II. Sìn-tô͘ hêng-uî Koa

Chháu-tun: Loā Kang

1940.02 659 hō p.17-18

1. Goá siá sìn-tô͘ hêng-uî koa,

Chē chē sìn Chú bô piàn-oāⁿ,

Hêng-uî kiaⁿ lâng chin pháiⁿ khoàⁿ,

Sī bô Sèng Sîn tī sim-koaⁿ.

2. Lán chò Ki-tok ê ha̍k-seng,

Sī ài ū hó ê phín-hēng,

Giân-gú phín-hēng tio̍h toan-chèng,

Sū-sū sī ài chiàu Sèng-keng.

3. Khó-sioh ū-ê bô si̍t-chāi,

Lâi chhàng mô͘-kuí tī sim-lāi,

Hêng-uî iû-goân sī pháiⁿ-tāi,

Bû-ok put-chok lām-sám lâi.

4. Ū-ê chi̍t khoán tō-lí chiaⁿ,

Lâng nā khó͘-khǹg choan m̄ thiaⁿ,

Kóng i tō-lí loā chai-iáⁿ,

Pháiⁿ lō͘ chò i ti̍t-ti̍t kiâⁿ.

5. Kàu-hoē ū-ê bē chín-heng,

Ū-ê tian-tò sī khah léng,

Sī tuì sìn-tô͘ ū mâu-pēng,

Chò chhut chē-chē pháiⁿ hong-phêng.

6. Kīn-lâi kàu-hoē ài pò͘-tō,

Kóng sìn Ki-tok ē kái-chō,

Lâng ê pháiⁿ hēng ē pìⁿ hó,

Sìn Chú pháiⁿ-tāi chiū ē bô.

7. Chóng-sī lán nā pháiⁿ phín-hēng,

Chiū ē siū lâng ê phoe-phêng,

Bó͘ lâng to iā bô toan-chèng,

Siáⁿ lang to iā hiah khok hêng.

8. Sui-jiân kóng kàu chin phah-piàⁿ,

Chhut chīn khuì-la̍t toā sè siaⁿ,

Lán ê kiâⁿ-chò nā bô iáⁿ,

óng-huì pò͘-tō ê kang-tiâⁿ.

9. Kàu-hoē nā beh tit ho̍k-heng,

Goā tio̍h pò͘-tō toā chhut-cheng,

Lāi tio̍h phín-hēng toā siu-chéng,

Kiōng-tông hia̍p-le̍k bān-sū sêng.

10. Sìn-tô͘ ta̍k ji̍t tio̍h kéng-séng,

Put-sî kî-tó Chú bó thêng,

Kiám-tiám lán kiâⁿ ê phín-sèng,

Tio̍h hō͘ siā-hoē lâi hoan-gêng.