Tiàu-uì Chú-pit Ko Sian-siⁿ
1941年6月675期 16
Só͘ kèng-ài ê sian-siⁿ, goán tī 5 goe̍h 5 ji̍t, chiap-tio̍h lí sí ê hù-im, oán-jiân chhin-chhiūⁿ tī bîn-bāng ê sim-kéng, kàu ì-sek bêng-liâu ê sí, put kìm lâu chē-chē ê ba̍k-sái.
Hoê-ek 11 nî chêng tī Sîn-ha̍k-hāu ê sî-tāi , siū sian-siⁿ ê hun-tô, kàu-io̍k kap jîn-keh kám-hoà, chai sian-siⁿ ê phín-ha̍k kiam iu, sèng-chêng un-jiû, kóng-oē sè-jī siông-sè, jîn-phín tiong-hō͘ ko-kiat, kàu-gia̍h thang chò goán ê bô͘-hoān.
Sian-siⁿ tuì tī Sîn-ha̍k ê gián-kiù put-chí ēng kang koàn-thiat chhim-siū(貫徹深邃)kiám-chhái uī-tio̍h án-ni, ū éng-hióng-tio̍h kuì-thé, ko͘-put-chiong tī Chiau-hô 7 nî, hòng-khì Sîn-ha̍k kàu-siū ê chit, choan-sim tiâu-ióng. Kàu tī choè-kīn, Sian-siⁿ ê kuì-thé ū chiām-chiām ho̍k-tò ,chóng-sī tī bô-phah-sǹg tī chhó-bo̍k puh sin-íⁿ ê chhun-thiⁿ, hut-jiân chiap-tio̍h sian-seⁿ ê tiông-sē(長逝), tui-ek sian-siⁿ seⁿ-chêng ê tāi-chì, chit-bō͘ chit-bō͘, chhin-chhiūⁿ cháu-bé-teng, kám-khài bû-liōng. Ah! Tâi-oân Sîn-ha̍k-kài ê sian-kak-chiá , goán thiaⁿ-tio̍h lí ê sí, ū put-chí m̄-kam, in-uī lí tī tē-bīn-chiūⁿ ê seng-gâi, chí-ū 30 goā nî, chiū chhin-chhiūⁿ chhó-bo̍k tiau-lo̍h pàng-hā. Siⁿ lí ê pē-bó, kap lí só͘ thiàⁿ ê hu-jîn, kap 6 ê iù-kiáⁿ, siūⁿ-tio̍h hu-jîn khó͘-thàng ê sim-kéng, si̍t-chāi thòng-sioh ê chêng(痛惜之情) tòng-bē-tiâu. Goān chû-ài ê Chú an-uì i ê ka-cho̍k, in-uī i í-keng soah i sè-kan ê kang-tiâⁿ, Thiⁿ-pē poaⁿ-chhiáⁿ i ji̍p tī thiⁿ--nih ê tiùⁿ-lî, lâi chiap-soà éng-oán ê sū-gia̍p, iā beh tuì i ê ba̍k-chiu chhit--khì lóng-chóng ê ba̍k-sái. A-men.
Ko-hiông Phian-chhip-pō͘,
Tāi-piáu: Âng Bān-sêng.
