ēng Bó-sim ê Kàu-io̍k
(Chiap kū-nî 12 goe̍h 12 bīn)
1939.02 647 kî 21-21
3. Sià-bián ê lāu-bó, chiah sī hó ê lāu-bó (良す母こそ赦す母)
1. Tuì gín-ná ê kî-thāi (子供への期待)。
Lāu-bó tuì gín-ná ê kî-thāi ū chin-chē khoán, kî-tiong tē-it hā-téng ê kî-thāi, chiū-sī uī-tio̍h i pún-sin ê bêng-ū, kiò gín-ná tio̍h pí pa̍t-lâng khah gâu, thang hō͘ pa̍t-lâng o-ló, kóng i chin gâu kàu-io̍k gín-ná. Tuì án-ni, gín-ná chiū ko͘-put-chiong, put-tek-í tio̍h the̍h pí pa̍t-lâng khah hó ê sêng-chek, chiah ē ēng-tit.
Siat-sú nā the̍h pí pa̍t-lâng khah bái ê sêng-chek, i chiū chin sit-bāng, uī-tio̍h sit-lo̍h i ê bêng-ū, só͘-í chin m̄-goān, tì-kàu toā-toā chek-pī gín-ná.
iā koh nā lāu-pē ū pí pa̍t-lâng tī khah hó ê tē-uī ê sî, i chiū siūⁿ kóng, iā tio̍h uī-tio̍h lāu-pē ê bêng-ū...... só͘-í chiū koh ná ke-thiⁿ gín-ná ê hū-tam. Chhin-chhiūⁿ án-ni, gín-ná tio̍h uī-tio̍h pē-bó ê bêng-ū lâi hi-seng, siū kan-khó͘.
Chit-ê sī ēng gín-ná chò khì-khū, siūⁿ ài beh tuì chit-ê lâi tit-tio̍h pún-sin ê boán-chiok, só͘-í gín-ná siông-siông sī chò in ê lô͘-lē. In-uī sī án-ni, gín-ná ê sim chiū ná siok-siáu, chiū chū-jiân ē bô oa̍h-khì, iā m̄-nā kan-ta bô ài tha̍k-chheh nā-tiāⁿ, soà ū kiaⁿ-hiâⁿ ê sim.
2. Gín-ná ê li̍p-tiûⁿ (子供の立場)
Gín-ná in-uī m̄-chai tio̍h cháiⁿ-iūⁿ lâi piáu-bêng i ê li̍p-tiûⁿ, só͘-í kan-ta tiām-tiām, sui-jiân siū chek-pī, iáu-kú thun lún lâi sūn-chiông. Chóng-sī chit ê sūn-chiông bô kú-tn̂g, tek-khak nā kàu hit ê sî, chiū ē po̍k-hoat i ê ut-hún (鬱憤), khí hui-siông ê hoán-khòng khí-lâi.
Gín-ná ê hoán-khòng, khah chē sī uī-tio̍h i ê pē-bó ê bô lí-kái ê iau-kiû, uī-tio̍h in pún-sin ê boán-chiok lâi kiông-pek gín-ná, gín-ná in-uī i ê chū-iû siū pē-bú sok-pa̍k, só͘-í chiū ēng hoán-khòng lâi hêng pē-bó. Chit ê chāi-tī gín-ná sī chin khó͘-thàng, chin put-hēng ê sū, chóng-sī chāi-tī pē-bó, iû-goân iā sī bô chi̍t-hāng pí chit ê khah put-hēng.
Lán eng-kai tio̍h chai gín-ná ū gín-ná ê li̍p-tiûⁿ. Gín-ná nā bô oân-pī sian-thian-tek ê tiâu-kiāⁿ, kap hō͘-thian-tek tiâu-kiāⁿ, chiū bē-ē thang tit-tio̍h tha̍k-chheh ê hāu-lêng.
Kó͘-chá, pē-bó chò gín-ná ê sî-tāi sū-chêng, kap hiān-kim ê sū-chêng, ū toā ê cheng-chha ti-teh. Só͘-í gín-ná bē-ē thang chhin-chhiūⁿ pē-bó ê gín-ná sî-tāi ê khoán. Ū sio̍k-gú kóng," Liông i chi chú, sú û pēng" (良醫之子死於病. Kok-gú sī kóng, 醫者の不養生). Chò i-seng ê lâng iā ū-sî bat tuì pún-sin á-sī kiáⁿ-jî lâi chhòng chhò-gō͘ ê pó-kiān-hoat (保健法), chhin-chhiūⁿ án-ni, kàu-io̍k-ka iā ē ū-sî chhò-gō͘ lâi kàu-io̍k i ê gín-ná. Tāi-khài lóng sī sîn-keng koè-bín," chhiâu ti̍t gû-kak phah-sí gû," chit-khoán ê khoat-hām, hoán-tńg ē-thang kheng-hun--ê sī tī gín-ná hit pêng. Só͘-í tī chit tiám, lán tio̍h chin chù-ì, tio̍h lī-khui chū-kí tiong-sim, chiong pún-sin khǹg tī gín-ná ê li̍p-tiûⁿ lâi siūⁿ, chiah ē ēng-tit.
3. Chin-si̍t ê lí-kái (真實なる理解)
Nā beh tuì gín-ná kî-thāi sím-mi̍h, eng-kai tio̍h tāi-seng lí-kái gín-ná ê chin-siòng (真相), chiah ē ēng-tit.
(1) Sian-thian-tek sèng-sò͘ (先天的素質)
Eng-kai tio̍h tāi-seng siūⁿ khoàⁿ tuì pē-bó só͘ sêng-siū ê lêng-le̍k sī sím-mi̍h khoán. Nā-sī pē-bó hó phín-hēng, seng-oa̍h ū chèng-keng, chiū phah-sǹg siū hó ê sèng-sò͘ ê uî-thoân, chóng-sī nā siat-sú put-hēng, tì-kàu ū sèng-pēⁿ (性病) lâi kóng, chiū phah-sǹg in ê kiáⁿ-jî ê chin siòng siū siong-hāi, sim-sîn jio̍k-thé lóng chin loán-jio̍k ê chin siòng.
(Boē oân)
