Kàu-hoē ê Sù-bēng
Iûⁿ Sū-ióng
1941年6月675期 1-2
Phí-jîn in-uī sū-bū ê tîⁿ-poàⁿ, bē thang siông-siông tī choá-bīn kap lia̍t-uī kau-poê. Chóng-sī tī 4 goe̍h boa̍t-ji̍t, Chú-pit Ko Tek-chiong Sian-seⁿ ū kiò goá tio̍h pī-pān chi̍t tè lâi chhut tī 6 goe̍h hō ê Pò, chò siat-kàu kì-liām ê saⁿ bián-lē. Sui-jiân ham-bān kiah-pit koh bô êng, iáu-kú khoàⁿ Ko Sian-seⁿ ê hó ì chiū suî-sî kā i tah-èng. Taⁿ Ko Sian-seⁿ í-keng lī-khui sè-kan, goá kám-kak chit ê iok-sok pí khiàm-chè koh-khah iàu-kín. Só͘-í chit-tia̍p siá kuí kù lâi oân-liáu chit ê chek-jīm.
Lâm-pō͘ Kàu-hoē tuì kiàn-siat kàu taⁿ sī tē 76 nî. Hit tiong-kan ū le̍k-koè chē-chē ê kan-lân khùn-khó͘, kai-chài tit-tio̍h Siōng-tè ê ín-chhoā chiàu-kò͘. Só͘-í kàu-hoē ū khah chē, sìn-tô͘ ū khah ke, hiàn-kim ê siàu-gia̍h iā ná chìn-pō͘. Che si̍t-chāi tio̍h kám-siā Chú. Tī chit ê 6 ge̍h tē 3 lé-pài-ji̍t, lán ài kú-hêng siat-kàu kì-liām lé-pài. ǹg-bāng tī chit-sî lán m̄-nā ài kám-siā o-ló, iā tio̍h hoán-séng chhàm-hoé, soà koat-sim ài uī Chú ê Kàu-hoē lâi hùn-tò͘ ló͘-le̍k. Kàu-hoē sī tuì Siōng-tè ê oē kap Ki-tok ê pó-hoeh lâi kiàn-siat ê iú-ki-thé, só͘-í tē-chiūⁿ ê kàu-hoē sī tāi-piáu Siōng-tè kok. In-uī án-ni, Kàu-hoē ê Sù-bēng hui-siông tiōng-tāi. Tī Sin-iok tiong ū ēng kuí-nā hāng phì-jū lí-sióng ê kàu-hoē.(1) Kàu-hoē sī chhin-chhiūⁿ chhù-the̍h(Thài 16:18 ; I Lîm 3:10-15: Hut 2:20-22). Tē-ki sī Iâ-so͘ Ki-tok , só͘ khí ê lóng tio̍h saⁿ liân-lo̍k, chiâⁿ-chò Sèng-tiān, thang hō͘ Siōng-tè ê Sîn khiā-khí.(2) Kàu-hoē sī Ki-tok ê Sin-thé(I Lîm 12:12, 27). Só͘-í ta̍k-thé tio̍h saⁿ liân-chiap , soà hâng-ho̍k Ki-tok chò thâu. (3) Kàu-hoē sī chhin-chhiūⁿ Sin-niû(Hut 5:32; Khé 19:7,21:2,9). Sin-niû tio̍h kèng-thiàⁿ tiōng-hu lâi hō͘ i hoaⁿ-hí.
Taⁿ m̄-chai lán Lâm-pō͘ Kàu-hoē sī khí tī Iâ-so͘ Ki-tok ê tē-ki téng, chiâⁿ-chò Siōng-tè ê Sîn só͘ khiā-khí ê Sèng-tiān á m̄-sī? Chhiáⁿ tāi-ke hoán-séng. iū-koh lán m̄-chai ta̍k-thé ū saⁿ liân-lo̍k, lâi hâng-ho̍k Ki-tok chò thâu á bô? Tio̍h bong lán ê sim-koaⁿ lâi ka-kī mn̄g. Ki-tok chò kàu-hoē ê tiōng-hu, lán chò I ê sin-niû. M̄-chai lán Lâm-pō͘ Kàu-hoē ū chng-thāⁿ hó-khoàⁿ hō͘ Ki-tok hoaⁿ-hí á bô? Tī Siat-kàu ê Kì-liām-ji̍t, chhiáⁿ tāi-ke hoán-séng í-siōng só͘ mn̄g hit kuí-nā-hāng. Kiaⁿ-liáu lán bē thang chò hó ê sèng-tiān hō͘ Siōng-tè ê Sîn khiā-khí, iā kiaⁿ-liáu m̄-sī suí-suí ê sin-niû hâng-ho̍k Ki-tok chò thâu lâi hō͘ I hoaⁿ-hí.
Tio̍h kak-chhéⁿ ah, Lâm-pō͘ Kàu-hoē! Kin-nî sī lán keng-sin chhut-hoat(更新出發) ê tē-it nî - Kí-goân 2601, A. D. 1941, chiū-sī Lâm-pō͘ Kàu-hoē oân-choân tio̍h ka-kī kiâⁿ ê thâu-chi̍t nî. Tī chit sî-chūn lán tio̍h kám-siā Siōng-tè ê hông-in, iā siàu-liām chu sian-poè ê hi-seng ló͘-le̍k. Koh-khah iàu-kín tio̍h ū koat-sim hùn-tò͘ ê cheng-sîn. Hâng-ho̍k Ki-tok chò thâu , chhú it-tì hia̍p-tiau ê hêng-tōng, lâi tí-tng siâ-mô͘ choē-ok. Koat-toàn m̄-thang ū hun-li̍h ê sim, tio̍h tāi-tông thoân-kiat; chiah ê thang chò kian-kò͘ ê sèng-tiān hō͘ Siōng-tè ê Sîn khiā-khí. Lán m̄-nā ài ū hùn-tò͘ ê cheng-sîn lâi tì-tng goā-te̍k, iā tio̍h chéng-tùn loē-iông hō͘ i chhiong-si̍t hó-khoàⁿ, chiah thang chò bí-lē ê sin-niû khiā tī Ki-tok ê bīn-chêng lâi hō͘ I hoaⁿ-hí. Lia̍t-uī hiaⁿ-tī chí-moē ah! Ta̍k-lâng tio̍h hoán-séng , tû-khì ka-kī ê ù-tiám, chiah thang hō͘ kàu-hoē chheng-khì-siùⁿ. Kàu-hoē sèng-kiat , koh tit-tio̍h Ki-tok ê Sîn chò lán sèⁿ-miā ê toā khuì-la̍t; lán chiah ē thang tuì goā lâi hùn-hoa̍t.
Khí-lâi, lán tuì chia lâi-khì.
