Sèng-kù Kái-soat
Khó͘ Iú-châi
1941年1月 670期 8-9
"Bān-mi̍h tuì Tō lâi chhòng-chō; kìⁿ-nā siū chhòng-chō ê, bô chi̍t hāng m̄-sī tuì ; lāi chhòng-chō. oa̍h-miā tī I ê lāi-bīn; chit ê oa̍h-miā sī lâng ê kng."
4. Tō ("oē" ê kang-chok)
(1) I sī Chō-bu̍t-chú. Thiⁿ tē bān-mi̍h tuì I lâi chhòng-chō (chham-khoàⁿ Chim-giân 8:22─30). Chhòng-sè-kì tē 1 chiuⁿ iā ū kì-chài, Siōng-tè ū ēng I ê "oē" lâi chhòng-chō thiⁿ, tē, hái í-ki̍p bān-mi̍h. Chhin-chhiūⁿ "Siōng-tè kóng, tio̍h ū kng, chiū ū kng......" lóng sī ēng I ê chhuì só͘ chhut ê "oē" tuì bô lâi chhòng-chō ū. Só͘-í chit ê Tō("oē") chiū-sī Chō-bu̍t-chú. Chiū-sī kū ê sè-kài ê Chō-bu̍t-chú. M̄-nā án-ni kàu I chiâⁿ-chò jio̍k-thé lâi sè-kan, chiū-sī beh tuì chit ê tîm-lûn, hūn-tūn ê sè-kài chō chhut sin thiⁿ, sin tē(Khé 21:1). Tuì bô ǹg-bāng hō͘ lán ū ǹg-bāng, tuì bô gī hō͘ lán pe̍h-pe̍h tit-tio̍h chheng-chò gī, hō͘ lán têng-thâu-siⁿ lâi chò Siōng-tè ê kiáⁿ. Só͘-í I iā sī sin thiⁿ , sin tē, sin ê peh-sèⁿ ê Chhòng-chō-chiá, tuì bô lâi chhòng-chō ū ê Chú.
(2) I sī oa̍h-miā ê goân-thâu . Siōng-tè ēng I ê "oē" lâi chhòng-chō it-chhè, ū oa̍h-miā ê tōng-bu̍t, iā bēng-lēng in tio̍h siⁿ-thoàⁿ chē-chē(Chhòng 1:2,24,26) Sī oa̍h-miā ê pún-goân . Kàu I chiâⁿ-chò jio̍k-thé chò Iâ-so͘ Ki-tok liáu-āu, iā iû-goân chò oa̍h-miā ê pún-goân, beh hō͘ sìn I ê lâng , boē tîm-lûn oē tit-tio̍h éng-oán-oa̍h, chiap-la̍p I ê miâ ê lâng beh ū koân chiâⁿ-chò Siōng-tè ê kiáⁿ. In-uī oa̍h-miā sī tī I ê lāi-bīn só͘-í kìⁿ-nā sìn lâi kap I kiat-liân ê, beh ū hūn tī I ê oa̍h-miā(Iok-hān 1:12). Chit khoán ê oa̍h-miā m̄-sī chhin-chhiūⁿ tōng-bu̍t, hoe-chháu ê oa̍h-miā. iā m̄-sī tuì lâng ê ì-sù, á-sī tuì hiat-khì lâi siⁿ hit khoán ê oa̍h-miā , sī tuì Siōng-tè siⁿ--ê, Siōng-tè pún-sin só͘ ū hit khoán ê oa̍h-miā(Iok-hān 1:13,5:24).
(3) Chit ê Tō ("oē") sī lâng ê kng. Chhòng 1:3 kì-chài Siōng-tè ēng I ê "oē" kóng ū kng chiū ū kng. Chóng-sī m̄-nā lâng ê ba̍k-chiu só͘ khoàⁿ ē tio̍h ê kng sī tuì I lâi. iā sī jîn-luī le̍k-sú tiong ê kng. Put-lūn sím-mi̍h sî-tāi, sím-mi̍h só͘-chāi. Sui-sī choē-ok hoâiⁿ-hêng, put-chèng, put-gī chhiong-sēng, chhiong-moá siâ-ok o͘-àm ê sî, Siōng-tè ū hō͘ chit ê Tō ūn-hêng, lâi heng-khí sèng-jîn, sian-ti, sèng-tô͘, hó lâng, hó chèng-tī-ka, lâi kám-hoà, kiò-chhéⁿ, siat-hoat, tì-kàu hó-sū chèng-gī, kàu boé tek-sèng, ho̍k-tò kng-bêng. M̄-nā án-ni, chit ê Tō iā ū ūn-hêng tī ta̍k lâng ê sim-lāi, chò kng lâi chiò lâng ê liông-sim, hō͘ lâng chhín-gō͘, hoán-hoé, lī-khui pháiⁿ, lâi kui-chèng. iā hō͘ liông-sim kng-bêng ē hun-piat hó pháiⁿ thang soán-te̍k i. Chit ê Tō si̍t-chāi sī lâng ê kng. I ū chiâⁿ-chò jio̍k-thé lâi ji̍p sè-kan, beh chiò bān-lâng kiâⁿ tī oa̍h-miā ê lō͘. Hit-sî Iâ-so͘ ū kóng, "Goá sī sè-kan ê kng; toè goá ê lâng bô kiâⁿ tī àm, hoán-tńg beh ū oa̍h-miā ê kng" (Iok-hān 8:12). Chá-sî Iû-thài lâng ū toè hoé-thiāu , hûn-thiāu chhoā-ji̍p Ka-lâm tē. Lán Sin-iok ê peh-sèⁿ beh hō͘ Iâ-so͘ Ki-tok ê kng chiò, hō͘ I chhoā lán ji̍p tī Sin ê Ka-lâm-tē, chiū-sī Siōng-tè êng-kng, éng-oa̍h ê kok.
