Lâm-pō͘ Kàu-hoē I-liāu Thoân-tō-sú
Chiap 3 goe̍h tē 10 bīn
Gân Chín-seng
1941 nî 5 goe̍h 674 kî p. 3-5
[Tèng-chèng. Lô I-seng ūn-koan, 12 ji̍t téng-po͘ kàu Kong-soaⁿ. Sîn-ha̍k-seng kap Lú-o̍h, Sió-o̍h lóng tāi-seng tī Kong-soaⁿ thèng-hāu, kàu uī, chiū kí-hêng chòng-sek. Che sī Se-kok kàu-sū tiong thâu-chi̍t ê bâi-chòng tī-hia--ê. Kàu chòng-sek liáu, A-iām lâi Sin-lâu, tī kàu-sek chiap-tio̍h sio-bat ê lâng, tîn-su̍t Lô I-seng pēⁿ-chōng kap keng-koè ke̍k-kî chhám-siong hō͘ thiaⁿ ê lâng lóng siong-sim lâu ba̍k-sái.
Chêng 3 goe̍h tē 9 bīn "Tī Sîn-ha̍k-hāu kàu-sek kí-hêng chòng-sek hit toāⁿ sī Thô͘ Bo̍k-su" Goá kì-chhò, chhú-siau]
Tī Hông-kí 2555 nî(A.D. 1895) cha̍p goe̍h boé tuì Eng-kok chhut-hoat lâi Tâi-oân chò thoân-kàu ê kang; Liâm Tek-lia̍t Bo̍k-su(Rev A. B. Nielson), Muî Kam-bū Bo̍k-su(Rev. C. N. Moody) Lân Tāi-pi̍t I-seng(Dr. D. Landsbro͘gh), 3 lâng tâng chûn chò-hoé lâi Tâi-oân. Bêng-tī 28:12:18 kàu An-pêng chiūⁿ-soaⁿ, toà Sin-lâu; 29 nî chhun-thiⁿ, ū chhiáⁿ Lîm iàn-sîn Siù-châi chò Se-pin, o̍h Pún-tó-oē. Kàu 30 nî chhiu-thiⁿ chiū tuì Sin-làu[sic.] chhut-hoat beh khì Chiong-hoà, chiū-sī Lân I-seng, Muî Bo̍k-su chē-kiō, tâng-kiâⁿ chò chú-chia̍h ê lâng Po͘-kiuⁿ-thâu Ông Hoat kap phí-jîn, í-ki̍p taⁿ hêng-lí ê lâng; kui-tīn khí-sin kiâⁿ kū-sî toā-lō͘, kàu Chan-bûn-khe chē tek-pâi koè khe Hoé-sio-tiàm hioh-mê, thiⁿ-kng chia̍h-pá koh khí-sin, keng-koè Kip-chuí-khe kiâⁿ Sin-iâⁿ toā-lō͘, le̍k-koè Pat-chióng-khe Chuí-khut-thâu chiū kàu Ka-gī, tī Se-mn̂g lé-pài-tn̂g hioh-àm. Tē 3 ji̍t koh chún-pī chhut-hoat, keng-koè Táⁿ-niau, Gû-tiâu-khe, Toā-po͘-nâ, oa̍t sai-pak pêng kàu Sai-lê, tī pài-tn̂g koè-mê, hit-sî nn̄g ê siàu-liân lâng tē 4 ji̍t chò-hoé khì Chiong-hoà tha̍k Kok-gú, chiū-sī Liāu Hoàn-chiong, Liāu Sam-tiōng. Chhut chng-goā chiū liâu chhián-chhián po̍h-po̍h ê chuí, mn̄g lâng kóng che sī Hó͘-boé khe chuí, goá sim-lāi chhin-chhiūⁿ chin tek-ì, kiâⁿ kàu khe-tiong khoàⁿ lô-chuí tuì tang lâu koè sai, chhin-chhiūⁿ tò iû chi̍t poaⁿ, chuí siaⁿ chhiong-tōng, bak7-chiu khoàⁿ-liáu hut-jiân tám-hân; àm-siūⁿ kó-jiân chhin-chhiūⁿ hó͘ hō͘ lâng thang kiaⁿ, chiah chai kó͘-chá lâng teh kiò Hó͘-boè khe bô chhò. Beh tah ê tek-pâi kap chêng só͘ tah ê ēng tek-ko thiⁿ, thâu-á chi̍t-ê, boé-á chi̍t ê chiū thang koè-lâi koè-khì, taⁿ chiū m̄-sī lah, tek-pâi thâu chi̍t khûn toā-soh, khiā chi̍t lâng, pâi-tiong nn̄g lâng kia̍h tek-ko, tek-pâi boé lióng-pêng ê tek-ko khah tn̂g, ná chhin-chhiūⁿ si̍t-kó͘[sic.] boé, khe ê lâm-pak ū chún-pī lâng, muí pêng cha̍p-só͘ lâng. án-ni chún-pī liáu, chiū hō͘ tah-kheh chē tī tek-pâi tiong-ng, chiong pâi sak chìn tang chuí-thâu, chiah sak ê lâng pàng-chhiú, hit chiah tek-pâi hō͘ chuí chhiong lâu, liam-piⁿ tek-pâi thâu choán sai phiau-liû cha̍p-só͘[sic.] tn̄g chiū oá pak-pêng hoāⁿ, khiā hoāⁿ-piⁿ ê lâng tio̍h cháu khì sai-pêng thèng-hāu, tek-pâi thâu khiā teh ê lâng chiū chiong toā-soh hiat-chiūⁿ hoāⁿ-téng, hiah ê khe-piⁿ khiā-teh ê lâng khiú toā-soh, chhiû tek-pâi, chiū oá pak-pêng hoāⁿ. Goán chiah ê lâng tio̍h chò 2 pái chiah ē chiâu koè khe, bián kóng sî-kan huì-liáu chin-chē, joa̍h koh chhuì-ta, iā tio̍h khat-khó͘ chìn-hêng. Kàu Pó-táu khe, tah tek-pâi bô chhin-chhiūⁿ Hó͘-boé khe sim ê kip-liû. Chiūⁿ khàm-téng khoàⁿ Pak-táu peng-chān su-lēng-pō͘ ê khoàⁿ-pán; chiah chai Pó-táu sī Tâi-oân-oē ê im-piān. Chiū tī biō-chêng hioh-khùn, chia̍h-tàu, cheng-sîn hoê-ho̍k; chiū koh khí-sin, ná kiâⁿ ná hoaⁿ-hí, in-uī lō͘-piⁿ ê chhân ū chuí teh tn̂g lâu, chhân-hoāⁿ e̍h-e̍h, thô͘-sek o͘-o͘, kīn-hū chng-siā tek-uî bō͘-sēng, kám-kak chuí ê lī-ek tē-hng, siang-tang chhân ê kè-ta̍t sī tī chia.
Sūn soaⁿ-kha kiâⁿ Hoe-toâⁿ beh ji̍p siâⁿ, khoàⁿ Chiong-hoà siâⁿ tī Pat-koà soaⁿ kha sī tiōng-iàu tē-tiám, tuì lâm-mn̂g ji̍p, siang-pêng tiàm-thâu iáu lāu-jia̍t, kiâⁿ kàu Koan-im-têng, iû-ian hiuⁿ-ian chhèng kàu kui keng biō, chhin-chhiūⁿ tī o͘-hûn ê lāi-bīn, in-uī tī ke-tiong chin lāu-jia̍t ê iân-kò͘, oat Saⁿ-kak thang chiū kàu Sai-mn̂g lé-pài-tn̂g, hit-sî N̂g Thoân-tō Bō͘-sēng chhut-lâi gêng-chiap, tāi-ke hoaⁿ-hí, Lân I-seng kap Muî Bo̍k-su chiū hun-hoat khì tiàm Pak-mn̂g Iûⁿ--chhù, káⁿ sī ū tāi-seng chham-siâng hó-sè, goán chiū tiàm lé-pài-tn̂g.
Í-āu chiū pī-pān khui-īⁿ khoàⁿ chèng ê sū, chiū chiong lé-pài-tn̂g chêng-lo̍h chò i-kî-ji̍t lé-pài, kap hoān-chiá thèng-hāu-só͘, keh-piah tiong-lo̍h chò chín-chhat kiam hoat-io̍h[sic.], án-ni î-chhî, it-biān chhe lâng chhoē chhù thang bé.
Tāi-seng chhoē-tio̍h Se-mn̂g chò Muî Bo̍k-su, Lân I-seng in khiā-ke, siu-lí hó, chiū tuì Iûⁿ--chhù poaⁿ koè-lâi, I-koán chho͘-khui iáu-boē sím-mi̍h lâng chai, chiū ū ki-hoē ē-po͘-sî, khì kīn-hū pò͘-tō hêng-i. Phí-jîn kap Lân I-seng ē-po͘-sî tuì Chiong-hoà chhut-hoat khì Lo̍k-káng, ū tāi-seng soè chò pò͘-kàu-só͘, tī hia pò͘-tō kiam hêng-i, keh-ji̍t chiah tò-lâi. Hit-sî ū Hoâi-tek-tông I-seng Lí Tō-seng lâi sio-chhoē, chin hoaⁿ-hí, beh tī Lo̍k-káng tàu èng-oān. ia̍h bat kap I-seng chò-hoé kiâⁿ 4 phò͘ lō͘ khì Tâi-tiong, kàu uī àm-àm, tī Toā-tun soè chi̍t khàm tiàm chò pò͘-kàu-só͘, tī-hia iû-goân hêng-i pò͘-tō.
Koè-nî nî-thâu chiū poaⁿ koè-lâi hiān-sî ê I-īⁿ. Pún-koán kàu hiān-sî hū-jîn-pīⁿ-sek, keh-piah sī Lâm-tâu Ban, chit keng iáu-boē bé(hiān-sî bé liáu).
Só͘-í só͘-chāi khah khoah, chiu-uî jîn-bîn khah chai-iáⁿ; hoān-chiá ná chē, pún-chiâⁿ sī Tn̂g-soaⁿ A-tun kap phí-jîn, āu-lâi chiū A-kâu Gô͘ Hi-iông, A-lí-káng Lâu Chín-chhiong, Kong-á-nâ Ko Chài-tek iā lâi chò kiàn-si̍p-seng.
I-īⁿ chōng-hóng:- Chín-chhat ê chún-pī sī kiàn-si̍p-seng, kì chiū-chín hoān-chiá ê sìⁿ-miâ, chū-só͘, chit-gia̍p, liân-lêng, lâm-lú kap kî-thaⁿ.Nā í-keng bat lâi, chiū chhoē kū chhú-hong-chian, á-sī chín-liāu-lio̍k. Jiân-āu hō͘ Lân I-seng khoàⁿ chèng, khoàⁿ liáu; chiū hō͘ hoān-chiá chhú-hong-chian khì io̍h-kio̍k niá io̍h; hoān-chiá nā hù lé-pài ū tio̍h, chiū bián io̍h-chîⁿ; nā hù bô tio̍h, chiū siu tām-po̍h io̍h chîⁿ, lâi kéng-kài i hù lé-pài hō͘ tio̍h.
Phó͘-thong goā-kho:-Sī hō͘ hoān-chiá chē kui-lia̍t, bīn-chêng ū bé-í, í-ē ū thih tháng, i-chiá chiū pī-pān toā oáⁿ tò goā-kho io̍h chuí, chìm mî chi̍t phìⁿ chi̍t phìⁿ pun hō͘ hoān-chiá, hoān-chiá chiū tuì thiàⁿ kha á-sī thiàⁿ chhiú ê só͘-chāi ûn-ûn tih tâm; hō͘ chêng só͘ kô͘ ê io̍h-pò͘ sip-sip, chiū hó thang the̍h khí-lâi; I-seng lâi khoàⁿ, chiū kau-tāi kiàn-si̍p-seng; boah--ê, boah; sám--ê, sám; kô͘-sip--ê, kô͘-sip; boah io̍h-ko--ê, boah io̍h-ko, ū-sî siong-kháu tio̍h khàm chuí-nî, chiū kia̍h ka-to the̍h chuí-nî pò͘ tī chhiú-nih chiàu siong-bīn, îⁿ--ê tn̂g-tu--ê, saⁿ-kak la̍k-lô--ê, ka lâi khàm. Ū-ê iû-choá khàm goā-têng, chiah ēng phêng-toà[sic.] pau chit ê mî, sī ēng bô thoat iû ê mî, phêng-toà[sic.] sī bé Sai-iûⁿ-pò͘ lâi thiah ê, chū-jiân lóng tio̍h tāi-seng pī-pān .Chò chit khoán ê phó͘-thong goā-kho ê chin-chē.
Gán-kho:-Hoān-chiá iû-goân chē kui-lia̍t, soa-lia̍p chin chē, kiat-mo͘h sin-iām kū-iām, á-sī kak-mo͘h-iām, kong-chhái-iām bē chió, kî-û chhiú-su̍t tó-chiat, lāi-chiàng téng-téng. Sé-gán, tī-liâu, chá-sî iû-goân chin-chē.
Chhiú-su̍t:-Sī tuì i-kî só͘ khioh khí-lâi, bô-lūn goā-kho, lāi-chōng. Sán-hū-kho, gán-kho; tī pài-jī, á-sī pài-sì chhiú-su̍t, chiàu só͘ keng-koè sêng-chek chin hó, hō͘ kok tē-hng chin sìn-iōng. Chiong-hoà lâng kóng, Lân I-seng sī Chiong-hoà ê oa̍h-pu̍t.
Í-chiūⁿ tī un-hô ê sî-hāu tiàm Chiong-hoà hêng-i, thoân-kàu tī hā-thiⁿ, chiū soá khì Gān-lí Toā-siā hêng-i thoân-kàu, tē-jī jīm ê sî, ū chiong āu-piah lo̍h tang-pêng hō͘ Tong-pho Chip-sū tha̍h chi̍t-chàn chháu-chhù iûⁿ-lâu, khai 400 kho͘, iáu m̄-kam ēng hiah chē chîⁿ. Chiàu án-ni keng-koè chi̍t-jīm, kàu Chiong-hoà Lâm-kok bé liáu, kiàn-tiok hó, chiū bô khì tiàm Toā-siā, lóng tī Chiong-hoà.
