h ēng chi̍p-tiong ê hong-hoat. Khoàⁿ tuì kuí-uī te̍k-pia̍t kè-e̍k tī-hia, hū-kūn ê thoân-kàu-su, tióng-chip, í-ki̍p hoē-iú khîⁿ tī-hia thoân-tō, àn kuí nî kú to̍k-li̍p lâi choè, chiah ū ǹg-bāng. Nā chhin-chhiūⁿ chāi-lâi ê hong-hoat , kiám-chhái tio̍h koh 60 nî kú chiah oē si̍t-hiān. Kan-ta chi̍t ê thoân-kàu-su choè kang, beh hō͘ hit ê kàu-hoē to̍k-li̍p sī hui-siông oh ê sū. To̍k-li̍p kàu-hoē nā ná ke-thiⁿ, iā oē chìn kàu khan-sêng chi̍t keng, á-sī nn̄g keng kàu to̍k-li̍p, án-ni kàu-hoē ê chìn-pō͘ chiū chin kín. Lán tio̍h ū chit khoán ê sim-chì, ǹg hit khoán ê bo̍k-phiau lâi chìn-hêng chiah ū chīn lán ê gī-bū.
2. Thang-sìn Sèng-keng ha̍k-hāu.
Chit pái uī-tio̍h ài kó͘-bú hō͘ tāi-ke ū Sèng-keng ê toē-ki, pī-pān chi̍t-koá gián-kiù ê toê, hō͘ tāi-ke thang siūⁿ, thang tuì Sèng-keng lâi gián-kiù, lâi ìn-tap. Che í-keng pī-pān hó put-chí kú, kan-ta boē tit thang ìn. Chit pái thâu-chi̍t hoê ê gia̍h í-keng ìn beh hó. Nā ìn hó, oē suî-sî kià hō͘ kok khu kàu tī tāi-ke ê chhiú.
(1) Thâu-chi̍t hoê kap tē 2 hoê, sī Sin Kū-iok tāi-iàu ê gián-kiù. Kū-iok ēng Mô͘-se, Í-lī-a choè tiong-sim. Sin-iok sī ēng Iâ-so͘ Ki-tok choè tiong-sim, lâi lia̍h tio̍h in ê cheng-sîn.
(2) Só͘ mn̄g--ê, m̄-sī lâng-miâ, toē-miâ, á-sī nî-kō. Chit khoán--ê khah khoài ìn, sī ài hō͘ tāi-ke thoàn-liān siūⁿ, tuì Sèng-keng lâi chhē, tuì keng-giām lâi ìn. Sī oa̍h--ê, kap lán ê sìn-gióng ū koan-hē--ê. án-ni chiah oē pang-chān lán ê sìn-gióng seng-oa̍h.
(3) Tap-àn m̄-bián siá chin choē; chóng-sī iā m̄-thang siuⁿ kán-tan. Tio̍h ū tuì toê, iā iàu-kín ê tiám, ǹg-bāng bô lak-khì.
(4) Pō͘-hoē ài chhái-tiám, Nā ū 50 tiám í-siōng ê lâng, ài chiong chèng-su sàng i, thang choè kú-tn̂g ê kì-liām, iā tē-it hoê-khí, ta̍k toê nā ū tit-tio̍h só͘ tēng ê tiám í-siōng ê ta̍k-toê, ū suí-suí ê kì-hō thang tah tī chèng-su. ǹg-bāng ta̍k ê chhut-la̍t kàu tit-tio̍h chèng-su, hō͘ Pō͘-hoē só͘ pī-pān ê chèng-su bô kàu, tio̍h koh ìn.
(5) Ka-kī chēng-chēng khoàⁿ Sèng-keng lâi siá, á-sī kuí-nā lâng saⁿ-kap gián-kiù, á-sī kap kàu-hoē sian-siⁿ saⁿ-kap siūⁿ lóng thang; put-kò ta̍k lâng tio̍h ēng ka-kī ê oē lâi hoat-piáu, ka-kī giâ-pit lâi siá.
(6) Pak-pō͘ í-goā ê hoē-iú nā ài chham-ka , pún-pō͘ hoan-gêng.
3. Chhiu-thiⁿ tāi-ke khah ū goân-khì thang oa̍h-tāng teh pang-chān kàu-hoē, teh pò͘-tō ê lâng, ǹg-bāng tuì "Sèng-keng iàu-léng" tit-tio̍h pang-chān. Nā ài chai siông-sè, chhiáⁿ khoàⁿ 7 ge̍h hō ê Kong-pò tē 29 bīn.
三運叢書(第一卷) "三年運動要旨與實際" kap 第三卷"教會之進步與受託之本份". Chit kú koáⁿ-kín pī-pān , ǹg-bāng tī nî-lāi oē tit khan-hêng. Siông-sè āu hō oē koh siá tī-chia.
