首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 赴總會佮協議會感想
赴總會佮協議會感想
卷期：第646號 本次： 日期：1939/1 刊名：台灣教會公報 頁數：5-7
篇名：赴總會佮協議會感想 [ Hù Chóng-hoē kap Hia̍p-gī-hoē kám-sióng ]
作者：潘道榮 Phoaⁿ Tō-êng
  顯示 : 漢羅 全羅 並列  

赴總會佮協議會感想

潘道榮

1939.01 646期 5-7頁

1. 鄙人這擺去赴聯盟總會佮全國基督教協議會；心肝第一滿足--的，就是看著上帝無限量的疼。無論佇路中佮在驚中，到逐位，都是受上帝用伊疼痛的聖手咧指導，攏免驚惶掛慮甚物。特別佇聚會中，赴會的代表者攏是真出名的先生，猶久逐个真好交陪，萬項無感覺一屑仔不自由，不時是流感謝的目屎。因為鄙人是一个極微細--的，猶久受著in遐爾好的款待。彼日受歡迎的時，連宗教局長松尾(Matsuo)博士，也用握手的禮，來表敬意。議長釘宮(Kugimiya) 監督，請鄙人坐佇歡迎式的頭位(再三推辭，毋肯予鄙人坐別位)，紲牽手對眾議員紹介，予鄙人徛佇台頂來講事禮的話。最後伊對咱的謝辭是講：願上帝降福佇台灣教會，通得著大發展；也向望無偌久會通加入佇基督教聯盟。請替請安台灣的兄姊。

2. 議事真整齊。議員徛起來欲講話，攏照禮數，請議長的允准。意見雖然有時無同，猶久用基督徒紳士tek態度，來相讓。從中咧議論教會合同問題，是第一熱心閣慎重；各教派攏有相當的議論，也有各國的條件；雖然欲進行猶有難關，猶久滿場一致贊成，向望無久會得實現。對這點，鄙人深深咧想，按怎台灣教會對大--的來講，南北長老教會猶未合一；對細--的來講，各中會各教會......請咱家己反省。

3. 先後輩的界線真分明。古早聖人講，敬老尊賢；這鄙人起頭佇內地才有看著--的。比並來講，In這擺咧揀議長，是揀啥等號人leh？是揀先輩的人格者，閣是博學，內外有名聲--的。受揀--的，是真謙卑，閣gâu處理會議中的萬項。這自然是對in訓練的周到；猶久是對in上下有秩序，有親愛的心，才會得按呢。

雖然是博學的後輩，總是真謙卑；對先輩者不止有禮貌。捌聽見某中會咧揀議長，講是用運動--的。啊！這款欲thài會予台灣教會振興leh！

    4. 開會佮閉會，彼个式非常个壯嚴。時間無鎮傷久，閣真準。說教者个勉勵真切實，無一句脫線的話。閉會式的時，議長攏有指名揀一个議員做代表來講謝辭。彼个議員所講--的，實在會堪得做閉會式眾議員的代表。可見in所揀欲赴會的代表，真正無隨便。

    5. 對昭和14年起，3年久協同傳道的計劃。這計劃是真好。總是濟濟是咱台灣教會所僫得做--的。親像：－

(1) 婦人傳道大會。

(2) 實業青年大會。

(3) 精神作興，諸學校講演。

(4) 其他。

    早台灣的宣教師，傳教是注重佇農村方面，都會較少。內地是對反。又閣傳教方針，總講屬佇愚民政策，致到現代教界的人物少，綴時勢袂著。對這點，咱著深深考慮，毋通閣固執，對這協同傳道有派拄好的講師通應援逐地方。無分教派，是純粹欲傳基督的福音。

信徒這方面有用下面3款的準備：－

(1) 教職，信徒總動員聯合祈禱會。

(2) 信徒義勇傳道傳團員的訓練。

(3) 聯合準備修養會。傳道報國，是咱教徒的大使命。

6. 照當局者所報告，現在政府所統計，基督徒的信者有減少。這是數字的報告nā定，總是照Kagawa先生，這幾年百萬救靈的傳道，伊的所報告是有加添。無論怎樣，照鄙人的觀察，佇日本的基督教這幾年有大進步：雖然有教會是細細，會員無偌濟，猶久較濟是獨立。信徒較明白in的責任。咱台灣教會若照統計是袂少，總是對實質來看，信徒真軟弱。聽道理幾若十年，也無欲領洗禮入聖會。對這點，咱台灣教會眾傳教者此去著盡力訓練求道者入聖會。眾信徒著極力前進，予教會完全獨立。

7. 這擺欲去赴印度世界基督教大會，共有21名。會員問in講，恁欲去赴會，人若問恁，日本的基督徒對這擺日支事變怎樣......恁欲怎樣應答。關係者(副議長Kozaki先生) 應講，阮只有謙卑佇上帝的面前懺悔，袂通講甚物。

佇彼个時陣，副議長本身嚨喉管tīⁿ，用細細的聲來應答。議員一時靜chauh-chauh，逐人àⁿ頭咧懺悔。記者看了，心受感激，袂禁得也流目屎。

真基督徒的像，敢毋是著不時謙卑，赤lō-lō佇上帝的面前來生活嗎？

8. 台灣教會有加入聯盟的必要

聯盟所做的事業真濟；上要緊--的：－

1) 對世界基督教共同的事業。

2) 對日本基督教共同的事業。

3) 有義tek的提攜佮連絡。

咱台灣教會毋通孤立，應該佮聯盟同步調來進行。佇現在的時局，閣較是要緊。

9. 佮日基提攜的必要。日基佮咱是siāng長老教派。Taⁿ in有派5名的委員欲佮咱相提攜；向望咱毋通失落這个機會。鄙人有受日基大會代表者的招待，in有講愛咱佮in親像兄弟仔相提攜，來建設天國。

10. 最後對日本教會來看，愛來想幾項。台灣教會此去的方針，通做列位的參考：－

1) 台灣教會的政治著完全獨立；毋通閣受補助。

2) 南北真合一，著緊實現。

3) 神學校聯合，做先決問題。

4) 對東京台灣青年傳道，著有關心。

5) 教會各代議機關，著有相當的覺悟佮奮發。

6) 眾傳教者著有一致協力的精神。

7) 各信徒著有加倍疼教會的心。

其他猶真濟愛講，聽候後號才閣寫。求上帝贊咱台灣的教會，對今年起，會大大進步。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461