I-īⁿ Thong-sìn

Tâi-lâm Sin-lâu Pēⁿ-īⁿ

Iûⁿ Hûn-liông

194003 660 hō p.20-20

  Kám-siā Siōng Chú ê in-tián, chiàu-kò͘ pēⁿ-īⁿ keng-koè 4 nî goā kú chin-sūn-sū. Koh-chài siū-tio̍h bû-siōng ê kong-êng, chiū-sī tī 2 goe̍h 11 ji̍t (Hông-kí 2600 nî ê Kí-goân-chiat) ngó͘-chêng 10 tiám 40 hun, chāi Ti-sū kong-sek (知事公室) ū kú-hêng Gū-hā-sù kīm (御下賜金) ê thoân-ta̍t-sek, lán Pēⁿ-īⁿ ū koh tit-tio̍h in-sù, goá ū pài-siū Gū-hā-sù kim chi̍t-hong, si̍t-chāi chì-ke̍k ê kong-êng, iā kám-kak chin khióng-siok ê só͘-chāi, tuì sim-té chin toā kám-siā Hông-in (皇恩) phó͘-piàn kàu tī lán, hō͘ lán koh-khah tio̍h hùn-lē ló͘-le̍k, hō͘ chit ê hó ê sū-gia̍p koh-khah iú ì-gī ê chìn-pō͘ hoat-ta̍t, thang pò-tap Hông-in bān-hūn ê chi̍t hūn. Chit hō in-sù chū Tāi-hoē sêng-chiap í-lâi, ta̍k nî ū tit-tio̍h.

  Koh chi̍t ê hoaⁿ-hí ê siau-sit, chiū-sī siāng ji̍t tī Chhī-ia̍h-só͘ iā ū tit-tio̍h Chiu-ti-sū kok-hā (州知事閣下) ê chióng-lē-kim, chhim-chhim kam-siā bô soah. Taⁿ koh-khah tio̍h kak-gō͘ koat-sim lâi chiân-chìn chìn-chuī (盡瘁) tī lán ê sū-gia̍p, toā ǹg-bāng tāi-ke koh-khah tâng-sim hia̍p-le̍k, m̄-thang ko͘-hū só͘ siū ê in-tián.