首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 故梅監務牧師ê小傳
故梅監務牧師ê小傳
卷期：第664號 本次： 日期：1940/7 刊名：台灣教會公報 頁數：9
篇名：故梅監務牧師ê小傳 [ Kò͘ Muî Kam-bū Bo̍k-su ê Sió-toān ]
作者：林學恭 Lîm Ha̍k-kiong
  顯示 : 漢羅 全羅 並列  

故梅監務牧師的小傳
1940.07 第664號 p.9-12
(斗六：林學恭)
    幾日前，忽然間聽著我所數念的老朋友梅監務牧師離開世間。心真艱苦。有人愛我公佈予人通數念--伊。我也不止意愛。可惜袂通寫真詳細。較要緊，將伊佇台灣的事，照我所知--的，記淡薄，向望會通佮列位相佮數念--伊。
1. 青年的時到獻身
牧師出世佮長成佇敬虔的蘇格蘭。讀格拉斯高的大學，勤勤勉強，成績優秀，常常做大學優等生的代表佇學界討論。
到大學卒業了，心立志愛做宣教師去外國傳道。總是時機未到，就暫時佇本國的教會做工。
有一暝昏，去赴一个宣教師的講演會，講起宣道會的欠工。這个宣教師，就是佇台灣傳道的巴克禮牧師。聽伊講起台灣海嶼的消息，心受感激。講演後，佮巴牧師相佮坐，得著巴牧師的勸友。後來得著上帝的攝理，佮巴牧師對宣道會的周旋，就決心獻身做台灣的宣教師。
2. 離開本國來台
決心了後，毋敢共伊的老母講，因為驚了老母煩惱，受伊阻擋，到欲出發的時，才對老母講，老母果然傷心大啼哭。牧師疼主較過頭疼老母，心無受搖動，用濟濟話安慰伊的老母。就按呢離別老母、親戚、朋友佮鄉里，落船。
Siāng彼隻船，其他猶有兩人同時志願猶原欲來台灣的宣教師，就是蘭大衛醫生佮連德烈牧師。受主庇佑，三人佇明治28年（A. D. 1895年），12月18日，對台南安平港平安上陸。暫時蹛佇台南新樓，對林燕臣先生學台灣的土腔。
3. 在台宣教
到明治29年尾（A. D. 1896年），就徙來蹛彰化西門家226番地。彼時猶未有醫館，只有稅兩khám店teh做禮拜的所在。禮拜日3、40人teh禮拜若定。漸時用這兩khám做行醫，說教的路用，後來才設法換位。
明治32年正月，梅牧師去澎湖，頭一擺佮我相捌，做伙佈道做工幾若禮拜；後來倒轉來彰化佮蘭醫生參詳，寫批予教士會，請in換澎湖林學恭來彰化，得著教士會的指示，彼年3月初，我就換來蹛彰化。對彼霎了後，佮伊相佮做工，得著伊的疼痛、指導，受伊的感化勉勵。相佮佈道20年久，經過幾若百庄，攏總設十間的教會。
今將這中間，我受感激--的，大略講4項佇下底：
（1） 伊的佈道佮設教。論伊的佈道的事，我有濟濟通數念，總是袂通一一來寫。愛看幾若點。
看伊的殷勤。若無出外，佇彰化就拜一到拜六，逐e晡4點起，佇市場內佈道。若出外去庄社，是早早出，暗暗入，真正是披星戴月的殷勤。無分寒熱，無論遠近；我佮伊出去，罕得兩人做伙講，攏是伊佇這庄講，我就去別庄摃鑼，招人來聽，人若聚集，我就佇遐講，伊看我teh講，無扑損時間，閣過庄佇遐講。到晝，簡單食餅配茶，中晝無掛歇睏，就閣接紲。親像這款的殷勤，毋是我的筆形容有過頭，設使去較遠的所在，就用一个庄社做根據地，對遐逐日出去近附的埠頭做工，到拜六才轉來彰化。
閣看伊的吞忍艱苦枵、喙礁、無眠、le̍k-lō͘、厭siān遮的伊攏歡喜吞忍。當時交通不便，濟濟是步行，一日行幾若鋪路去佈道是常常。有一暝昏佇溪湖佈道好機會，半暝11點外才散會，姑不將著佇遐隔暝；若是無當歇暝，佳哉得著一个食鴉片薰人，名做「卿叔」，伊好意，彼暝昏阮兩人相佮睏一个桌櫃3尺闊，ka-chiah相並隔一暝，甚至捌佇南投相佮歇一間販仔間，目蝨毋捌咬著西洋人，彼暝昏予目蝨共不止傷重，也是吞忍。無論得時不得時，受毀謗也忍受。親像按呢 的做工，上帝看顧--伊，不止有效果。
有一日，阮佇彰化的廟口teh佈道，拄有一个老人欲來燒金，聽著梅牧師teh講道理，受感動，立刻反悔信主，以後熱心佈道，救人濟濟。人捌流傳講：「6日賣茶箍，7日講耶穌，」就是這个人，伊的名叫做「老進伯」，後來做長老。
閣一人名陳來全，蹛大肚，欲來市場買物聽牧師講道理，也來反悔入教會，紲當長老。
逐所在iā種子，了後就設教會。當時物價俗，伊若看有幾口灶來信主，就稅一khám店做拜堂，請傳道蹛遐，代先予會友負擔幾月日的厝稅（當時一月日2、3箍銀），後來予in負擔幾月日的月俸（當時一月日6箍）。予in那學行，按呢設教會，佈道20年久，設10間的教會。
我捌問伊：「你按怎遮熱心佈道，是甚乜因端？」伊講：「因為我讀聖經按呢講：『信的人永遠活，毋信的人永遠死。』 記然知按呢，毋甘無拯救人，來予人永遠死。」 咱未捌看著保羅，猶過我佮伊做伙20冬久，親像佮保羅做伙。所以我講：「伊是台灣的保羅。」
（2）伊的款待人
對傳教的人。逐年夏季，就聚集台中區內的傳教師佇一所在開修養會，予傳教師得著修養佮濟濟靈性的好物。又閣gâu揣機會佇隱密的中間，體貼援助傳教家，親像大正5，6年，歐洲大戰當時，物價懸的時，伊為著傳教家，tháu伊的錢袋無少。
閣對一般信徒。一視同仁，無分貧賤富貴，不論臣商貴客，爺老 村童，溫柔恭敬，以禮相待。
（3）伊的過日佮慈善
伊毋是好過的人，本身不止樸素，穿插無好；伊的老母捌寄洋服來欲送伊穿，若是伊閣寄倒轉還老母，因為講伊若穿遐好，人欲親近--伊，無利便。伊所食，也是通俗。捌有一擺，主食的人共伊買一塊土魠魚，若是牧師嫌傷cheh-thoah ，叫主食--的著閣koāⁿ去還賣魚--的。親像按呢儉伊本身，將所得的薪水，用佇主的面前，獻予教會，抑是獻予至微細的一个。所做--的，濟濟毋是正手所會通知影--的。咱所知，親像獻4000外銀起彰化拜堂。其他清水、南投、草墩、二水、溪湖、屏東、斗六等等的拜堂抑是地，攏有伊慈善的緣故。
（4）伊的祈禱
伊是祈禱的聖者。不論做甚乜事誌，大到細，伊用祈禱來出發也用祈禱來收煞。佮伊出去佈道，著祈禱，轉來也祈禱。我去揣伊的時，常常拄著伊跪teh，就是teh祈禱。佇伊的桌頂有教會的名，也有傳教者的名佮會友的名，暝日看遐的名佇主的面前teh數念in。實在是祈禱的聖者。
4. 離開台灣歸國
以上所講彼款的做工，致到扑歹身體。最後佇大雅染著熱病（甚乜熱，醫生攏毋知），身體那袂堪得，就離開台灣，轉去本鄉；雖然身軀離開台灣，猶過心無離開，佇伊的眠床前有吊兩項物，時常teh數念伊的教會佮伊半生涯所奉獻的台灣，彼兩項物，一項就是「甘蔗kó」，閣一項就是伊佈道的時所teh用的號頭（喇叭）。對轉去到最近，大概兩月日，伊寄一張批來予我，每擺teh問台灣的教會，閣數念無煞。
伊雖然身體真荏，猶過真勉強，有著幾若本冊，或是講起古代的教會抑是教義的說明，不止好的冊。閣佇 1920年，受眾學者的選拔，去發表伊的論說，不止好名聲，siāng時受推薦，得著神學博士（D. D.）的學位。
5. 煞伊的著磨
主盡忠的奴僕。我親愛的朋友，主煞伊的著磨。佇 1940年2月28日，揀召伊入伊所備辦快樂的房間。照聖神所講：「煞伊的著磨來安歇，伊所做的工也帶伊」（啟示錄14：13）。
伊比我較有福氣，75年的出外，今代先我轉去父的家。我寫幾句數念伊。敬謹追悼。也願大家替梅牧師娘祈禱，予伊會得主的安慰。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461