II. Ka-tiong Thoân-kàu-su Sòng-pia̍t-hoē
Niû Siù-tek pò.
194003 660 hō p.16-17
Tī Sin-le̍k 2 goe̍h 9 hō, (Kū-le̍k 1 goe̍h 2 ji̍t téng-po͘ 11 tiám khí, ū khui Thoân-kàu-su Sòng-pia̍t-hoē tī Táu-la̍k Lé-pài-tn̂g. In-uī ū 4 miâ sian-siⁿ beh lī-khui Ka-gī Tiong-hoē, chiū-sī Phoaⁿ kim-seng, Lâu Hoa-gī, Gô͘ Tek-goân, Khó͘ Ek-chhiau. Chin khó-sioh Phoaⁿ Bo̍k-su kap khó͘ Sian-siⁿ, in-uī to͘-ha̍p-siōng, hit ji̍t bô chhut-se̍k. Chit 4 ê sian-siⁿ toà tī Ka-gī Tiong-hoē ê siāng-kú ê, chiū-sī Gô͘ Sian-siⁿ, ū 15 nî kú, tuì boē hun Tiong-hoē í-lâi, chiū saⁿ-kap phah-piàⁿ, uī-tio̍h Siōng-tè ê kàu-hoē, Nā lūn i ê kong-lô, si̍t-chāi tio̍h toā-toā kā i siúⁿ. I beh lī-khui, goán ê sim chin m̄-kam. Chóng-sī uī-tio̍h i ê to͘-ha̍p, ko͘-put-chiong m̄-káⁿ bán-liû. Lâu Sian-siⁿ toà 5 nî, i iā-sī chin oa̍h-tāng, bô lūn i toà ê kàu-hoē á-sī kong ê khang-khoè, i bô the-sî, chin hoaⁿ-hí chò. Te̍k-pia̍t tuì Chú-ji̍t-o̍h, i chin ū si̍t-tē-tek ê te̍k-tiông, i beh lī-khui, hō͘ goán kám-kak khah bô phoāⁿ, si̍t-chāi chin m̄-ài. Phoaⁿ Bo̍k-su kap Khó͘ Sian-siⁿ, sui-jiân toà bô loā-kú, iáu-kú iā-sī chhut-la̍t chò kang ê sian-siⁿ, lóng sī iú-uî ê jîn-bu̍t, taⁿ beh lī-khui, boē bián-tit lâu m̄-kam ê ba̍k-sái. Tī hit chi̍t-ji̍t m̄ ēng tām-po̍h tê-piáⁿ, lâi kóng-khí lī-pia̍t ê oē. Taⁿ goán tāi-ke tâng-sim thiàⁿ in, khún-kiû Chú chiok-hok in ê chiân-tô͘, hō͘ in thiat-thâu thiat-bí uī Chú hi-seng, soà goān in ta̍k lâng ê sim-sîn kap jio̍k-thé tit Chú ê si-in ióng-kiāⁿ. Soah-boé tāi-ke gîm Sòng-pia̍t-si, chhiáⁿ Iûⁿ Chiau-gī Bo̍k-su kî-tó soàⁿ-hoē.
Chēng ū Ka-gī Tiong-hoē í-lâi, m̄-bat khui chit ê hoē, che sī thâu-chi̍t-pái, goá kám-kak chin ū ì-gī. Só͘-í kèng-pit siá kuí kù, lâi pò tāi-ke chai.
