首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 以馬內利的福音
以馬內利的福音
卷期：第633號 本次： 日期：1937/12 刊名：台灣教會公報 頁數：8-10
篇名：以馬內利的福音 [ Í-má-loē-lī ê Hok-im ]
作者：
  顯示 : 漢羅 全羅 並列  

以馬內利的福音

T. R. S.

1937年12月633期      8-10

 

  「人欲叫伊的名做以馬內利；翻譯就是上帝佮咱佇咧」(馬太1：23)。

  「以馬內利」=上帝佮咱佇咧，這是歷史上，前後無比的事實。佇伯利恆的馬槽，用布包做記號的嬰仔，就是「道成肉體，徛起佇咱中間」(約翰1；14)。無歡喜，無平和，踮佇罪惡佮悲哀滿滿的世界，這是真「大歡喜的好消息」(路加2：10)。

原來以馬內利的福音，是佇肉體顯現，化身的結果。上帝欲予人知，伊愛佮人相佮佇咧，所以上帝的囝，出世成做人。化身是上帝的自己啟示=(將本身顯明佇人的中間=)的極頭。除去上帝取人的性質，趁人的條件以外，上帝袂通完全對人啟示甚物。聖冊咧說明化身的方面，有用彼句「取」--字。「伊本有上帝的形狀，無掠佮上帝平等，做所著執守的，反轉摒空家己，取奴僕的形狀，成做人的樣相」(腓立比2：6，7)。對彼時，上帝的囝，踮佇地上，經驗人的生活。伊取人的性質，見若攏總的謙卑、苦難佮死，伊攏有經過。總是這毋是上帝的囝，永遠的性質變化做人的性質，是上帝的性，取人的性nā-tiāⁿ。雖然成做人，猶過猶原是踮佇上帝，就是有上帝佮人的性質。

總是有人欲講，「化身是上帝踮佇人的一件事，毋但對耶穌基督；就對普通人嘛是會。耶穌基督是予上帝所充滿的一个人而已。」這雖然是近代的說，總是無的確新說，就是健全的說。這號說佮最初的救主誕彼暝，天使所合唱的本意，是無同。神格佮人性自然是袂相合，雖然人是有一款的親和性，總是化身的事，若毋是上帝故意取人的性，就雖然上帝有佇人的中間，猶過佮化身的意義是無相siāng。人欲隨便斷定耶穌基督是干焦教示人捌上帝是天爸，咱人攏是兄弟姊妹的一个大倫理教師nā-tiāⁿ，這有大錯誤佇咧。若公平來讀福音書的記事，耶穌毋是一个大人物nā-tiāⁿ，就是「爸歡喜予一切的豐盛踮佇伊」(歌羅西1：19)。神性佮人性的完全的結合的最後閣特異的啟示，就是在佇遮。佮基督相佮佇咧，就是佮上帝相佮佇咧。信基督，就是經驗「以馬內利」=上帝佮咱佇咧啦！

人所要求--的毋是模範，無論偌優秀的模範，也袂通予咱的地位加偌懸，抑是咱的人格加偌潔白。模範愈大，人欲學，是愈僫。接著偉大的性格，檢采有感激，總是以上的事是無。人所要緊--的，就是得著氣力來實現宗教tek的理想佮咱所欣慕--的。耶穌基督是古今無比的人格，是最大的模範，總是毋但按呢，耶穌基督是取人性的上帝的囝。

咱若無信耶穌是上帝的囝，欲怎樣會對伊盡忠，誠實？若欠這个信仰，欲thài會親像古早的聖徒，做基督忠實的地主？人攏是照所信咧行動。信仰佮忠誠是運命相連接，相做伴。耶穌基督若是受造的物，就咱的禮拜是毋著。救主誕紲變做大人物的記念祭；咱就無理由通歡喜佇救主誕的日。

對上帝的經綸來看，化身佮贖罪是有相連紲，相關連。伯利恆到各各他是一條應該著相連接的線路。上帝來踮佇世間，結局欲救人脫離罪惡的苦痛；這个方法，就是伊的囝取人的聖，死佇十字架，對死閣活。上帝的罪的證明。對按呢，人佮上帝的交通恢復。「伊對基督予咱佮伊閣和」(哥林多後書5：18)。基督的愛，就是上帝的愛；所以贖罪正當的理解，就是著正當的理解化身才是實在。耶穌基督取肉體來顯現佇世間，來贖人的罪，雖然現今罪惡佮悲哀，猶過有存在，總是世間已經是「恢復的樂園」。著信！就化身的全真理佮目的會明白。著經驗！就上帝佮人，對基督來成做一个的信仰袂恥笑--得。

總是真古早佇肉體顯現的基督。伊的生活佮業蹟怎樣會影響彼个效果到佇今仔日？教會佮聖禮典為著按呢來存在。基督佮教會，是不可分離；教會佮聖典也是袂通分離。教會是恩惠的厝；化身的基督，這霎猶過將伊的恩惠對聖典來賞賜咱；所以聖典是化身的延長。「化身是最大的聖典，是目睭所無看見的證據」。意思就是咱佇教會所咧記念的聖禮典，就是表明咱有承受基督的恩惠，也信基督有化身的證據佇咧。佇這个聖典的頂面，教會佮攏總的聖典得著徛在成立。所以教會就是咧證明以馬內利，來徛佇世界。聖典就是彼个表示。設使耶穌基督無佇肉體顯現，就教會的起源毋是屬佇上帝的，是干焦為著宗教tek的目的，男女來集合的團體而已。若是按呢，隨在人欲入抑毋，攏自由。總是教會是「基督的身軀」咱照這个規定的方法成做彼个基。

咱著閣進一步，以馬內利的福音，佇彼个性質上是傳道教化的福音(傳道教化の福音)。這个福音著宣傳佇基督教會化的大眾。基督教的福音，較講也是傳道教化的福音。救主是全人類的，贖罪是無有人種的分別。這个福音是公同，一般tek的福音！人心最大的要求是真理佮活命的啟示。人踮世間會通值上帝的目的，墳墓的彼爿的活命的意義，咱愛得著知。以馬內利的歡喜的福音拄拄是應咱的要求！這个福音是真理的本源，活命的源泉就是永遠佇咧的上帝，對伊的囝化身來表示。伊來世間予咱得著光明，死佮彼爿的世界的祕密就敨開。「上帝佮咱佇咧」(馬太1：23)。這條真理永遠無變換，這个事實也永遠無制限！

古早的教會，雖是看做真軟弱，猶過征服羅馬帝國，後來歐洲的番人(蠻人)也加入佇教會，做基督的門徒，就通知上帝有踮佇伊的教會。咱做日出的國(日の出の國)的百姓，也已經對主的中保來得著這个福音。基督教福音的勝利，就是以馬內利的勝利。世界無有比這个較大，較好的福音。

世界咧煩悶，這是毋捌以馬內利，袂了解以馬內利。予世界有活力唯一的路，是以馬內利的福音=上帝取肉體，來踮佇咱的中間，上帝予世間佮伊閣和；上帝有設備予咱承受恩惠的方法佇教會--裡。上帝對伊的神賞賜咱有活活的氣力。

救主誕欲到，咱閣讀著福音書的故事來想化身的意義。這个福音予世界得著真大的祝福，為著這个緣故，咱愛獻感謝予大權能的上帝。ハレルヤ。A-bēng。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461