首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 活命的燈
活命的燈
卷期：第670期 本次： 日期：1941/1 刊名：台灣教會公報 頁數：9-12
篇名：活命的燈 [ oa̍h-miā ê teng ]
作者：阮德輝 Ńg Tek-hui
  顯示 : 漢羅 全羅 並列  

活命的燈

阮德輝 譯

1941年1月 670期          9-12

 

  「半暝，有大聲叫講。新囝婿來lah；恁出來接伊」(馬太25：6)

我愛恁佇這个風琴前的壁召主耶穌所畫舊的圖。圖的正爿就是新娘的厝，伊佇遐teh等所疼的人；倒爿就是新囝婿的厝，也伊佇遐teh備辦欲去chhoā伊的新娘。也圖的中央就是棕樹的坑溝蔭影的所在。Tú好欲暗，新娘的朋友來到半路較ke，佇遮聚集欲迎接新囝婿。到更深的時「in攏tuh-ka-choē teh睏」。這是照本文字義tek 的解說。也時間直直過，差不多半暝星的光霧霧teh照地上的烏暗，忽然新囝婿對彎越的路出來，有伊的火把的光，也有伊的同伴出聲叫講，「看，新囝婿來lah！」也chiah 的在室女攏起來修整in 的燈。有的受隔壁親切共伊搖，你看in teh捻燈心，也put-peng in 的燈袂著。Taⁿ這个譬喻我所讀恁所聽的所在生起。看佇這張圖怎樣in teh行佇猶太的山野欲去新娘的厝，也in入去，門就關。遐的氣庄社買油--ê拍算買無。耶穌畫這个。真巧妙的圖。

對這張圖有2項真通驚的思想到佇我，─就是舊的過去佮少年的未來。彼个半暝teh叫--ê ，就是時間變遷的譬喻，咱叫做年尾佮年頭彼个喉叫到佇咱逐人的心。事實有的物已經過去，也袂通閣回復，就是現實的行為，也有路用的物猶留teh，就是向望佮計畫，機會。耶穌畫這張圖的時，伊用5个智識佮5个戇--ê來結聯這2項。5葩燈to̍h了-過去就是老佮死失；teh to̍h 的 5葩燈─未來就是向望佮猶少年。我徛佇遮對恁逐人講，設使5个智識佮5个戇--ê會通關連佇各人類來講─燈to̍h了佮燈猶會to̍h(teh著) ，佇我的生涯有的已經了lah；也有的猶會佇teh。

今暗愛咱來想這兩方面的圖。

I. 先想時間的一部分過了。燈火hoa去，365早起to̍h做黃昏暗的火hu，無人會通閣點予光。這日過了，無人通叫伊轉來，我愛買拜一，啥人會通賣我？設使我有錢親像山，我kiám會通買我舊--ê，第2手的月。彼个過了，袂通閣挽回lah；燈火to̍h了lah。

活命！你捌佇熱天對山頂注目看山坪。佇6月初草埔茂盛也真軟loán ，佇日中晝恬靜親像死去，也風忽然盤過山kha̍p著in 的時，in就tìm頭起湧。Taⁿ這个湧過去lah；草仔的振動細lah，無久草仔，樹枝的振動若細tiām-tiām親像死。親像按呢，咱的脈對囡仔到老漸漸細，囡仔的脈是140抑150 ，少年人是90抑100，大人是75抑80，老人拍算60。用你的手探看你的脈啥款，也彼个是會漸漸細佮衰弱到tiām去，這就是活命。

  1. 時間！怎樣時間teh走親像水對水瓶流出來的款。有囥一个舊年的曆日。正月不時是佇12月的後面，2月綴正月，也2月了有3月，3月有4月。總是你的兄弟有伊的正月，若是忽然著一驚，伊無有2月，你的親友有3月佮4月，也忽然著一驚，時間tiām去(指死去)。全世界袂通為著彼个朋友造出6月，7月，8月。時間的經過是啥意思？也時間的價值是啥貨？

有人講，「時間是錢」甚物意思？我教一點鐘的冊會通得著45，我頭一擺知影時間就是錢。Taⁿ好，佇今年恁有趁著錢抑無？恁有失落幾萬箍，恁有愛看無，彼个寫佇上帝的冊；「時間是錢，也恁的生活kiám無真濟浪費？」恁佇過去一年無得著甚物，只有真著磨，也佇逐方面失落，你徛佇今仔日講，雖然我有出力愛欲做真實的朋友，好的丈夫，對佇我的囡仔欲做端正真的老父，總是逐項事攏反對，我袂通la̍p我的數。我的厝的正爿遐有一個好額的生理人，伊佇今年囤貨起價趁5萬箍，也彼个寫佇上帝的冊，時間是錢；伊為著這个目的gâu利用時間，總是我浪費時間！毋是！咱拒絕這个。

有人講，「時間是欲予咱快樂」Ah，對佇恁有人時間有怎樣teh譏刺--恁。「一年了去lah，我佇外面無得著滿足，我的心神吐氣一年經過歸佇空空，我對喪失佮災難無幸福。今年佇艱苦的中間teh se̍h，365日過了，時日是欲予咱快樂，也我攏無幸福。」你有愛讀上帝的冊無？這毋是真實；設使是按呢，就咱是不幸的運命的犧牲者。

Taⁿ時間啥路用？佇遮有報咱知。「所以這霎就是受接納的時，也是拯救的日。」「恁著聖，親像上帝的聖，也佇恁做出外的中間行畏主來過日。」時間！就是永遠的門路。時間！就是人格說明的機會。時間！是試驗，照咱佇遮的生活，佇彼爿也是按呢的生活。所以家己出力服事上帝佮人造就合佇伊永遠袂敗壞的份額。「恁著揀」-佇時？「今仔日，」這个瞬間-「恁欲服侍啥人？設使上帝是主，綴伊；設使是pa-le̍k，綴伊。」

半暝有聲叫講，出來迎接伊。也有修整燈teh to̍h 的人，就是gâu利用時間--ê，會得入去，也無備辦--ê受拒絕，這个kiám毋是teh指起咱地上的生活是試驗？

2. 閣來講彼个價值。時間就是行好事的機會。真可惜！偌濟機會hoa去！前日有人共我講，「我有得著機會，8年前的一個正月，若有投資的確會成好額。總是我放予溜去，taⁿ彼个機會無閣轉來。」總是論趁錢毋是我著講--ê。時間就是做好事的機會-也佇時？新囝婿無佇10點，11點，12點的一刻前來，伊佇半暝來。貴重的時間行好事是當然。幾年前有兩个少年人，in親像大衛佮約拿單，對囡仔時代到大學時代，佮佇一个都市做辯護士，攏做伙。有一日相佮坐車去港口，一个欲se̍h世界，in只有一項無siāng。一个是敬虔，也一个雖然毋是懷疑者，iáu-kú teh iân-chhiân。佇車中彼个有信的想講，「阮若到旅館的確欲叫伊著信。」總是到為伊無講，in徛佇岩壁的時想講，「阮若落佇船的梯的時我欲對伊講，」伊也無。船tú欲離開的時想欲講，總是伊也無，大船越頭去，兩个相離。年半後，地球se̍h半lìn，也彼个朋友死去。Taⁿ佇伊真媠的讀冊廳這个活的人坐teh看伊死的朋友的像，也對伊講，「Ah約拿單，我的朋友，我愛你成做基督徒！也替你祈禱！」總是佇壁頂的圖的嘴唇無應。燈火to̍h到半暝，也hoa去lah。設使你佇彼時有對你的朋友講勸勉的話，是比這陣來講較好。咱佇舊年有浪費真濟機會，也taⁿ遐的過去，袂通閣來lah。

你有錢的時就是時間，你會通做大事，總是你放予過去，今仔日你kan-ta是一个店員。恁好額的人對恁，我會通講，你有錢的時，這陣就是時間，你會通起教會的時就是時間，對彼霎以來你毋捌看著時間，你會通講，「父ah，赦免我」的時就是時間；總是燈火to̍h了，恁的天父的耳仔冷到親像êng暗的風的頭前門的鎖，無teh關心恁。我姑不將著共恁講明，朋友ah，天父去lah 。恁袂通講，「父ah，我過袂得去。」恁自滿，受氣，顧家己，重眠，小膽，無關心。恁講，「後禮拜我欲講彼个。」哀ah！！後禮拜來lah，也你思想的火把teh著了lah。Ah，設使有人佮伊的朋友teh相爭，著佇這个燈猶teh to̍h的中間去佮伊相和。佇今年對別人的關係家己著清算。

3. 我佇遮欲講起chiah 的袂會閣to̍h 的燈，he是啥貨？

(a)就是囡仔時代敬虔的家庭的燈。恁雖然這霎會得著閣較好的家庭，總是舊時的厝的燈hoa去lah，一切的關心，恩惠的環境就是你佇5歲，10，15 的時間的擔袂通閣轉來。我常常想，我無袂記得我的老父的聲。這款的家庭過了，我所疼少年的囡仔，查某囡仔，設使這款的家庭的火猶teh to̍h，咱著留心佇這个，因為現時佇咱中間設使有人對咱親像老父的款teh講，保護咱，關心佇咱，反對咱，伊欲用全世界的物予伊，咱姑不將著行所chhun 的路因為to̍h了lah！

(b)就是咱的 kó͘朋友。我袂通得比伊較好的朋友，我袂通閣再聽伊的聲，伊蹛佇hiah遠，抑是去佇永遠的世界，我愛想伊所講的話，taⁿ彼个過去。Oh，我囡仔時代的朋友，恁的恩惠猶teh拍我！恁囡仔，查某囡仔，設使佇世間恁有朋友，著親切，盡忠，誠實來聽這个朋友所講的。我所疼的 kó͘朋友，tò來我遮！袂，伊袂來，to̍h了lah！去lah！

(c)猶有寫to̍h了？就是佇咱的生涯中第一代先感觸的新鮮。你kiám無想著怎樣囡仔佇幼稚的時陣就愛花？Taⁿ人來花店，也買幾若打的 chhiong-bî，伊的對媠的趣味佮歡喜著了lah。問坐佇我的後面chiah 的音樂家，in有人是先生，in kiám捌閣再親像少年的時代，就是tú-á teh學彈琴的 8音階的時彼款的趣味？的確無，音樂taⁿ是為著麵包teh勉強。Taⁿ彼个熱心了lah。退步lah，我為著你傷心就是燈to̍h了，掖佇你的聖冊的面頂有土粉，對佇你彼个無有歡喜，我來講起你起頭的疼(啟示錄2：4)。起頭你想聖冊的偉大佮彼个貴重的約束的時，目屎流佇你的嘴phoé，也看十字架的時想耶穌基督親像teh共你講話的款；總是今仔日宗教一切的故事，聖經，教會的事佇你親像to̍h了的燈火。

(d)閣這項的燈to̍h了-就是驚的燈。阮做囡仔的時，我的兄弟會記得怎樣老父佇阮暗時欲出去的時，常常借阮燈火。閣再我會記得阮放學，佇山phiâⁿ伊來chhoā阮的時，燈火細膩囥佇外衫的下面，阮囡仔規路是驚狗，豺狼，鬼仔。感謝上帝有項我現今猶teh驚，我驚死，我驚審判。細漢查某囡仔！無偌久以前，老母不時為著伊欲去，睏暗時著用燈火囥佇樓頂的椅仔，taⁿ佇伊所蹛的街市半暝攏無驚，也無驚生份人teh叫oé(オーイ)佮墓仔埔的所在。驚的燈to̍h了lah。

II. 五葩燈teh to̍h。遐的是啥貨？Kiám毋是5个最好的機會？是lah，我好膽對恁講，這个就是上帝所欲予你行好的機會，設使你袂通食過êng暗的 9點，這个機會就是較大佇你的生涯所捌行歹的眾機會。5葩燈teh to̍h，也佇這个時陣你會通比你捌反ge̍k閣較會予上帝歡喜。

1. Chiah 的燈是啥貨？予我chhat火柴來摸頭一个，-反悔的燈。這霎著按呢講；「上帝ah，可憐我這个罪人。」你本身家己點，就會to̍h。

2. 信仰的燈。「欲信啥人？佇我本身失落攏總的信仰。」按呢著，信基督，摸；就會to̍h。

3. 就是向望的燈。雖然你袂通食過êng暗的 9點來講，這是可憐，設使你有得著光iām。

4. 閣這葩是啥貨？疼的燈，我願對我的心底為著疼的人，雖然佇這个世間無人疼你，佇彼爿的世間káⁿ有。也設使佇地上佮彼爿無有一個朋友來講，上帝疼你。

5. 意志的燈。試摸看覓，就會to̍h。真奇妙的光！Ah，請咱注意這个，因為這个真oh得點予to̍h。我徛佇你佮風的中央，我捻燈心，我愛全教會佇這个寒天的 êng暗徛佇你佮風的中央，就風袂通吹hoa這个火，逐項倚靠這个，這个是人意志的燈。「無論啥人意愛來，也來the̍h活命的水」。設使這5葩燈的 火佇你teh to̍h，也為著你。就這霎tú-á起頭的全年中為著你，in(指5葩燈)欲照平坦佮成功的路予你，也全地面的年月，這个也欲綴你「直直照到完全的日。」A-men 。(對E. J. Haynes 的新年說教譯--ê)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461