Sió Ú-tiū
Ông Siú-ióng
Chiap téng-hō 15 bīn
1941年6月675期 5
(1) Pak Bí ê Niú-iok ū chi̍t keng ê Sîn-ha̍k-hāu kiò-chò ユニオンSîn-ha̍k-hāu, muí-nî tuì ke̍k tang ê chhit-kok, chiū-sī tuì Ji̍t-pún Boán-chiu, Chi-nā, ìn-tō͘ kap Thài-kok ê tiong-kan, lâi bō͘-chi̍p chhin-siān liû-ha̍k-seng, kin-nî sī lûn kàu lán ê gia̍h, só͘-í chit-pang sī bō͘-chi̍p tiong. Sin-ji̍p hān kàu kin-nî 9 goe̍h boa̍t-ji̍t, chiau-phèng ê jîn-sò͘ chi̍t miâ nā-tiāⁿ, liû-ha̍k kî-kan sī Chiau-hô 17 nî 9 goe̍h kàu 18 nî 6 goe̍h chí, huì-iōng in beh chi-chhut chi̍t chheng hut. èng-bō͘ ê chu-keh sī tio̍h keng-koè Sîn-ha̍k-hāu , tuì 30 hoè kàu 40 hoè kha-tau ê thoân-kàu-su, hit ê chhoân-hêng sī it-jīm Ji̍t-pún Ki-tok-kàu liân-bêng teh siat-hoat . Si̍t-chāi sī chhit-nî chiah ū thang lûn-tio̍h chi̍t-pái, sím-mi̍h lâng beh chì-goān, lâi tit-tio̍h siū-soán............?
(2) Chiàu Bí-kok Sèng-chheh hia̍p-hoē ê pò-kò kóng, Kū-nî tiong, Sèng-chheh ū hoan-e̍k chò chi̍t-chheng gō͘-cha̍p-it khoán ê giân-gú.
(3) Si-phian 128:3 kóng, "Lí ê bó͘ tī lí ê chhù ê pâng-lāi, chhin-chhiūⁿ kiat choē-choē koé chí ê phû-tô-chhiū; lí ê kiáⁿ-jî uî-luî lí ê toh, chhin-chhiūⁿ ka-ná-chai." Lán ê ka-têng ū joā-choē ká-ná-chai? Ka-têng ê hēng-hok, kóng tio̍h ū gín-ná siaⁿ, gîn-kak-á siaⁿ kap tha̍k-chheh siaⁿ, kî-tó tha̍k Sèng-keng ê siaⁿ. Lán ê só͘-ū , chiū-sī chiah-ê, in-uī kiáⁿ-jî sī Iâ-hô-hoa só͘ siúⁿ-sù ê sán-gia̍p.
(4) Lán kok-lāi ê Hu̍t-kàu ê sī-īⁿ lóng-chóng ū 7 bān 1 chheng 3 pah keng; in ê hoê-siūⁿ ū 18 bān 5 chheng lâng. Pêng-kin chi̍t keng sī-īⁿ ū nn̄g-ê poàⁿ ê hoê-siūⁿ teh toà.
(5) Pún-tó lâng teh kiâⁿ lō͘ chin-chiàⁿ sô, chhin-chhiūⁿ teh chē chhia ê sî, hit ê khí-lo̍h chiah sī hui siông ê sô; nā chhin-chhiūⁿ án-ni, beh chē Thian-kok chhia kiaⁿ-liáu ē bô só͘-chāi.
(Boē oân)
