首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 佈道論
佈道論
卷期：第672期 本次： 日期：1941/3 刊名：台灣教會公報 頁數：1-3
篇名：佈道論 [ Pò͘-tō-lūn ]
作者：許德謙 Khó͘ Tek-khiam
  顯示 : 漢羅 全羅 並列  

佈道論

許德謙

1941年3月672期        1-3

 

 

  1. 閣一擺來認識宗教(道理)是甚物？今仔日有人掠宗教做一款的討債物，抑是娛樂機關，抑是化妝品；有，也按呢teh過，無也袂要緊。(親像薰，酒，芳油，撞球，有，也好，無，也袂要緊)。抑是有人看宗教做囡仔的 thit-thô物抑是無向望teh欲過世的老人的安慰機關。總是基督教毋是照以上所講彼款的討債物，抑是娛樂機關，講有信基督教也按呢teh過，無信也án-nī teh過。基督教是活命，是世間人無袂用得--ê。因為是引chhoā人捌真神，行正路，是關係性命，靈魂的問題。所以基督教毋是kan-ta囡仔，抑是老人欠用nā-tiāⁿ，是見若做人攏著欠用，親像人人著欠用日日的米糧一般樣。Kiám-chhái有人講見若有設教，有傳教示，逐款的教嘛好，thái-thó著限定信基督教？總是基督到的特色毋是親像別款的宗教，kan-ta勸善nā-tiāⁿ。基督教是得救的宗教。就是上帝救世間人脫出應該著滅無的罪的深坑。所以若無得救就無基督教。對按呢基督教會通稱做世界的得救的宗教。

  2. 基督教的真神上帝。基督教teh講的神叫做上帝。上帝兩字毋是天，毋是地，毋是人，抑是物，抑是鬼神，是創造天地，日月星辰，以及萬項物，以及世間人的真神。所以上帝是創造的神。咱是咱的祖公生--ê。直直起去的確有神創造，彼个神是上帝咱攏對伊出--ê。伊予咱有靈魂，所以上帝是咱靈魂的老父。既然伊是造物主，咱是受創造的，應該著真心敬拜服事伊。做人的囝兒應該著有孝伊的父母，做百姓應該著服事人君。親像按呢做一个人活佇世間應該著服事敬拜靈魂的老父上帝。若是無敬拜--伊，這个是對天頂的靈魂的老父無禮數，是犯罪。是親像世間人的囝兒離開伊的老父四界去放蕩一般樣。今仔日上帝是神，逐所在佇teh，teh揣離開伊的世間人。

  幾若年前佇美國的Bō͘-sū-tun 的大街市，有一個老阿婆行來行去逐个旅館，酒店，病院，戲園揣伊的囝，揣20年久，揣攏袂著。伊不時吩咐人講，若拄著伊的囝著共伊講有兩个人teh揣伊，無論按怎to無放拺--伊。人問伊講，「兩个人是甚物人？」伊講，「是天頂的上帝佮我」。Taⁿ天父上帝也是親像這个老阿婆，不時teh揣咱世間人。雖然咱離開伊，伊iáu-kú無論按怎to無放拺咱。

  3. 基督教所teh講的罪。罪是什麼？聖經講，「不義是罪」，也世間人攏是罪人。俗語講，「鼻空àⁿ落無一个好人。」這句有teh表明世間人是罪人。基督教所teh講的罪毋是kan-ta犯著法律才是罪lah。是心內想歹已經是犯罪。耶穌有講怨恨伊的兄弟--ê，是佮个死伊的兄弟一般樣。以外顧家己講人的歹話，抑是歹喙罵人，抑是用詭譎的會害人，瞞騙的話，抑是怨恨別人的好，這攏是罪。M̄-nā按呢做歹是罪nā-tiaⁿ。知影好事無去做，這个也是罪。譬喻來講，有一個醫生，伊會曉伊人的破病，總是佇路邊有真濟人破病teh艱苦，伊知影無共in醫，這个是罪。聖經閣講，無信心也是罪。做囝兒袂記得父母，無服事有孝父母。這个照人倫是不孝。親像按呢，無信上帝做老父，無服事--伊，這个是對上帝犯罪。

  今仔日濟濟人佇罪惡的內面teh犯罪，致到麻痺毋知彼个厲害，會予人的靈魂，滅無，紲袂曉分別好歹。佇美國有一個洞穴，彼內面的魚攏無目睭，因為彼內面真烏暗，致到目睭無用，紲無生目睭。親像按呢，若佇罪惡烏暗的中間的生活，有時紲無感覺罪的厲害，致到失落彼个分別好歹的腦力。

  Taⁿ人既然有犯罪，算袂了。所愛做的袂通去做，所毋愛做的歹才去做。這款的艱苦咱攏有經驗。Taⁿ著按怎才會擦消chiah的罪？Kiám-chhái有人欲講著修養，來做好來補罪。總是人實在愈修養愈感覺犯罪ná濟。因為人家己無有氣力通行好，若毋是上帝的氣力就袂會。總是做好也袂通補罪，因為做好是應該--ê。對上帝來看是無功勞，所以袂通補罪。

  Taⁿ既然有犯罪就有審判報應。佇世間做百姓若犯罪，照律法著受定罪受報應。親像按呢，人若犯罪，佇在生，以及死了後，攏會受審判報應，這个是袂通走閃--ê。上帝的審判真giâm，世間人若受審判無一个徛會tiâu，的確逐个攏滅無。總是上帝有憐憫，替世間人已經共咱開路，予咱有機會通反悔得著赦免，就是耶穌的救世。

  4. 耶穌基督的拯救。上帝看咱世間人予罪惡苦楚，不忍差伊獨生的囝來世間，成做人的樣想欲救人，伊佇世間3年外久醫病，趕鬼講道理予人聽，救濟濟人對死入活。伊本是真榮光，富有，總是甘願成做散鄉人，來受種種的艱苦。伊教示世間人捌上帝。因為耶穌是對上帝遐來，所以論上帝的事伊夠額捌。耶穌的面有表現上帝的像。所以耶穌講，「看我就是看上帝。」後來伊予歹人害死佇十字架死了後三日上帝就予伊閣活，40日久佮伊的學生相交陪，了後就上天閣倒轉佇上帝遐。

對耶穌的死，咱的罪通受赦免，因為伊有替世間人來死。

耶穌予人釘十字架毋是伊有罪，是伊甘願共咱眾人擔當咱應該著受的刑罰。較早佇中國有一個少年人做賊，官府掠欲刣--伊。若是彼个賊有一個伯真老，真疼伊的孫，出頭求官府，講著允准伊，就刣老人，放少年--ê。耶穌是無罪，看咱大家予罪惡苦楚落到地獄的所在，伊就歡喜白白共咱擔罪。

  Taⁿ咱著及時來反悔罪，將咱的罪的重擔交予耶穌擔。若按呢上帝也欲赦免咱的罪，對耶穌的功勞予咱通佮上帝閣和好，通認伊做父囝的親愛。

人若毋反悔罪，到末日受審判的時有刑罰。上帝的受氣真通驚惶。人若犯罪，走閃會過，總是得罪上帝逐所在佇teh。

請咱緊緊信耶穌，倚靠伊通得著赦罪。若按呢，伊會幫贊咱，會較贏世間濟濟的歹。就是佇世間會得著救，後來死了後也會得著永遠的活命。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461