首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 耶穌干證本身(2)
耶穌干證本身(2)
卷期：第632號 本次： 日期：1937/11 刊名：台灣教會公報 頁數：24-26
篇名：耶穌干證本身(2) [ Iâ-so͘ kan-chèng pún-sin(2) ]
作者：駱先春 Lo̍k Sian-chhun
  顯示 : 漢羅 全羅 並列  

耶穌干證本身(2)

(對約翰)

駱先春

1937年11月632期        24-26

 

頂月日所寫，論耶穌的人格的內面有講伊就是人子。佇這个條目的內面有講起：(a)伊就是完全的人；(b)伊就是代表tek的人。

也這月日愛來相佮看耶穌的人格的第二項就是：─

  II. 上帝的囝。

共觀福音書的內面，耶穌毋捌直接將這个名稱來稱呼家己，只有佇幾若位伊叫家己做「囝」。閣親像馬太26：63，有上帝的囝的稱呼佇咧；這是祭司長所稱呼伊的。

佇約翰，耶穌用「上帝的囝」，有幾若擺，請看5：25，9：35，10：36，11：4。以外有真濟擺用「囝」，「伊的囝」，「你的囝」，抑是「獨生的囝」來表現。

論上帝的囝的根據，佇詩篇2：7；2撒母耳7：14有通看，總是佇舊約這个名稱是咧稱呼人的時用--的。耶穌稱呼上帝做伊的「爸」的所在，佇約翰若合倚--來，有100較加擺，這有比佇共觀福音書所記的「爸」有加重倍較加。

  共觀福音書所寫，大部份攏是「你的爸」「你的爸，」總是佇約翰所記攏是講「我的爸」抑是「爸。」對按呢看，「爸」這个名稱，佇約翰比別的福音書，普通較有咧用。

佇舊約，人做上帝的囝兒，是因為in有佮應允的祖有關係的緣故；若是佇新約，人做上帝的囝兒，是因為有佮耶穌基督有關係的緣故。請看約翰1：12，耶穌共人做中保，予人通成做上帝的囝兒，按呢耶穌本身做上帝的囝，是比人有超越的所在佇咧。耶穌明明有主張伊佮「爸」的關係是唯一的。伊是獨生的囝(3：16)，耶穌所叫的「爸」佮伊的學生抑是咱所叫的「爸」有分別佇咧。「我的爸......恁的爸」(20：17)。

耶穌明明有講伊的預先存在，(6：62，8：58，17：5，24)。伊對上帝兜來，所以捌見著上帝(6：46，8：38，參看1：18)。I替人死，著轉去歸佇爸16：10，28，20：17)

關係伊的權能，伊有講，「爸所行--的。囝也照按呢行」(5：19)。見若屬佇爸的，攏是伊的(17：10，16：15)，所以伊有權通清氣上帝的聖殿(2：15)。

佇約翰福音傳的內面，耶穌有行幾若个神跡，通來干證上帝的囝的權能。別的福音傳所記的神跡是較濟的，總是約翰才有記8个nā-tiāⁿ。

  (1)水變做主(2：1─11)。

  (2)醫好人臣的囝(4：46─54)

  (3)醫好畢士大池無氣力的人(5：1─9)。

  (4)五个餅，兩尾魚予5000人食到飽(6：1─14)

  (5)行海面(6：16─21)。

  (6)醫好出世就青盲--的(9：1─4)。

  (7)予拉撒路閣活(11：1─46)。

  (8)掠魚的神跡(21：1─14)。

  以外猶有行濟濟神跡，無記佇約翰(20：30)。

上帝的囝耶穌關係過去，現在，未來的事，抑是天頂地下的事，伊攏知。伊毋捌有親像保羅講，「我taⁿ所知無完全」。伊對當時的學生抑是綴伊的人所講的話真有確知性佇咧，常常對伊的喙講出「我實實共恁講」這句通深信的話。閣佇約翰，耶穌毋捌有講起親像馬可13：32所記「論彼日彼時......囝也毋知」彼款的話。論耶穌的再臨，伊講「囝也毋知」，是咧講起時間的毋知nā-tiāⁿ。論再臨的兆頭，款式抑是景況，伊佇別位有明明講起。彼句「囝也毋知，」對佇咧待望再臨的人真有警戒tek，暗示tek，教育tek意義佇咧。論上帝的囝耶穌本身佮聖神的關係，相佮來想淡薄。

聖神的人格，是對耶穌來代先表現--的，聖神用予人有看見的形式來第一代先表現--的，就是伊佇受洗禮的時(1：32)。耶穌得著榮光的時，聖神益發有十分顯現(7：37─39)。上帝賞賜聖神無限量」(3：34)。這个應允，佇五旬節的時有十分應驗。耶穌有應允講上帝欲佇伊的名來差遣聖神(14：26)。閣講，伊欲對爸差遣聖神落來(15：26，16：7)。聖神落來專專是欲為著耶穌做干證，也是欲榮光囝(16：14)，親像囝有榮光爸。

耶穌佇別方面有用真濟款的方法來表現伊佮爸同款，講，「信我的人......就是信差我的」(12：44)。「怨恨我的人，亦怨恨我的爸」(15：23)。「看見我的，就是看見爸」(14：9)。「恁若捌我，就亦捌我的爸」(8：19)。「榮光伊，就是榮光爸」(11：31)。「尊敬囝的，就是尊敬爸」(5：23)。

佇約翰猶有真濟位，耶穌對人承受種種最高的稱呼，就是「上帝的囝─以色列的王」(1：49)。「上帝的聖--的」(6：69)。「基督上帝囝」(11：27)。「先生啊，主啊」(13：13)。「我的主啊，我的上帝啊」(20：28)。「Hô-san-ná」(12：13)。

照頂面來看，耶穌雖罔受遐濟等號的人的榮光的稱呼，猶過伊亦有講伊屬佇爸，這就是對伊的人性的方面來看--的。照看希伯來2：9，耶穌地上生活的各部分，攏有上帝的旨意咧命令的所在佇咧，請詳細研究5：19，6：38，7：16，8：26，28，29，12：49，50。伊著對爸來求(12：27，14：16，17章)。伊有感謝天爸疼伊(11：41，42)。伊常常講，「我的時，是上帝定著--的(2；4，7：6，8：20)。伊的時，是對爸的命令(10：17，18，18：11)。爸比我較大(14：28)。

賜福音書的內面所寫，論耶穌屬佇爸的事，普通攏是對伊的人性謙卑的狀態咧講--的。

耶穌佮上帝的爸囝的關係，對彼个性質來看，是永遠的從屬。

耶穌有時講伊佮爸同款；有時講伊屬佇爸。這兩款各樣的言法，一見有矛盾佇咧，毋過親像以上所講，對(1)人子；(2)上帝的囝，抑是神、人兩性的立場來想，自然無有矛盾的所在佇咧。

耶穌的生涯佮伊的教示，有遐爾深刻的印象佇敬虔的猶太人，耶穌所疼的學生約翰的頭腦，所以伊所寫的福音書，抑是批信，論耶穌的人格的事，實在有真豐富的材料，予咱通研究上帝的囝耶穌基督來深深捌伊，信伊。

                                                         (待續)
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461