Chiok Sèng-hui Tiúⁿ-ló êng-jīm Chō͘-ia̍h

(Chiam--sī Chhin)

(Phoaⁿ Bûn-tek)

194001 658 hō p.16-16

1. Sèng-hui Tiúⁿ-ló seng Chō͘-ia̍h, Siōng-tè un-sù chin kàu-gia̍h, Kiám-chhái ū lâng beh ba̍k-chhiah, Nā-sī goán lóng chin kám-siā.

2. Tâng-cho̍k thiaⁿ-tio̍h sim hoaⁿ-hí, Tuì sim-té kóng chin kiong-hí, Kan-ta khiàm beh hoah Bān-jāi, ún-tàng Tiúⁿ-ló lí iā chai.

3. Sèng-hui Tiúⁿ-ló ê chò lâng, giân-hēng kú-tōng sim saⁿ-tâng, Hoē-lāi hoē-goā hó miâ-siaⁿ, En̂g-kng Siōng-tè sèng chun-miâ.

4. Goán taⁿ chi̍t-chê lâi chiok-hō, O-ló Tiúⁿ-ló ê seng-ko, Khún-kiû Sèng-sîn toā pang-chān, Hō͘-lí it-hoat gâu chò-lâng.

5. Chhú-khì it-hoat kian-kò͘ sìn, Sèng-tō chin-lí choè chún-chîn, Sè-kan iú-he̍k ná háu-sai, Bāng lí khîⁿ-tiâu Chú khiā-chāi.

6. Só͘-chò sū-sū chin heng-thong, M̄-kiaⁿ sím-mi̍h ê chok-lōng, In-uī Sèng-kang ū bêng-kóng, oá-khò Chú lí chiū sêng-kong.

7. Goān Chú sù-hok kàng-lo̍h lâi, Sù lí tì-huī kap kháu-châi, Í-ki̍p Sèng Sîn ê lêng-le̍k, En̂g-kng Chú mâi kàu toē-ke̍k.

*    *    *    *    *

1. Kim-ji̍t tāi-ke toā hoaⁿ-hí, Choê kàu chhú-chhù kèng-chiok i, Sin-jīm Chō͘-ia̍h Sèng-hui kun, Châi, tì, chiâu-chn̂g ū ha̍k-būn.

2. Tāi-ke hoaⁿ-hí toā hoaⁿ-hí, Kūn-lāi chèng-lâng toā kiaⁿ-gî, Chō͘-ia̍h koân-uī lán the̍h--lâi, Siōng-si ba̍k-chiu chin-chiàⁿ lāi.

3. Chō͘-ia̍h hú-tē O͘-gû-lân, Chng-bîn m̄-bián koh kan-lân, I ê chò lâng chin toā-liōng, Bān-sū kap i hó chham-siông.

4. Lán ê Chō͘-ia̍h sī sèⁿ Phoaⁿ, Chheng-liân! m̄-thang ài pîn-toāⁿ, Ò-chhoan miâ-siaⁿ teh hián-hiān, o̍h i hùn-chì kiâⁿ bô siān.

5. Kiong-hí, kiong-hí, chīn kiong-hí! Goān Chú sî-siông khoàⁿ-kò͘ lí!! Un-tián sù-hok moá ke-lāi, En̂g-koaⁿ hián-chit kàu tāi-tāi!!!