Lán ê Sîn Ha̍k-hāu
194001 658hō p.16-17
Chit-tia̍p nā lâi hoê-sióng kū-nî (1939) só͘ keng-koè ê sū, si̍t-chāi tio̍h kám-siā Siōng-tè. I ū siúⁿ-sù pó-hō͘ kap chí tō ê in-tián, só͘-í chē-chē lâng iû-goân thang tī-chia chún-pī, thang hōng-sū lán ê kàu-hoē. Tī 3 goe̍h ū 4 ê ha̍k-seng chut-gia̍p: Kàu-io̍k-khò ê tông-kio̍k ū hó-ì lâi hù-sek; koh ū chē-chē lâng-kheh. ǹg-bāng in 4 ê chí-ū oá-khò Siōng-tè chò-kang, iû-goân ē chiap-soà in tī ha̍k-hāu só͘ thàn hó ê si̍p-koàn. Goán thè in kî-tó, ǹg-bāng in beh chīn pháu-cháu ê lō͘-chām,lâi siú só͘ sìn ê tō-lí; in-uī lán chai liáu-āu ū gī ê bián-liû kā in pī-pān hē-teh. Chiū-sī Chú beh hō͘ in, m̄-nā hō͘ in, iā beh hō͘ kìⁿ-nā him-bō͘ Chú hián-hiān ê lâng.
Chut-gia̍p-sek liáu-āu, Hāu-tiúⁿ kap Boán Bo̍k-su-niû ū tò-tńg khì Eng-kok hioh-khùn. Boán Bo̍k-su tī-teh ê sî, ha̍k-hāu ū chiām-chiām chìn-pō͘, tāi-ke teh ǹg-bāng i bô loā kú ē koh lâi. Sì goe̍h ū 4 ê ha̍k-seng ji̍p-o̍h: (Tân Hi-jîn, Koeh Tong-êng, Lâu Chuí-éng, Tiuⁿ Sūn-thàn); só͘-í chím-má lóng-chóng ū 16 ê. Joa̍h-thiⁿ-sî in lóng sì-soàⁿ, chi̍t nn̄g goe̍h ji̍t kú uī-tio̍h kàu-hoē chò-kang. Ha̍k-kî ê tiong-kan in ta̍k lé-pài-ji̍t tī kuí-nā só͘-chāi lâi kà Chú-ji̍t- o̍h, chú-lí lé-pài téng-téng. Kî-tiong nn̄g ê tī Tiong-o̍h nn̄g keng ê siok-sià teh tam-tng sià-kam ê chit-hūn, ǹg-bāng ē ín-chhoā hiah ê ha̍k-seng thang khah chai-bat Iâ-so͘. Káu goe̍h Kiong-loē Chiong (宮內彰) Sian-siⁿ ū tuì Bûn-su (門司) lâi chò ha̍k-hāu sin ê kàu-siū; sī in-uī Tiân-tiong (田中) Sian-siⁿ siū Tâi-lâm Ji̍t Ki Kàu-hoē ê phèng-chhiáⁿ khì chò in ê bo̍k-su. Tiân-tiong Sian-siⁿ ū chò-kang chin hó, ia̍h put-sî kap tāi-ke ū hó kám-chêng. Kiong-loē Sian-siⁿ í-keng piáu-chhut tông-chêng ê sim kap hó ê châi-lêng. Iûⁿ Sū-ióng Bo̍k-su kap N̂g Chú-gī Sian-siⁿ, m̄-tān-nā chīn-tiong lâi chiâⁿ in ê pún-hūn, iā uī-tio̍h pún hāu ū gâu siūⁿ, gâu chhut-la̍t, só͘-í tuì kuí-nā ê hong-biān lâi khoàⁿ, thang kóng Sîn-ha̍k-hāu ū chìn-pō͘. Kuí-nā uī ê káng-su, bô lūn sī loē-tē lâng á-sī pún-tó lâng, ū tàu pang-chān. Sin ê su-kì chiū-sī Siau Eng-chhiong sàng. Tāi-hoē só͘ phài ê Lí-sū-hoē ū nn̄g-saⁿ pái bat chū-chi̍p, gâu thé-thiap ha̍k-hāu, hoaⁿ-hí saⁿ chham-siông gī-àn, hō͘ pún-hāu tit-tio̍h toā-toā ê lī-ek.
Chē-chē tông-hoē, chi-hoē ū thè lán Sîn-ha̍k-hāu kî-tó, chhut pó͘-chō͘ kim, chin kám-siā. ǹg-bāng Siōng-tè iû-goân chiok-hok goán kin-nî só͘ tio̍h chò ê kang-chok. Sui-jiân tang-iûⁿ, se-iûⁿ lóng ū chē-chē khoán ê chhiⁿ-chhám,ǹg-bāng ū kèng-khiân ê lâng hoaⁿ-hí uī-tio̍h pún-hāu lâi kî-tó Siōng-tè, lâi tàu pang-chān kàu-hoē chit ê chin iàu-kín ê ki-koan. Kin-nî (1940) 4 goe̍h chhe, beh khui sin ê ha̍k-nî. Tho̍k-chiá nā chai-bat tú-hó ê lâng (chiū-sī Tiong-ha̍k chut-gia̍p, á-sī tâng-téng ê thêng-tō͘), ài hiàn ka-tī chò Chú ê kang, lâi tam-tng thoân-tō ê chit-bū kap te̍k-koân, chhiáⁿ lí kó͘-chhui hit ê lâng khah kín lâi chhut i ê miâ hō͘ goán chai.
Sîn-ha̍k-hāu Lí-sū-hoē: Tēⁿ Khe-phoàn Hāu-tiúⁿ sū-bū chhú-kip: Hi Lé-tì.
