首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 日本教會興起
日本教會興起
卷期：第202張 本次： 日期：1902/1 刊名：台南府城教會報 頁數：2
篇名：日本教會興起 [ Ji̍t-pún kàu-hoē heng-khí ]
作者：
  顯示 : 漢羅 全羅 並列  

日本教會興起

1902.01 202卷p.2

 

佇日本國的京城差不多3，4年前有設一个總會。彼个會的意思是愛贊逐位的教會無論Kam-tok教，長老教，浸禮教，抑是啥物別號的教門，贊in 的力去報耶穌的福音予眾人知。照in所it--著是意愛in 的國著歸耶穌；予逐城，逐庄，無一个人通講，毋捌聽耶穌的事。

西曆的 chûn年就是1900年大家聚集議論這層事講，若欲予伊成功，總著tê有5000箍來做所費。合會歡喜准，就派人設法。到舊年就是1901年，大家閣聚集，逐位的教會兄弟姊妹協力鬥贊成。Taⁿ有出一本冊teh講in所經過的情形。這本冊皮有字講，「願阮的國歸基督。」In知家己的氣力不足就引起舊約這句講。「萬物的主耶和華講，毋是用權能氣力，是用我的神」。

頂面彼兩句要緊做號講，贊in 的心神出氣力；閣有應告白四界分，請人來聽。

Taⁿ將in所印佇彼本冊，來簡簡翻譯予咱兄弟姊妹知。

照彼本講，舊年5，6，彼兩月日逐位的教會，牧師，姑娘，當職的，兄弟，姊妹，以及囡仔同心協力聚集佇京城tiâu工欲予城內，逐位，逐人聽--著主的福音。毋若城內人聽，又閣有的散散去別城，別庄，佮偏僻的地界講。對in所做的工程上帝實在有予in得著大功效。所得著的功效有幾若項佇teh：-

受感激鬥贊力

有一個尊貴的大官teh管火車路，倩差不多5000苦力。伊的心掛慮遐的跤手決斷愛in逐人聽主的代誌就本身去共in講。有的聽了恥笑侮慢伊，有的拾土丸愛tìm伊。伊無啥物gâu講話，喙舌極tun，話thu̍h-thu̍h哮，講袂得出來的款。遐的苦力閣較笑伊，伊放無要緊，恬恬做伊坐teh講，後來閣講幾若擺。講了紲去別位講予別个聽。佇伊的厝內真久迫切替遐的人祈禱。拄好有一個兄弟去鬥贊伊；閣無偌久，遐的恥笑--的就反悔來信主。彼兩月日所聽著的人額有17个頭人佮兩千的苦力。

閣有尊貴的查埔，婦人，來聽，來信，紲出力來贊。連和尚也聽，也信；也有警察幾若--的，趁食人也濟濟。四界流的浪蕩子，跋筊--的，食酒--的攏有。逐个放拺in 的歹路來信，兼出力引chhoā別人。

姊妹鬥贊

婦人人也來大幫贊。有一位的姊妹chhoā一个婦人人來見牧師共伊講，這个姊妹是對我的本省來，多謝牧師你將得救的路教予伊較明白。牧師看，知伊是尼姑，就奇怪伊teh問得救的路；佮伊祈禱就知有實心聖神有感動。伊講有七个兄弟死，為著煩惱逼去蹛菜堂。Taⁿ聽見有真的上帝，想欲倒轉去共伊的丈夫講這个好消息。

閣有姊妹寫真理單紲出銀去贊合會印。印了本身帶去四界分予人。有的四圍招人來聽；有的贊這項，有的贊彼項，攏是引進人就近道理。

女學學生鬥贊

女學的學生有另外聚集做祈禱會，替in 的窗友真迫切求。上帝有准in所求，致到彼tia̍p濟濟人來信主。

囡仔鬥贊

囡仔人也有份佇in所得著的福氣。內中有一個啞口的囡仔會曉聽，袂曉講；老母有信，老爸無。彼个囡仔去街路四界分單，也直直吵伊的老爸著佮伊去看。老爸疼伊的囝，毋愛伊煩惱，對按呢順伊的意思；聖神有感激伊，予伊所聽見--的入心。閣一个也是啞口入拜堂內流目屎the̍h紙寫講，「我是有罪的人；taⁿ有信耶穌來得著救。」猶一个跛腳--的 kah in老母著共伊拖車去鬧熱的街市分單請人去聽。有一個查某囡仔引chhoā伊的老母佮兩個婦人人。閣有的另外聚集做伙，決意欲予in囡仔伴知，就創旗kia̍h佇街路通知人，沿路行，沿路分單。

人受感激

煮食--的假殘忍

有一個煮食佮教會內的人蹛20年久，逐日聽主的道理。總是gâu食酒，跋筊，大殘忍刻薄伊的家內。雖罔聽hiah久，攏無受感激，到彼tia̍p去聽，心那刺鑿一下；就起來認罪，求上帝赦免，倒轉去共伊的婦人人講。伊聽了gông-ngia̍h講，這个道理若有權通感激人親像你，我也欲去聽；對按呢就佮伊去；無偌久兩人平平領洗禮。

跋筊--的

閣一个跋筊15年久，做匪類的大哥，也捌予人關監四擺，老母苦勸，也無彩工，因為伊毋肯反悔。有一ê昏入拜堂聽，閣再去三四過，就受感激，決意放拺伊的舊路；想毋是快，跋真久，慣勢。閣有100个結黨，總是果然到taⁿ攏改變。

又閣一个拖人力車--的。伊的查某囡仔講，前阮老爸真gâu食酒，阮某仔囝濟濟擺真枵餓聽候伊趁錢倒來通食；總是伊倒來到toè就酒醉，大受氣阮。佮阮老母常常冤家；佳哉伊去聽就反悔。到taⁿ阮家內攏有信。

浪蕩子

有浪蕩子離伊的家四界流，銀攏開了，到京城攏無朋友通贊，想欲自盡，行佇車路，愛予車kauh死。看無偌遠有鬧熱就近倚去看啥物代誌，就是人teh 佈道，聽了伊也信。

閣一个浪蕩子佮一个歹查某參詳，兩个約日欲做伙自盡，就買一支刀來交伊。佇路裡欲去的時有聽人講道理。聽了就佮in入拜堂內；teh坐的時有一個婦人人論起路加15章，浪蕩子的所行，紲反悔的代誌。伊聽了會曉得，流目屎講，這个得救的道理也是我的；taⁿ我知已經得著lah！

尊貴--的

閣一个大尊貴--的也有聽，有信；伊的同伴笑伊講，Taⁿ做奴才lah。伊講，耶穌的道理就是救人的道理。我若會贊人得著救，做這號的奴才我實在歡喜做。一个聽伊的話就見笑，因為伊的老爸是信主的人，伊做囝毋捌干證道理，想taⁿ我照本份著回心轉意做主盡忠的學生。

警察

有所在聽人講，京城內逐日濟濟人得著救，就行5舖路愛家己得著，紲通倒轉去引chhoā伊的爸母。

有警察講伊捌讀聖經，聽道理真久，想我是警察毋免信。Taⁿ受聖神的感動講，我做警察定定teh佇歹人，我閣較要緊著信。現時彼个警察真熱心出力，決斷愛予京城的警察攏捌真理。Taⁿ已經有功效引chhoa 11个lah。

有的 40年前聽著掠做無要緊，到這時才信，應驗救主的話，「一个掖，一个收，到尾兩人通平平歡喜。」

祈禱

「求，就得著；揣，就拄著：拍門，就共恁開，」chiah 的是上帝的話。In起頭真要緊祈禱，逐日聚集做祈禱會也有的踮厝內另外聚集。日本常常想囡仔袂曉求。總是遐的囡仔受感激就迫切求上帝來救in 的親人。有的切意求上帝贊in 除in 的歹，抑是共in醫病。大人袂免得奇怪，呵咾萬權能的主。

頂面已經有講上帝准in所求；總是講淡薄nā-tiāⁿ。一擺牧師講，上帝，若允准恁所求就起來講。有七人做一ê起來，講，有ah；對所求有親人，朋友來得著救。閣有一個婦人人講，我有祈禱，總是上帝允准我，比所求較濟致到贊我的信那大。

女學的學生，做工的，尊貴--的，囡仔人做一聲講，有矣；上帝所准是重倍阮所拍算--的。對按呢京城的教會有加添約略6000人。

題錢

論聽--的真甘願題錢來贊。有一所在題到三四百箍。有的無錢，就送in 的手指，鍊仔，幾若項彼號的物件。有的送濟濟本冊通分人讀。內中有一個警察因為從前食清菜；有功勞，和尚賜一跤金手指，伊將彼跤紲獻出來。散凶人也勉強克欠來獻予上帝，囡仔也將in所寶貝的 chhit-thô物紲獻。

這號事是大略予恁知，萬權能的上帝無所毋會；無論啥物等號的人攏有路通得著救，卻予人的心意袂測度得。

照In所講，「In 的國著歸基督。」總是到taⁿ猶未的成，向望咱大家為著in來鬥贊成替in祈禱，紲感謝上帝有這號恩典的意思。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461