首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 疼的王
疼的王
卷期：第633號 本次： 日期：1937/12 刊名：台灣教會公報 頁數：24-25
篇名：疼的王 [ Thiàⁿ ê Ông ]
作者：孫雅各 Sun Ngá-kok
  顯示 : 漢羅 全羅 並列  

疼的王

孫雅各

1937年12月633期        24-25

 

  兩千年前，有幾若个顧羊的人佇馬牢內敬拜服侍一个細漢囡仔。

今年，大概500,000,000人，佇60外國，欲敬拜祝賀伊的生日。今仔日通講，對耶穌的出世，世間人的生活有得著新的意思佮新的方針。耶穌有予咱通知上帝的疼是甚物款。伊有證明，上帝的疼就是：

  (1)個人tek的疼。

有時人拍算上帝是天頂的神，宇宙的主宰，總是較無干涉咱逐日的生活。耶穌予咱通知上帝是咱的爸，亦疼咱個人，「贏過爸母的疼」。「恁的頭毛亦攏計算」。牧者若是失落一隻羊，伊有去山路四界揣到得著彼隻。這个攏是證明個人tek的疼。耶穌落來世間佮人相佮蹛，相佮交陪，有份佇in的歡喜佮艱苦。對按呢，人較有感覺這个真神，上帝毋是干焦坐佇天頂懸懸，離開咱真遠，總是對反，逐日佮咱相佮佇咧，gâu同情咱，特別疼咱一个，親像爸疼伊的囝兒。癩ko的人毋敢來就近人，總是耶穌歡喜接納in，醫好in的病。抽餉的人嘛是無通佮猶太人交陪，總是耶穌共in接納，也揀一个通去傳福音。伊是做歹人的朋友，因為欲救這款的人。艱苦人得著安慰，失望--的得著向望，掛慮--的得著平安。

閣這項，耶穌的疼就是：

  (2)無差別的疼。

佇伯利恆的馬槽前，顧羊的人佮東方的博士有來服侍耶穌，祝賀伊的出世。平常做工的人，佮學者，平平有承認伊的做主。以後耶穌常常實行，獎勵這款的平民精神，教示人著攏做兄弟的款式。佇世間有真濟分別人的法度，較常，世間人用兩款的禮數款待人，就是好額，抑是sòng-hiong；教育，抑是無教育；有地位，抑是無地位；總是這款的分別，無合佇耶穌的教示佮伊的精神。

人的自然的心理愛家己最大。耶穌有教示咱若是欲做大，有干焦一款的法度，就是著做眾人的奴僕，gâu幫贊in。著用相洗跤的精神佇咱中間，來疼厝邊親像家己。

閣一項，耶穌的疼就是：

  (3)無限的疼。

以前毋捌有這款的疼。伊來，毋是欲救猶太國的人。伊拄拄出世的時，嘛是有外國的博士來服侍伊。伊的教示，嘛是有合佇萬國萬民。伊上路尾的話，嘛是有吩咐綴伊的人著去普天下傳福音。伊有疼全世界。伊常常叫伊的學生著實行這个無限的疼。毋通囥怨恨佇心內。毋但赦免人到第7擺：就是70个7擺嘛是著赦免人！毋但著疼朋友，親人，猶原著疼對敵，歹人，等！上帝用這款的疼來疼世間人：耶穌實行這款的疼痛佇咱的中間。「基督到期替有罪的人死......因為咱猶過做罪人的時；基督替咱死(羅馬5：8)。耶穌佇十字架頂嘛是求上帝赦免遐的釘伊的人。實在世間以前毋捌看見這款的疼。咱今仔日做伊的學生的人愛綴伊，總是嘛是常常綴袂著。

咱咧欲閣祝賀伊的生日。欲閣跪落佇伊的面前親像2000年前佇伯利恆遐的人。檢采咱無甚物寶貝的物通送伊親像彼時的博士，通做咱的服侍佮祝賀。總是咱若是實在感覺伊的疼，亦家己閣獻心，閣志願欲來去實行伊的疼，的確這个袂較輸遐的博士所獻的物。

  「我的疼痛求主贊，

疼你贏過通世間。

Taⁿ我立志獻家己，

永永專專，歸予你。」
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461