Tiàu-sû
1941年6月675期 15
Ko Tek-chiong Sian-siⁿ.
Kì-tit 13 nî chêng choè Thài-pêng-kéng Ji̍t-iāu Ha̍k-hāu ê siàu-liân hāu-tiúⁿ; tong-sî ê Thài-pêng-kéng khah chē sī lāu-toā lâng, lí tī hit tiong-kan chiong tuì Loē-tē ha̍k-si̍p ê lí-sióng kap chhiú-oán, ióng-kám khiā tī tē-it soàⁿ, chīn-la̍t tī Ki-tok-kàu kàu-io̍k , ióng-sêng āu-tāi ê sìn-tô͘. Hit-sî ê tē-it ìn-siōng bē-thang bē-kì-tit.
Ko Sian-siⁿ. Chhiáⁿ hoaⁿ-hí , hiān-chāi seng-tô͘ khah ke 5 pah, hiàn-kim ia̍h hui-siông ê chìn-pō͘. Che lóng sī tuì lí ê lô͘-le̍k.
Put-liāu, tuì chûn--nî, siū-bēng saⁿ-kap tī Kàu-hoē Kong-pò-siā chò Lâm-pō͘ Kàu-hoē bûn-su thoân-tō ê kang.Tong-sî chē-chē lâng kóng Pò-siā tio̍h kái-kek, koh Siā-lāi ê tīn-iông loān-loān bô it-tì.
Sian-siⁿ chiong chhiau-oa̍t kiān-khong ê sìn-gióng oân-boán ē giú--lâng ê jîn-keh, kap oán-tāi, chong-giâm ê lí-sióng, suî-sî khah-iâⁿ lóng-chóng ê khùn-lân. Tuì lāi, chiò chit oân chun-kèng ê tiong-sim;tuì goā, kap kok Tiong-hoē, Pak-pō͘ ê liân-lo̍k jú bi̍t-chiap; pún-sin tit-tio̍h sìn-bōng, hō͘ tāi-ke cha̍p-jī hun hoat-hui hia̍p-le̍k ê chit lêng.
Ū guî-hiám-sèng ê Pò siā, liâm-piⁿ khai-sí hoat-tōng; thoân-kàu-chiá, sìn-tô͘ tit-tio̍h lâi Siā, lâi tit-tio̍h sin ê la̍t, Siā-ūn ia̍h chiām-chiām liông-sēng.
Sian-siⁿ sī khiam-sùn ê lâng, chú-pit ê bêng-chheng to m̄-káⁿ ka-kī ēng.
Sian-siⁿ sī sìn-gióng ê lâng, Sìn-gióng ê la̍t khah-iâⁿ sin-thé ta̍k-hāng ê kan-lân.
Sian-siⁿ sī thiàⁿ ê lâng. uī-tio̍h Lí-sū-hoē, chit-oân cháiⁿ-iūⁿ khó͘-sim lâi kî-tó.
Sian-siⁿ sī hi-seng ê lâng. Pún-sin ê sū m̄-bat chú-tiuⁿ.
Sian-siⁿ sī lô-le̍k ê lâng. Nn̄g-nî goā kú ê tiong-kan só͘ siá ê bûn-jī lâi kā i khoàⁿ, si̍t-chāi ū keng-īⁿ ê só͘-chāi.
Sian-siⁿ sī lí-sióng ê lâng. Pò-siā keng-êng-chiūⁿ ê ko-kiàn , thiaⁿ liáu sim ē jia̍t.
Sian-siⁿ sī Siōng-tè chīn-tiong ê chhe-sài.Ji̍t-iāu kàu-àn tē 3 kuì ê kó siá kàu tuì-poàⁿ ; uī-tio̍h beh ìn Sèng Si , teh chò koat-tēng-kó ê sî, chiām-sî thêng-chhiú, kap Khó͘ Lí-sū-tiúⁿ táⁿ ha̍p kuí-hāng iàu-kín sū bêng-pe̍k , hut-jiân siū I ê chín-tiàu--khì.
Siū tiàu-bēng ê sî, í-keng ū koat-sim chiong chit hāng chò choè-āu ê hōng-kong. Chit khoán ióng-kám ê sim-chêng, hiàn-sin-tek ê ì-khì! Bia̍t-su hōng-kong, chit-be̍k hōng-kong, chiong choân sèⁿ-miā hiàn-chhut, si̍t-chián kàu chheng-chhó; tông-tông khái-soân-khì Thiⁿ--nih.
Pò-siā it-tông tī chit sè-kan í-keng bē-thang koh chiap-tio̍h lí ê siaⁿ-im bē tit koh khoàⁿ-tio̍h lí ê pit-chek. Chóng-sī nn̄g-nî goā kú, goán só͘ thé-giām--ê, lí ê cheng-sîn éng-éng lâu tī goán ê sim-té, kú-tn̂g chò goán ê chí-tō. Chiong-lâi iû-goân choân-oân it-tì, uī-tio̍h Pò-siā só͘ niá-siū ê sù-bēng , chiū-sī tī Tâi-oân beh kiàn-siat Siōng-tè kok ê sù-bēng lâi chhut-la̍t.
Kin-ná-ji̍t tī chit ê só͘-chāi kú-hêng kò-pia̍t-sek, sim-té só͘ siūⁿ, bô hoat thang piáu-chhut tī oē-gú. Kan-ta pâi-lia̍t kuí-kù, tāi-piáu Lí-sū-hoē, Phian-chhip-pō͘, chit-oân it-tông chò kò-pia̍t ê sû.
Chiau-hô 16 nî 5 goe̍h 3 ji̍t.
Lâu Chú-siông.
