Pí-tek Kài-chiú
1902.01 202 koàn p.6-7
Tī bó͘ só͘-chāi ū chi̍t ê lâng sèⁿ Bo̍k, miâ Pí-tek kap i ê cha-bó͘-kiáⁿ Lô-tāi chò-hoé khiā. Lé-pài ê-hng tī i ê the-í teh chē, chia̍h-chiú phoè hun, chiū kā Lô-tāi kóng, Lô-tāi ah! Bo̍k-su ē-po͘ só͘ kóng ê tō-lí chin-chiàⁿ sī bêng, koh sī oa̍h-tāng ê oē, ē kám-kek lâng ê sim. Lô-tāi thiaⁿ-liáu, mn̄g in Pē, Khoàⁿ sím- mi̍h bo̍k-su kóng tō-lí. Pí-tek ìn kóng, Hé sī pa̍t-uī lâi-ê, goá m̄-bat i. Koh kóng, chin-chiàⁿ sī hó thiaⁿ, lán ka-tī ê bo̍k-su bē-hiáu kóng chi̍t hūn-á chhin-chhiūⁿ i án-ni. Lô-tāi sī tì-sek ê cha-bó͘ gín-ná chai i-ê pē kap Bo̍k-su ū tām-po̍h put-bo̍k, só͘-í ū oàn-hīn ê oē-ì chai nā kap i piān-pok iā bô chhái-kang chò án-ni mn̄g, A-tia, I kóng sím-mi̍h tō-lí. Pí-tek kóng, Í-sek-lia̍t lâng teh koè Âng-hái ê sū. Tê-ba̍k chiū-sī. "Í- sek-lia̍t lâng kiâⁿ tī hái tiong chhin- chhiūⁿ kiâⁿ ta-tē." Thâu chi̍t-hāng kóng, Âng-hái ē pí-phēng sī lán só͘ khiā ê sè-kan, lán tio̍h kiâⁿ koè chhin-chhiūⁿ tī ta-tē, m̄-thang hō͘ sè-kan ê choē bak-tio̍h lán ê i-chiûⁿ kap kha. Tē-jī hāng, Lán í-keng tit-tio̍h Chú sio̍k-hoê, lán tio̍h kiâⁿ tiong-ng ê lō͘, m̄-thang oá siang-pêng im-sí lâng ê choē-kài. ài- ah! Kóng kàu bêng-bêng pe̍k-pe̍k; kóng ê tiong-kan ba̍k-chiu ná khoàⁿ Í- sek-liat2 lâng teh koè Âng-hái ê khí- siōng. Lán ê bo̍k-su nā ē hiáu kóng chhin-chhiūⁿ i án-ni chin-chiàⁿ ē kham- tit sǹg-gia̍h.
Koh2-sioh, Pí-tek só͘ teh hīn bo̍k-su chiū-sī án-ni. Pí-tek àm-sî ài chia̍h-chiú, m̄ nā ka-tī ài chia̍h soà bián-kióng i ê cha-bó͘-kiáⁿ tio̍h kap i lim chi̍t au-á. Bo̍k-su tiāⁿ-tiāⁿ khǹg i tio̍h kài-chiú kā i kóng, chia̍h-chiú--ê bē-tit thang ji̍p Thian-tông. Koh kóng, Lí m̄ nā teh chó͘- tòng ka-tī soà teh bê lí ê cha-bó͘ gín-ná. Pí-tek siū-khì kā bo̍k-su kóng, bô kan- sia̍p lí ê tāi-chì, chhut-chāi goá chia̍h! Nā ài ēng chiú sé seng-khu iā thang. Bo̍k-su kóng, Lí nā ēng chiú sé seng- khu iáu-kú khah tì-sek; sé goā-phoê, kú bē hāi-tio̍h sim-lāi. Pí tek koh khah siū-khì, tuì án-ni sì-koè chhoē khàng- khiah thang hiâm bo̍k-su.
Hit ê-hng Pí-tek ná-lim ná o-ló pa̍t uī lâi ê Bo̍k-su gâu kóng tō-lí; o-ló liáu chiū soà khùn-khì. Bāng chi̍t ê bāng khoàⁿ-kìⁿ ū hái, siang-pêng ê chuí koah5 kàu ná chhiûⁿ-piah, tiong-ng sī ta ê soa-lō͘, soa kim sih-sih. Lō͘ thàu kàu chi̍t ê siâⁿ. Siâⁿ-mn̂g, ke-lō͘, ta̍k-uī choan-choan cheng-kim. Soa-lō͘ teh óng-lâi ê lâng chin-chē, ta̍k-ê ài ji̍p siâⁿ-mn̂g. Soa-lō͘ ū thiⁿ-sài ēng kim-sàu-chhiú chhut-la̍t teh sàu-tè, ài chān koè-lō͘ ê lâng chheng-khì kàu siâⁿ-mn̂g, hō͘ kò͘- mn̂g ê thang chún in ji̍p.
Ū-ê chheng-khì chheng-khì kàu mn̂g, kò͘-mn̂g--ê chiong thâu kàu kha siông- sè khoàⁿ, khoàⁿ nā bô chi̍t-tiám ê lâ- sâm, chin hoaⁿ-hí khui-mn̂g hō͘ in ji̍p; lāi-bīn lâng,iā hoaⁿ-hoaⁿ hí-hí chiap-la̍p in. iáu ū-ê bô sè-jī, kiâⁿ-lō͘ ê sî ài oá phian-piⁿ hō͘ hái-chuí phù--tio̍h in ê saⁿ, kàu siâⁿ-mn̂g saⁿ lóng chi̍t-jiah chi̍t- jiah ê kiaⁿ-lâng; kò͘-mn̂g--ê m̄ kā in khui; in ka-tī iu-būn, chò in tuì pa̍t-uī khì.
Koè-lō͘-lâng ê tiong-kan ū chi̍t ê chin pháiⁿ-sim, chhiú koāⁿ chi̍t-ê chuí-kan. Thiⁿ-sài sàu kàu kim-kim, hō͘ koè-lō͘ ê lâng bē bak-tio̍h. Chóng-sī hit ê koāⁿ chuí-kan--ê, khiā ka-chiah-āu piàⁿ lâ- sâm-chuí chhut-khì, soa liâm-piⁿ pìⁿ chò thô͘-moê; nā bak-tio̍h, sé lóng bē lut. Thiⁿ-sài iā bô hoah thang sé kàu chheng- khì. Thiⁿ-sài lóng bô hiâm i, to̍k-to̍k chhut-la̍t sàu I só͘ bak ê soa, kàu ē koh chheng-khì. Pí-tek teh khoàⁿ kî-koài in thun-lún kàu án-ni, chhàu-tú-khám Lô- tāi iā tuì hia koè. Pí-tek khoàⁿ thiⁿ-sài koh khah iàu-kín i ê lō͘, chiū chin hoaⁿ- hí, koh i ti̍t-ti̍t khì lóng bô oá chuí-piⁿ. Lāu-pē siūⁿ, taⁿ ún-tàng chheng khì kàu siâⁿ-mn̂g. Kiâⁿ, poàⁿ-lō͘ khah-ke hit-ê pháiⁿ-sim--ê chhut-lâi piàⁿ i ê lâ-sâm chuí Lô-tāi ê kha lóng khì bak-tio̍h.
Pí-tek chin siū-khì, mn̄g Thiⁿ-sài khoàⁿ, án-choáⁿ bô chó͘-tòng hit ê lâng. Thiⁿ-sài iô-thâu kóng, Khó-sioh ah! goán ê Chú m̄-chún goán chhap i.
Pí-tek kóng, "M̄ chuí"! Lín tio̍h ka- tī chú-ì; hit-ê lâng m̄-nā teh hāi ka-tī iā teh hāi goá ê kiáⁿ, tòng i bē ji̍p hit-ê êng-kng ê siâⁿ. Hāi ah! Goá-ê kiáⁿ ah! Thiⁿ-sài kóng, Goá chai lah, khó-sioh ah.
Pí-tek koh khah siū-khìⁿ toā-siaⁿ jiáng, Kóng, Lín iáu-kú m̄ khui-chhuì. Thiⁿ-sài koh kóng, Goá bô hoat-tit. In kú m̄ thiaⁿ; tak3 lâng sī i ka-tī chò Chú, chhut-chāi lí khǹg-i, kàu-boé i chiū ka-tī chú-ì; goán thiⁿ-sài siūⁿ lóng bē chhut.
Pí-tek toā siū-khì kóng, Lí nā m̄, goá tek-khak beh tòng i. Thiⁿ-sài kóng, án- ni ē chò-tit thiⁿ-sài só͘ m̄ thang chò-ê, Siōng-tè ū-sî chún lâng khì chò.
Pí-tek tián-sèng hoat-la̍t kiâⁿ kīn-oá hit ê pháiⁿ-sim ê lâng beh sak hō͘ i tó; hóng-hut gông-ngia̍h chi̍t-ē, koh khoàⁿ khiok tō sī i pún-sin. Chit-sî tian-tian tó-tó, chuí-kan phah ka la̍uh, soà pìⁿ thô͘- moê; chhèⁿ, khoàⁿ m̄ sī kiaⁿ-lâng-chuí, goân lâi sī chiú! Lô-tāi kóng, Á-tia ah, lí ū khí-khùn chhia-tó chiú-kan; chiú lóng bak-tio̍h thô͘-kha ê thán-á.
Pí-tek iáu poàⁿ-khùn, poàⁿ-chhéⁿ, khoàⁿ thán-á lóng tâm kóng, Ū-iáⁿ, khiú Lô-tāi ê chhiú kah i kín-kín khiā pa̍t-uī kiaⁿ-liáu bak-tio̍h i ê ê.
Lô-tāi gī-gī chhiò kóng, Bak-tio̍h ê, bô iàu-kín, sī chiú nā-tiāⁿ, kiám ē siong- hāi mah? I m̄ chai in pē só͘ khoàⁿ-kìⁿ ê kong-kéng.
Pí-tek khí-lâi ti̍t-ti̍t siòng hit ê tâm-jiah kóng, chiú si̍t-chāi ē toā siong-hāi lâng; taⁿ goá kàu chi̍t-sì-lâng m̄ koh tah chiù ji̍p chit lāi-bīn.
Tuì hit-tia̍p kàu sí i m̄ bat koh lim chi̍t tih ê chiú, sì-koè khǹg pa̍t-lâng tio̍h khò Kiù-chú Iâ-so͘ ê in kài chuí, kiâⁿ bô bak-tio̍h ù-oè ê ta-tē kàu tī Pē êng-kng ê chhù, hō͘ Thiⁿ-pē kap thiⁿ-sài hoaⁿ-hí chiap-la̍p.
