Sìn-gióng Bí-tâm
Chhiah-bé chek
(An-pîn-seng kì)
194002 659 hō p.6-7
(Chiap chiaⁿ-goe̍h tē 5 bīn)
9. Chut-gia̍p thoân-tō. Kiù-chú 1892 nî, chhun-kuì tuì Tâi-lâm Sîn Ha̍k-hāu chut-gia̍p, siū Kàu-sū-hoē phài lâi toà Giâm-chêng ê kàu-hoē. Che sī i chêng bat toà chia kà Sió-o̍h, tāi-ke se̍k-sāi, kiam koán Koan-á-niá, Pe̍h-hô ê kàu-hoē, án-ni sī chi̍t lâng koán 3 ê kàu-hoē. Tī hit-nî chiū kap Gô͘--s7 Boé kiat-hun, lâi chiâⁿ oân-boán ê ka-têng. Tī chia chāi-khîn 4 nî kú.
Kàu-sū-hoē chiū bēng-lēng i, tio̍h choán-khîn khì Phêⁿ-ô͘ Má-kong ê kàu-hoē.
Hit-sî Ji̍t Chheng chiàn-cheng, Chheng-tiâu tāi-pāi, chiong Tâi-oân kat-jiōng hō͘ Ji̍t-pún. Hông-kun í-keng chiàm-niá Phêⁿ-ô͘ Má-kong, Chheng-tiâu ê Sū-lēng-koaⁿ Lâu Eńg-hok, chiong Tâi-oân kái chò Bîn-chú-kok, iā hoat-hêng choá-phiò, beh kap Hông-kun khòng-chiàn. Tâi-oân ê káng-kháu lóng ū Lâu Eńg-hok ê peng pé-siú.
Chhiah-bé chek beh tuì Tang-chio̍h káng chē chûn koè Phêⁿ-ô͘. Kàu-uī ji̍t beh lo̍h hái lah! Lâu Eńg-hok ê peng mn̄g kóng, "Lí beh khì tó-uī." ìn,"beh khì Phêⁿ-ô͘ thoân tō-lí." Peng chiū kóng, "Hiān-sî Phêⁿ-ô͘ í-keng hō͘ Ji̍t-pún peng chiàm-niá. Goán ê kun beh kap in koat-chiàn. Lí káⁿ sī Ji̍t-pún kun ê thàm-cheng, ji̍p-kàu lâng hoat-le̍k to-toan, si̍t-chāi chin khó-o͘N3." Suî-sî chiū kā i kiám-cha hêng-lí. Hit-sî Pa khek-lé Bo̍k-su, ū kià kuí-nā tiuⁿ phoe beh hō͘ Ji̍t-pún ê kun-koaⁿ, in-uī kuí-uī kun-koaⁿ sī sìn-chiá, Pa Bo̍k-su bat in, sī beh kā in chhéng-an. Kai-chài tit-tio̍h Siōng-tè ê pì-iū, tāi-seng ē hiáu chiong phoe khǹg tī piáⁿ-siuⁿ-lāi, Lâu Eńg-hok ê peng chhiau bô tio̍h, nā hō͘ chhiau-tio̍h, ún-tàng ē tú-tio̍h chhèng-sat. Sui-jiân chhiau bô chèng-kù, iā m̄-chún i khì Phêⁿ-ô͘. Toà hia kuí-nā ji̍t, Pa Bo̍k-su siá phoe kiò i tuì An-pêng-káng khah hó. Hit-sî lō͘-tiong ê thó͘-huí chin chhiong-sēng, chhah si̍t iā lân poe. Chhiah-bé chek chiū chiong hêng-lí, ká chong chò bē chheh ê lâng, pek-chhiat kî-tó, kai-chài pêng-an kàu Tâi-lâm. Tuì Tâi-lâm chē chûn kàu An-pêng, Koeh iām sái chûn, tô͘-tiong tú-tio̍h Lâu Eńg-hok ê peng, teh cha-mn̄g, Koeh iām toā siaⁿ kóng, beh khì An-pêng, Koeh iām sī tong-sî kûn-thâu choè ko-siōng, chin ū la̍t, lâng-lâng bat i. Kàu An-pêng thiⁿ o͘ tē àm, chhoē bô chûn thang koè Phêⁿ-ô͘, in-uī chûn lóng siū Lâu Eńg-hok ê peng kìm-chí. Kai-chài chhoē-tio̍h bó͘ chûn, chiū lī-khui Tâi-oân. Hái-tiong tú-tio̍h toā-hong, tī chûn-lāi sì mê sì ji̍t, sin-khu koh jiám-tio̍h tāng-pēⁿ, chin sī guî-hiám. Kai-chài tit-tio̍h Siōng-tè pì-iū bô sū siōng-lio̍k.
Bêng-tî 28 nî 6 goe̍h 4 ji̍t kàu Má-kong kàu-hoē, hoē-iú chū-chi̍p tī pài-tn̂g tāi-ke hoaⁿ-hí kám-siā Siōng-tè.
Bêng-tì 28 nî, kū-le̍k 2 goe̍h kan, Hông-kun chiàm-niá Phêⁿ-ô͘, pài-tn̂g kun-tuī teh sú-iōng. āu-lâi ū kun-koaⁿ kuí-nā lâng, sī jia̍t-sim ê sìn-chiá, cha-mn̄g ū pài-tn̂g bô? Lâng kā in kóng, i chiū bēng-lēng, tio̍h chhian-soá khì pa̍t-uī, chiong pài-tn̂g piàⁿ hō͘ chheng-khì, siau-to̍k, thó í-toh, pâi-lia̍t hó-sè, iā hiàn-kim chò kàu-hoē ê huì-iōng, siông-siông chū-chi̍p lé-pài, lâi pài-tn̂g o̍h Tâi-oân-oē, gâu pó-hō͘ sìn-chiá, hó khoán-thāi thoân-kàu-chiá. Chhiah-bé chek tī chia chò Siōng-tè ê kang, sim sī chin pêng-an, chai Ji̍t-pún ê kun-tuī chin ū tia̍t-sū, giâm-siú kun-lu̍t, hó khoán-thāi peh-sèⁿ. Só͘-í Phêⁿ-ô͘ ê jîn-bîn, tāi-ke chin pêng-an koè-ji̍t.
＊ ＊ ＊ ＊
Ū liû-thoân kóng Chú Iâ-so͘ kap ha̍k-seng beh lī-khui bó͘ hiuⁿ-siā ê sî, tī hit ê kháu-bīn ū khoàⁿ-kìⁿ kui-tīn lâng uî-teh khoàⁿ chi̍t-chiah sí ê káu. Chèng-lâng khah chē lóng phīⁿ am-teh, kí-kí tu̍h-tu̍h teh kóng-khí hit chiah sí-káu pháiⁿ khoàⁿ ê hêng-thé. Chóng-sī lán ê Chú Iâ-so͘ chi̍t-ē oá-khì khoàⁿ, chiū kan-ta kóng,"Chin-chu pó-ge̍k sī m̄-ta̍t-tio̍h i ê chhuì-khí ê pe̍h."
Tuì I kóng chit kù oē hō͘ lán chai, Chú só͘ chù-ba̍k--ê sī kap chèng-lâng bô siāng khoán. I tuì lâng ê khoàⁿ-hoat ia̍h sī án-ni. Sī tāi-seng khoàⁿ lâng ê hó-chhù, suí ê tiám.
(Boē-oân).
