Sìn-gióng kap Seng-oa̍h
Hēng-toān 5:1─11
Gô͘ Chheng-ek
1937年11月632期 23-24
1. Seng-oa̍h chiâⁿ-sèng
Lán teh chio lâng lâi thiaⁿ tō-lí, pài Siōng-tè ê sî, siông-siông bat tú-tio̍h lâng ìn kóng, "Goá ài chia̍h hun, ài poa̍h pián[sic.], bô hó phín-hēng, goá m̄-káⁿ khì kap lín pài Siōng-tè". Tuì chit kù oē, ia̍h hō͘ lán thang chai Ki-tok-tô͘ tio̍h ū hó phín-hēng, liân bē sìn tō-lí ê lâng ia̍h án-ni teh kî-thāi, Ki-tok-tô͘ ê seng-oa̍h tio̍h chiâⁿ-sèng. Sui-jiân í-chêng sī bû ok put chok, sī chin pháiⁿ phín-hēng, chóng-sī it-tàn kò-pe̍k i ê sìn-gióng chiâⁿ-choè Ki-tok-tô͘ liáu-āu, i ê seng-oa̍h tio̍h ū it piàn oāⁿ-sin, m̄ thang koh chiàu kū-sî, bô hó phín-hēng ê seng-oa̍h. Sìn-gióng kap seng-oa̍h tio̍h ū it-tì. Sui-jiân chhuì gâu kò-pe̍k i ê sìn-gióng, gâu pâi-lia̍t hó thiaⁿ ê sìn-tiâu, nā-sī i ê seng-oa̍h kap i ê sìn-gióng bô it-tì, chit khoán m̄-sī chin-si̍t ê Ki-tok-tô͘. Lán ê kàu-hoē ū kài-kui, chiū-sī uī-tio̍h ài chèng[sic.]-tùn kàu-hoē-oân ê seng-oa̍h oē chiâⁿ-choè chheng-khì-siùⁿ, kap sàu-tû ké-choè ê sìn-tô͘. Tāng choē ê lâng Chú te̍k-pia̍t khó-lîn i, ài chín-kiù i ê lêng-hûn, chóng-sī í-keng siū kéng ê lâng, Chú tek-khak bô beh koh iông-ún i iû-goân koh kiâⁿ put-gī tī I ê Sèng-hoē-tiong.
2. Siū Sèng Sîn chhiong-moá.
A-ná-nî-a kap i ê bó͘ Sat-hui-lat, tuì goā-koan lâi khoàⁿ sī chhin-chhiūⁿ Ki-tok-tô͘, in-uī oē hiáu hiàn-kim, chóng-sī in ê lāi-sim siū Sat-tàn chhiong-moá, m̄-sī siū Sèng Sîn chhiong-moá. Só͘-í tī in ê hêng-uî ū ké-choè, ū pe̍h-chha̍t. Tī hiàn-kim ê bí-miâ(美名) ū bih phiàn lâng kap phiàn Siōng-tè ê choē-ok tī-teh. Chit khoán sī Sat-tàn ê só͘ choè, m̄-sī Sèng Sîn ê ké-chí. Hiàn-kim ê hêng-uî, sī thang o-ló kám-sim, sī Chú só͘ hoaⁿ-hí, chóng-sī bô sêng-si̍t ê hiàn-kim, sī chhut tī Sat-tàn ê ì-sù, tio̍h giâm-giâm chek-pī. Siū Sèng Sîn ê lâng ê só͘ choè, bô lūn toā-sió-sū sī chhut tī sêng-si̍t bô ké-choè, bô kiû thé-biān, bô kiû ka-kī ê êng-kng, bô thàn jîn-chêng, Ki-tok-tô͘ èng-kai tio̍h ū án-ni. Chóng-sī kin-á-ji̍t ū lâng bih tī choè Ki-tok-tô͘ ê bí-miâ, lāi-sim siū Sat-tàn chhiong-moá. oē hiáu gîm-si, tha̍k Sèng-keng, kóng tō-lí kap hiàn-kim, i ê khoán-sit chhin-chhiūⁿ chin jia̍t. Chóng-sī i ê seng-oa̍h ê lí-biān(裏面) sī kiau-ngō͘, ok-to̍k, chân-jím, su-io̍k moá-moá ê lâng. Siū Sèng Sîn chhiong-moá ê lâng, tek-khak boē choè chit hō sū, in-uī Sèng Sîn boē-oē ké-choè, ia̍h boē oē choè Sat-tàn ê kang-tiâⁿ. Lán choè Ki-tok-tô͘ èng-kai tio̍h siū Sèng Sîn, m̄-sī sio̍k Sat-tàn. Chóng-sī lán nā ū put-hoat, á-sī ū kè-sit, che m̄-sī Sèng Sîn ê hō͘ lán án-ni, sī lán goā-phê choè Ki-tok-tô͘, lāi-sim hō͘ Sat-tàn chhiong-moá. Só͘-í lán tio̍h ka-kī hoán-séng, lán sī sio̍k Sèng Sîn á-sī sio̍k Sat-tàn.
3. Boē-oē phiàn Siōng-tè.
Siū Sèng Sîn chhiong-moá ê lâng boē-oē phian[sic.] Siōng-tè, siū Sat-tàn chhiong-moá ê lâng kiat-kio̍k ia̍h sī boē-oē, chóng-sī ū phiàn Siōng-tè ê liām-thâu. Ū lâng siūⁿ kóng Siōng-tè boē-oē phiàn-tit, chóng-sī lâng chiū suî-piān oē thang phiàn, só͘-í siông-siông ài phiàn lâng. Phiàn lâng lia̍h choè tek-ì, phiàn lâng lia̍h choè oē thang tit-tio̍h sèng-lī, phiàn lâng beh moá-chiok i ê su-io̍k. Chóng-sī phiàn lâng kiat-kio̍k ia̍h sī phiàn ka-kī. Tuì lâng bô sêng-si̍t, tuì ka-kī bô sêng-si̍t, kiat-kio̍k tuì Siōng-tè ia̍h sī bô sêng-si̍t. M̄-nā án-ni, phiàn lâng sī phiàn Siōng-tè ê chhe-ēng, só͘-í kiat-kio̍k chiū-sī phiàn Siōng-tè. Ké-choè ê sìn-tô͘, m̄-sī kan-ta tī lâng ê bīn-chêng sī ké-choè, tī Siōng-tè ê bīn-chêng koh-khah sī ké-choè. Ké-choè ê Ki-tok-tô͘ só͘ choè lóng sī moâ-phiàn, tuì ké-choè beh tit-tio̍h êng-kng kap sèng-lī, chóng-sī kiat-kio̍k m̄-sī phiàn lâng, chiū-sī phiàn Siōng-tè. Só͘-í siông-siông tú-tio̍h chhiⁿ-chhám kap sit-pāi.
4. Giâm hoa̍t
Siū Sat-tàn chhiong-moá ké-choè ê Ki-tok-tô͘, káⁿ phiàn Siōng-tè ê lâng, èng-kai tio̍h siū giâm hoa̍t. Kàu-hoē tio̍h ū kài-kui thang chéng-tùn kàu-hoē-oân ê seng-oa̍h, hō͘ i chiâⁿ-choè chheng-khì-siùⁿ. A-ná-nî-a kap Sat-hui-lat só͘ tú-tio̍h--ê, thang kóng sī èng-kai. Kiám-chhái ū lâng beh kóng án-ni, kiám bô siuⁿ chân-jím. Ū lâng chú-tiuⁿ kóng, kàu-hoē m̄-bián ū kài-kui. Sè-kan lâng uī-tio̍h beh jia-khàm ka-kī ê choē-ok, uī-tio̍h beh siám-pī choē-ok ê hêng-hoa̍t, siông-siông chú-tiuⁿ A-ná-nî-a ê chhù-hoa̍t sī siuⁿ châm-jím, kàu-hoē ê kài-kui sī bô ha̍h Ki-tok-kàu ê phok-ài kap chín-kiù tāng choē-jîn. Nā-sī A-ná-nî-a bián siū giâm-hoa̍t, kàu-hoē bián kài-kui chieh[sic.] oē ha̍h Ki-tok-kàu pún-lâi ê ì-gī, án-ni kàu-hoē thang iông-ún siū Sat-tàn chhiong-moá ê sìn-tô͘ ê chûn-chāi, thang kap Sat-tàn thò-hia̍p saⁿ khan-chhiú mah? Kàu-hoē kong-jiân sìn Sat-tàn ê chhim-ji̍p, Sat-tàn ê ì-sù chhiong-moá tī kàu-hoē-lāi, nā-sī án-ni, lán ê Chú Iâ-so͘ thái oē thang sǹg choè sī tek-sèng, sī koh-oa̍h ê Chú. Tuì choē-ok ê giâm-hoa̍t, koat-toàn m̄-sī chân-jím. Kàu-hoē ê kài-kui koat-toàn m̄-sī lī-khui Ki-tok-kàu pún-lâi ê ì-gī, hoán-tńg chiap-la̍p choē-ok, bô pān i ê choē, lâi hoè-bô Siōng-tè ê chèng-gī, hō͘ Chú Iâ-so͘ ê huih chiâⁿ-choè bô ì-gī chiah sī chân-jím, chiah sī lī-khui Ki-tok-kàu pún-lâi ê ì-gī.
Sui-jiân sī án-ni, chóng-sī lán tio̍h chù-ì ka-kī, m̄-sī lán bô tú-tio̍h Siōng-tè ê giâm-hoa̍t, bô siū kài-kui ê chè-chhâi, chiū-sī thang sǹg choè sī hó lâng; á-sī uī-tio̍h lán ê choē-ok bô lâng chai, chiū lia̍h choè kài-kui oē siám-tit, Siōng-tè oē phiàn-tit. Koat-toàn m̄-sī án-ni, che sī in-uī sî-kî iáu-bē kàu. Lūn sî-kî iáu-bē kàu, ū nn̄g ê koé-seh. Tuì tī kè-khì thang khoàⁿ choè sī Siōng-tè ê khoan-iông, tuì bī-lâi thang khoàⁿ choè sī pháiⁿ-lâng jú-á beh hián-bêng i ê pháiⁿ. Só͘-í lán ka-kī hoán-séng ê sî, tuì tī kè-khì tio̍h kám-siā, in-uī Siōng-tè ū khoan-iông lán, tuì tī bī-lâi lán tio̍h kéng-kài kiaⁿ-hiâⁿ, in-uī kiaⁿ-liáu lán ê só͘ choè oē it-hoat hián-bêng lán ê pháiⁿ. Siōng-tè ê giâm-hoa̍t, kàu-hoē ê kài-kui boē bián-tit ū. Choè iàu-kín--ê, chiū-sī tio̍h chiâⁿ-choè sêng-si̍t ê Ki-tok-tô͘, chiū-sī i ê seng-oa̍h tio̍h ū chiâⁿ-sèng, tio̍h ū siū Sèng Sîn chhiong-moá. In-uī Siōng-tè sī boē phiàn-tit.
