首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 宗教教育講座
宗教教育講座
卷期：第647號 本次： 日期：1939/2 刊名：台灣教會公報 頁數：6-9
篇名：宗教教育講座 [ Chong-kàuKàu-io̍k Káng-chō ]
作者：王守勇 Ông Siú-ióng
  顯示 : 漢羅 全羅 並列  

宗教教育講座

(中中：王守勇)

1939.02 647期 06-09頁

第7 講：路邊教授

1.  路邊教授的要緊

主耶穌行路的時，佇路邊，佇同行的人的中間，逐擺揣機會來教示。因為這款的機會無較輸佇室內的教示。親像佇敘加的古井邊，抑是佇樹跤看見撒該佇桑材樹頂，抑是拄著法利賽人的西門，佇彼時有掠著真好的時間來開喙教示。總講，耶穌對這个傳道佇欲去別个所在，佇路中，抑是佇無按算的機會，佇路邊伊就開喙教示。

親像這款的方法，不止有通做咱的模樣。咱做到教師的責任毋是干焦佇教室內nā-tiāⁿ；其實佇路裡，佇街裡佮生徒接觸的時，教師的感化，抑是教示佮佇教室內的教示，平價值。咱不時著存這款的心，佇講話中愛chhoā in入佇聖冊的教訓的原則來生活。有自然tek，會趨向佇聖冊，有興味佇主的教示，若有按呢就達成路邊教授的目的。

    2.  路邊教授的注意

這款教授毋是容易的所在。若無老練，顛倒做窒礙。佇路中抑是相拄著的時，生徒毋是遐爾快通承受你的教示。所以教師，著有聖冊的智識的把握，臨時應機，不時會通khiu生徒的興味。你的話題著真活。毋通予in感覺厭。耶穌不時有準備便便，攏會通應人的欠缺，應時來教示。按呢咱做教師抑著親像按呢，是所向望。

3.  不論有熟似無熟，也著佮in接觸

會通佮凊彩人交陪，接觸佇in 的生活，揣機會來教示，這是教師的資本。佇這點，主耶穌有絕對的權威。因為伊會接近佇抹大拉的馬利亞，也會接觸佇撒馬利亞的婦人人。佮遮的人的相接觸，佇談話中，定著向佇宗教談來結尾。也對未信者那但業，差不多5分久的談話，就到額予伊降服。按呢，伊無論接觸甚物人，的確得著彼个人。一旦若佮伊相見，無論甚物人，心攏一遍歡喜，感謝來相離。做教師--的，咱著研究這个法度，來chhoā人就近耶穌。

4.  相佮出外

主耶穌常常相佮出外。佇彼中間，gâu利用時間來教示in。佇出外中所得著有益的教示，學生毋敢袂記得。今仔日咱會通得著彼个記錄，是做感謝的所在。親像欲出外去該撒利亞，腓立比的路中的教示(馬太16：13-21)；也欲去耶路撒冷的路中的教示(馬太20：17)；閣佇閣活後，欲去以馬忤的路中的教示(路加24：18)。遮的就是彼个例。親像按呢，教師愛常常佮聖徒出外，無論行路，散步，旅行，著揣機會教示in，予in 的心熱熱向佇道理。

5.  休夏中的教授

主耶穌雖然有歇睏的時間，總是毋捌休止伊的教示。有時chhoā學生相佮去歇睏，圖謀in靈性的發達。親像變餅，飼5千人神跡，通講是佮學生咧野營的時陣。咱所著學--的，就是主若有閒的時間，攏是利用佇教示，其實耶穌毋捌有無做工。咱做教師，也是希望著按呢。善用你的時間佇主的教示。

第8講：耶穌做教師的成功

1.  莫得掛慮會成功抑袂

耶穌做教師，全然無咧想會成功抑袂，這伊攏無咧掛慮。對伊的教示，有承受，無承受，欲譭謗抑是欲呵咾，這伊攏無欲探聽。伊無求人呵咾，抑無阻止人的譭謗。不論人欲怎樣批評，伊攏無著驚，心無搖動。有時予人棄捒，抑有時予人歡迎，總是佇受呵咾抑是歡迎的時，伊顛倒愛閃避去偏僻的所在。

因為伊對本身，對上帝有確信，人一般的評論，無掠做問題。這點就是伊成功的祕訣。所以咱做教師著親像主的款，不論人欲共咱呵咾，抑是嫌咱，這無下佇眼中，因為咱的成功著對別的標準來判斷才著。

2.  著怎樣才會成功

(1)  用舊的真理來適用佇闡明新的真理，佇這點耶穌有成功。對舊約的教示用新的光明來照，關係律法的問題，指示當時拉比所未捌想的方面。論天爸佮彌賽亞的事，有提供新的見解，來教示宗教上真理的智識。

(2)  耶穌不時留問題予人議論。不論佇佗位，佇甚物時，有指示人所毋捌想的代誌。雖然有反對，有抗議，猶久對伊所發出的問題，人熱熱來議論研究。

(3)  聽眾會決心。耶穌無希望聽眾有明白伊的教示做夠額，就是對in中間有決心者做要緊。伊有得著12名決心者來做伊的學生，遮的後來有搖動天下。咱知基督教有得著保羅一人的決心奉獻，彼个傳道的效果毋是小可。按呢教師第一要緊是對咱的生徒有決心的奉獻者做要緊。

3.  予真理不時活活

所教的真理，毋是予學生用頭殼來理解就好，就是著愛刺鑿in 的良心。伊所教的教示，攏是死活的問題。聽眾雖然有反對伊的教示。伊有默示佇學生的面前，予in明白伊的教示無趁，無行袂用得，抑袂無視得的自覺。按呢咱做教師，毋是干焦予學生有理解所教的就到額，就是逼in會照按呢去行，做要緊。所以伊的教示，不時活活佇學生的耳孔咧喉叫，逼in著照按呢來實行。

4.  予對敵做成功的力

教師常常有對敵，有時這是做成功的氣力。咱知主的對敵，較常是做伊成功的氣力。咱看，法利賽人愈阻止，愈愛害耶穌的時，耶穌佇彼時，是益發前進伊的教示。親像按呢，佇主日學檢采有拄著攪擾抑是反對，總是這袂通阻止宗教教育的成功。

5.   若久若明，若有力

親像伊咧教示伊本身的受難死佮閣活的真理，當時學生袂明，總是無袂記得。若久就若明彼个義，後來學生有得著真大的氣力。親像按呢咱所教的，生徒檢采袂明，總是著予in毋通會袂記得，不時掛佇心裡，若久就若明，才有路用。

第9講：耶穌做教師的失望

主耶穌毋是會失望的教師，雖罔有真濟通失望的原因，猶久伊不時超越無失望。對種種的事物，主耶穌有斟酌想，對咧取扱資私的問題，有確信，毋捌失志抑是失望。雖然是按呢，有真濟會通致到失望的事情佇咧，對遮的，耶穌有取甚物態度，這是咱所愛知的所在。

1.  愚鈍(頇顢)

耶穌真gâu闡明，猶久聽眾真頇顢，聽袂理解。雖然有真好頭腦的人，抑是常常曲解。伊有特別訓練12 的學生欲來紲接伊建國的大事業，連遮的學生，也袂通理解伊的死，閣活，贖罪遮的代誌，通講是真愚鈍。雖然有受3年久的教育，猶久常常予主失望。所以佇你的主日學若有真愚鈍的生徒佇咧，你也毋免失望，著吞忍，用最善的方法來繼續你的教示，就穩當有通向望的所在。

2.  心門毋開

若是愛求趕鬼，醫病，抑是食餅的緣故，就有人欲揣耶穌，若是開喙教示，就濟濟人驚去聽著，若聽著，亦是無欲理解。論悔改，信仰，祈禱遮的教示，in攏失志，無趣味，做in去。

咱做教師，亦是siâng款，生徒不管是信徒抑是未信者的子弟，in若無趣味佇咱的教示，毋免失志。In 的心門雖然毋開，猶久咱著進前照所備辦--的來進行，有一日，的確會得勝。

3.  當面反對

主耶穌對民眾咧教示的時，彼个中間定著有人誤解抑是反對，時常愛揣空縫來共伊攻擊。得這款的反對，攻擊，耶穌不時取平靜的態度。雖然知反對者真有勢，欲用極刑的十字架，猶久伊亦是安靜，進行伊的路程。

今仔日的教師，卻無拄著親像主這款的逆境，萬一若有拄著，的確欲看主所取的精神，吞忍有自信佮勇敢來進前。

4.  興味的衰退

起頭真濟人來綴耶穌到尾失落興味，就離開伊。總是主無強勉強in 蹛咧。對耶穌的喙，有聽見佇世間未捌聽見的教示，遐的人是講幾若千，總是到尾來綴伊的人，才有120名。這就是宗教教師所拄著失望的一个原因。因為攏是虎頭老鼠尾。主日學的生徒也是按呢。起頭真濟，後來就那少，細漢的時真熱心，到較大漢的時就離開。咱欲招生徒，比欲保持生徒猶較快。設使生徒若那liu那走去，教師就那無元氣，總是毋通想這是失敗；若有看主，你就會徛在。

5.  對失望的處置

(1)  對本身有確信

欲解決事件的鎖匙，毋是在佇反對者的內面，是在佇咱本身的內面。若用快失望的心來擔當代誌，就是快失望。耶穌無囥這款的心肝，所以伊無失望。若欲按呢，著有健全有元氣，活潑的精神。主耶穌就是這款健全的精神的所有者，所以不論佇甚物不利的事情，也無吐出彼个苦情。若有這款的精神的人，不論拄著甚物逆境，亦是袂失望。

(2)  闊大的看法

人若徛愈懸，就看愈遠，親像按呢，若拄著失望的時，著徛佇信仰的懸山頂來看，就袂失望。耶穌是對上帝的所在懸懸咧看人生。伊若拄著失望的原因，就對玉座懸懸來看彼个反面，就無受搖動。耶穌是對向上帝彼方面來咧看代誌。若對向上帝這方面來看，就無有失望的所在。咱做到教師，亦著親像按呢。

(3)  做工無時停

耶穌做工無時停。雖然佇這方面有阻擋，若是佇別方面會通做工。的確無有四面看無路的所在。不過咱著自覺所著做--的，著做。若是按呢，就袂拄著失望，反轉欲予世間失望。因為上帝無絕人的向望。

(4)  祈禱無煞

耶穌一生是祈禱的生活。拄著大危機的時，伊佇祈禱交陪上帝。親像佇加伯農所拄著做苦痛，失志的時，通暝佇山裡祈禱，到天光無看見伊有失望的面。按呢咱做主日學的教師，著用祈禱交陪主來解決所拄著的逆境，就免致到有失望的所在。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461