Kàu-hoē ê Kaôn-pèng
1939.02 647 kî 01-02
Pún-goe̍h, kok Tiong-hoē lóng beh khui-hoē lâi pān-lí Kàu-bū. iā tī 3 goe̍h, Lâm-pō͘ Tāi-hoē ài chio-chi̍p lâi gī-koat thong Lâm-pō͘ só͘ tio̍h chìn-hêng--ê. Kì-chiá iáu-bē siá, Pún Siā-soat ê tāi-seng, tì-ì ài kèng-chhiáⁿ sio̍k Chú ê lia̍t-uī hiaⁿ-ché, ta̍k ji̍t poah sî-kan, pek-chhiat thè Tāi Tiong-hoē lâi kî-tó. Kó͘-chá lâng kóng, Kok-ka ê heng-soe, phit-hu iú-chek. Oāⁿ oē lâi kóng, Kàu-hoē ê chìn-pō͘ kap tò-thè; chèng sìn-tô͘ lóng tio̍h tam-tng hit ê chek-jīm.
Chhì-siūⁿ, chho͘-tāi Iâ-lō͘-sat-léng ê kàu-hoē, kiám m̄-sī chin lí-sióng ê kàu-hoē mah? (1) Ū hó ê Bo̍k-su: Chhin-chhiūⁿ Chú ê hiaⁿ-tī Ngá-kok, sī chi̍t ê lāi-goā ū bêng-bōng ê jîn-keh-chiá, chò chin hó ê Tāi-hoē Gī-tiúⁿ, gâu pān tāi-chì. (2) Koh ū hó ê Thoân-tō-su: Chiū-sī hiah ê 12 Sù-tô͘ (Má-thê-a pó͘ Iû-tāi ê khoeh) hó-táⁿ jia̍t-sim thoân-kàu. Sui-jiân khah chē, sī kan-ta kì Pí-tek ê sū, iáu-kú lán thang tuì i lâi chhui-chhek kî-thaⁿ ê Sù-tô͘, in tiāⁿ-tio̍h ū tit-tio̍h hui-siông ê khuì-la̍t, teh ín-chhoā lâng kui Chú. (3) Ū hó ê Jīm-chit-chiá: Chhin-chhiūⁿ Sū-thê-hoán kap Hui-le̍k; gâu lí-châi koh gâu pò͘-tō. (4) Ū hó ê hoē-iú: Tāi-ke tâng-sim chi̍t-ì, jia̍t-sim, thiàⁿ kàu-hoē pí thiàⁿ ka-tī khah koè-thâu; uī-tio̍h tō-lí chē-chē chīn-tiong kàu sí.
Chit khoán lí-sióng ê kàu-hoē, lán kiám bô teh him-bō͘ mah?
Chin ê kàu-hoē, Lí-sióng ê kàu-hoē, chiū-sī tio̍h chīn Siōng-tè só͘ kau-tài kàu-hoē ê sú-bēng. Kàu-hoē, chiū-sī chò Choân-lêng ê Siōng-tè ê Tāi-piáu-chiá, tī tē-chiūⁿ teh chò-chiâⁿ Siōng-tè ê chí-ì.
In-uī ài chīn Siōng-tè só͘ kau-tài ê sú-bēng; só͘-í kàu-hoē ū niá-siū chit ê koân-pèng tī-teh. Sī sím-mi̍h? " Kìⁿ-nā lí tī tē-nih pa̍k--ê, tī thiⁿ-nih ia̍h beh pa̍k i; kìⁿ-nā lí tī tē-nih pàng--ê, tī thiⁿ-nih iā beh pàng--i" (Thài 16:19; I Lîm 5:3-5). Chí-ū siū Sèng Sîn chhiong-moá ê kàu-hoē, chiah ē thang hêng-sú che tuì téng-bīn só͘ siúⁿ-sù ê koân-pèng. Kàu-hoē, ū seng sat ú-toa̍t (生殺與奪) ê koân-pèng tī-teh.
Ki-tok kóng, Goá ê kok, m̄-sī sio̍k chit sè-kan. Kàu-hoē kap chèng-tī chū-jiân sī hun-lī. Kàu-hoē ti̍t-chiap, khiok-sī bô kan-sia̍p tī chèng-tī būn-tê. Chóng-sī chit sè-kan it-chhè só͘ ū ê tāi-chì, tī poē-āu ū khoàⁿ bē-tio̍h lêng-kài ê hoán-chiò tī-teh. Tī it-chhè siā-hoē hiān-siōng-tiong, ū lêng-kài ê la̍t, teh chiáng-lí--i; só͘-í chi-phoè lêng-kài--ê, iā ē thang chi-phoè hiān-sè. Chá, Sian-ti Í-sài-a chûn-chāi, chiū kiông-kok A-su̍t tio̍h hâng-ho̍k, tuì án-ni Í-sek-lia̍t-kok thang hióng-siū thài-pêng. Tuì Ná-su Sian-siⁿ ê kî-tó, chiū ok-ge̍k ê Lú-ông Má-lī-a tio̍h kiaⁿ-hiâⁿ hâng-ho̍k, kàu boé, hō͘ So͘-kek-lân tit-tio̍h chū-iû.
Tuì chá kàu taⁿ, kìⁿ-nā poē-ge̍k Siōng-tè kap Kàu-hoē í-ki̍p chèng-gī it-chhè ê sè-le̍k--ê; lóng tuì Kàu-hoē ê sìn-gióng kap Kî-tó lâi kòng-chhuì--i, Kàu-hoē nā bē thang án-ni--ê, chiū-sī tuì lán khì-sak tuì téng-bīn só͘ hō͘ lán ê koân-pèng, kam-goān khì oá-khò lâng só͘ chò ê chhiú-toāⁿ.
Goān lia̍t-uī tī chit ê sî-tāi, ta̍k-lâng khiam-pi tī Siōng-tè ê bīn-chêng lâi jīn-choē, koh chi̍t-pái lâi khoe-ho̍k che koân-pèng; lâi kap hiān-sè ê choē-ok chiàn-tò͘, hō͘ it-chhè pháiⁿ ê tuì-te̍k lóng hâng-ho̍k, thang chiâⁿ Thiⁿ Pē ê chí-ì tī tē chiūⁿ.
