改譯舊約聖經
吳清鎰
1937年12月633期 30
改譯舊約聖經已經出現3年外久，總是佇今仔日有人舊譯的聖經猶咧用。論用舊譯的聖經卻是出佇個人的自由，無人會阻擋伊；總是佇公眾的面前咧讀聖經的時，應該著讀改譯--的，才是合宜。卻亦有人欲問講漢字的聖經未有改譯--的；總是照鄙人的所想佇公眾的面前較好漢字--的亦毋通用。因為讀漢字--的袂一致，會失落聖經的尊嚴。
舊約改譯的聖經的固有名詞濟濟已經有改換。「Ná-a」換做「Lô-a」，「A-pek-lia̍p-hán」換做「A-pek-la̍h-hán」，「郇城」換做「錫安」；以外猶有真濟。遮的固有名詞咱讀改譯--的的時，自然會照新的字音來讀。總是咱咧講的時，(或是講道理抑是講故事)，較好亦著照新的字音來講才好，若無就讀佮講是未一致。咱毋通照咱的利便毋改換，咱著為著新聽的人佮囡仔來換新；(小可家己犧牲)來予in毋免混雜，聽了較會入耳。 |
