Tī Chú ê kha-thâu-u-ē

(Chiu Gô͘--sī Khêng-eng)

194002 659 hō p.19-20

  Lia̍t-uī chhin-ài ê hiaⁿ-tī chí-moē pêng-an. Goá ài siāu-kài chi̍t-pún chin pó-poè ê chheh hō͘ tāi-ke chai. Goá lóng m̄-chai ū chit-pún chiah-nih hó. Ū chi̍t-ji̍t, Phêⁿ Chheng-iok Sian-siⁿ ū the̍h goá só͘ chun-kèng ê Sun-tāi Sian-siⁿ só͘ tù ê "Tī Chú ê kha-thâu-u-ē" ê chheh lâi sàng goá. Goá chiū suî-sî kā i tha̍k, kám-kak boē-bat tha̍k-tio̍h chhin-chhiūⁿ chit-pún chheh chiah-nih hó, chiah-nih pó-poè. Sī Sun-tāi Sian-siⁿ pún-sin chē tī Chú ê kha-thâu-u-ē lâi mn̄g, Chú Iâ-so͘ chhin-sin teh ìn--ê. Siá liáu chin bêng, chin ha̍h tī hiān-tāi ê sî-sè kap su-siúⁿ. Goá lia̍h i chò goá ê sèⁿ-miā ê sèⁿ-miā, chin thiàⁿ i, tek-khak beh tha̍k i kàu goá ê chi̍t-sì-lâng chiah beh soah! Nā ū lâng iáu-boē bat tha̍k-tio̍h, chhiáⁿ lín koáⁿ-kín tuì Kong-pò-siā chù-bûn, chi̍t-pún sī 4 kak, iû-huì 3 chiam. Nā ū hiaⁿ-tī chí-moē chin ài tha̍k, iā chò bē kàu--ê, goán hoaⁿ-hí bé sàng i, á-sī ē kham-tit chhut chi̍t-poàⁿ chîⁿ (nn̄g-kak) ê lâng, chhiáⁿ lín iā bô sè-jī, lâi pò goán chai. Chhiáⁿ Bo̍k-su á-sī Thoân-tō Sian-siⁿ kó͘-bú hoē-iú bé khì tha̍k, soà thè goán tiau-cha kuí-ê ài tha̍k, chò bē kàu, á-sī ē-kham-tit chhut chi̍t-poàⁿ chîⁿ ê lâng. Chit-pún sī ē-kham-tit chheng-ho͘ chò Sèng-keng ê tē-jī pún, ta̍k lâng lóng tio̍h tha̍k i, iā tio̍h thiàⁿ i, iā tio̍h chin chun-kèng i, m̄-thang hō͘ gín-ná lap--tio̍h, á-sī chē--tio̍h, á-sī hāⁿ--tio̍h, lán ê Sèng-keng, Sèng-si mā sī án-ni. Goá bat chi̍t-pái bô tiuⁿ-tî kā i lap--tio̍h, àn-sǹg bô sím-mi̍h iàu-kín, Thiⁿ-pē ê Sîn suî-sî phah goá, hō͘ goá ê sim kah beh piak-li̍h, goá chiū koáⁿ-kín kuī--leh, kiû sià-bián. Tuì hit pái khí, kàu-taⁿ, goá ke-lāi ê gín-ná lóng ū iok-sok hō͘ in chin chù-ì, tuì Sèng-keng, Sèng-si m̄-thang hoān-tio̍h put-kèng ê choē.

  ēng chit kuí-jī lâi kiáu-jiáu tāi-ke, soà chhim-chhim pài-thok lín koáⁿ-kín bé khì tha̍k, m̄-thang iân-chhiân. Sî-kan chhin-chhiūⁿ chuí ti̍t-ti̍t lâu--khì, chi̍t-hoáⁿ koè saⁿ-tang, nn̄g-hoáⁿ koè chi̍t-sì-lâng. Lán ê lêng-hûn tio̍h thiàⁿ i, tio̍h hó khoán-thāi i, ū chiah-nih hó, chiah-nih pó-poè ê bí-niû tio̍h bé hō͘ i chia̍h, m̄-thang hiâm huì-khì, m̄-thang hiâm bô êng; lán teh thiàⁿ lán chit-ê ē sí, ē hiú-noā ê jio̍k-thé, lóng bô hiâm kan-khó͘, lóng bô hiâm huì-khì, ta̍k-ji̍t koāⁿ lâu moá-bīn, iā sī uī-tio̍h i, ài i ē ióng, chia̍h tn̂g-miā, tī chit ê ù-oè ê sè-kan, thiàⁿ i kàu án-ni. Chi̍t ji̍t tio̍h poah-kang hō͘ i chia̍h saⁿ-tǹg, hô-hòng chit ê bē sí, éng-oán put-bia̍t ê lêng-hûn, kiám m̄-tio̍h koh-khah thiàⁿ i mah!!! Nā bē thang chiàu saⁿ-tǹg hō͘ i chia̍h, iā tio̍h hō͘ i chia̍h nn̄g-tǹg á-sī chi̍t-tǹg, nā bô, chiong-lâi i nā sí-khì m̄-káⁿ khì kìⁿ Thiⁿ-pē chû-ài ê bīn, hit-sî i beh oàn-hīn lí, iā chit ê choē beh kui sím-mi̍h lâng ah! Kiám m̄ sī kui lí kap goá mah? Só͘-í thàn lán iáu tī chit sè-kan chit-sî, lán tio̍h thiàⁿ-sioh i, tio̍h hó khoán-thāi i, tio̍h hō͘ i chia̍h, hō͘ i lim, hō͘ i chhoán-khuì (chiū-sī ta̍k-ji̍t tio̍h poah-kang tha̍k Sèng-keng, tio̍h kî-tó, tio̍h ka-têng lé-pài, m̄-thang hut-lio̍k, nā ū sio̍k tī Sîn-lêng-kài ê chheh, tio̍h bé khì tha̍k), m̄-thang oàn i, m̄-thang pháiⁿ khoán-thāi i.

  Goān tāi-ke tio̍h thiàⁿ lí ê lêng-hûn kàu éng-oán! A-men.

高雄市苓雅區四三，一六五

周吳氏瓊英