Cháiⁿ-iūⁿ ē chiâⁿ chi̍t thé

1941年8月677期       1-2

  Lán khì Se-á oan hái-piⁿ khoàⁿ-khoàⁿ, chêng-bīn hái-chuí lâm-sek, āu-bīn chhiū-ba̍k chheⁿ-chhuì. Hut-jiân khí thàu-hong , chi̍t phiàn pe̍h-soa hō͘ hong só͘ chhoe, kńg-khì chin-chē ; éng toā, phah hái-piⁿ chio̍h-poâⁿ, chuí thè, chio̍h-poâⁿ goân-chāi; sui siū hong chhoe, ia̍h bô tín-tāng. Chio̍h-poâⁿ kap soa siū-tio̍h táⁿ-kek, nn̄g hāng hêng-sè thài bô sio-siāng? Soa, soàⁿ-soàⁿ, bô ha̍p chi̍t-thé; chio̍h-poâⁿ kian-tēng, í-keng chiâⁿ chi̍t-thé. I goân-pún sī thô͘, chē-chē nî kú tiàm tī tē ê lāi-bīn , siū tio̍h teh tāng, á-sī keng-koè hoà-ha̍k ê chok-iōng, pìⁿ-chò kiat-tēng ê mi̍h, í-āu chhut-hiān tī tē-bīn. Taⁿ lán kàu-hoē tio̍h cháiⁿ-iūⁿ chiah ē chiâⁿ-chò chi̍t-thé, chhin-chhiūⁿ hái-piⁿ ê chio̍h-poâⁿ?

  Suî lâng tio̍h liân tī Ki-tok. Ki-tok sī chī-chuī? Sī ú-tiū ê Chú-chiáⁿ, lán kiám káⁿ án-ni siūⁿ, beh liân tī I? Tī koh-oa̍h cheh, Ngô͘-kok ū nn̄g ê khit-chia̍h, tú-tio̍h chi̍t ê toā-koaⁿ. Khit-chia̍h sàng toā-koaⁿ ke-nn̄g, koh kā i chim-chhuì. Toā-koaⁿ hō͘ hong-sio̍k pé-pa̍k, tiām-tiām hō͘ in chim . Khit-chia̍h khì liáu, toā-koaⁿ kín chhit i ê chhuì-phoé, m̄-goān kap khit-chia̍h pêⁿ-téng. Lán tī Chú ê bīn-chêng si̍t-chāi sī khit-chia̍h, Ki-tok ê chhin-chhiūⁿ hit ê toā-koaⁿ bē, kiám beh kap lán pêng-téng? Ki-tok bô chhin-chhiūⁿ hit-ê; I hoaⁿ-hí chhut-sì chò lâng , lâi jīn lán chò I ê hiaⁿ-tī chí-moē(Hi-pek-lâi 2:11). Koh khah bî-biāu, thiàⁿ-thàng chin chhim, khiam-pi kàng-kē, ài lán kap I kiat-liân chò chi̍t-thé. Chú kóng, Lín tio̍h tiàm tī goá, goá ia̍h tiàm tī lín. Siat-sú ki bô liân tī phû-tō chhiū, chiū bē ka-tī kiat koé-chí; lín nā bô tiàm tī goá ia̍h sī án-ni. Goá chiū-sī phû-tô-chhiū, lín chiū-sī ki; tiàm tī goá, ia̍h goá tiàm tī i ê, chiū kiat koé-chí chē-chē(Iok-hān 15:4-15).

  Taⁿ lán tuì sìn lâi kap Chú liân-ha̍p(Iok-hān 6:35), tuì siú tō-lí lâi kian-kò͘ I(Iok-hān 14:23), tuì kî-tó lâi siong-thong I(Iok-hān 14:13), tuì sé-lé lâi chèng-bêng I(Ko-lô-se 3:27,28). Lán kò-jîn kò-jîn, nā lóng liân tī Chú Iâ-so͘, chiū ē chiâⁿ-chò chi̍t-thé.

  Ta̍k nî lóng ū khoàⁿ lâng chò koé pa̍k chàng; taⁿ ài chhéng mn̄g, chàng àn-choáⁿ tio̍h pa̍k, koé àn-choáⁿ m̄-bián? Lâng ìn kóng, Chàng, sī chu̍t-bí chi̍t-lia̍p chi̍t-lia̍p, sang-sang soàⁿ-soàⁿ, tio̍h ēng chàng-hio̍h lâi pau, ēng iû-moâ lâi pa̍k, chiah ē kui lia̍p. Koé, sī bí koè chìm, chi̍t-lia̍p chi̍t-lia̍p bō kàu iù-iù, pìⁿ koé chhè, khoàⁿ ài chhiau thn̂g, á beh pau āⁿ, ē thang chhòng kui ê , m̄-bián pa̍k. Hiān-sî lán kàu-hoē teh kiâⁿ tāi-chì, ū chi̍t-thé á-bô? ū. Chiàu lí teh khoàⁿ, sī chhin-chhiūⁿ pa̍k-chàng chi̍t-thé, á-sī chò koé chi̍t-thé? Hé, goá bē-hiáu ìn. Goá chí-ū ē hun-piat ta̍k-ê nā sim khǹg pa̍t-mi̍h, iû-goân siū-thok, chiàu sî-kan, chiàu chhù-sū lâi chū-chi̍p, che sī chhin-chhiūⁿ pa̍k-chàng. Nā lâng-lâng ū in ê phian-kiàn, kò͘ tē-uī, oàn-tò͘ sim, khoàⁿ-khin lâng, ǹg sè-kan, kiû miâ-siaⁿ, tham châi-lī, hun tóng phài, kiat-oàn, siūⁿ siâ, chiah ê pháiⁿ , siū Sèng Sîn ê kám-hoà, khò Sèng Sîn ê lêng-le̍k lâi tû-bia̍t, chhin-chhiūⁿ bí koè chìm, koè bô; tuì án-ni , thiàⁿ-thàng hoat-seⁿ, tāi-ke saⁿ thê-hê, hô-pêng chhiong-moá, sū-bū khoái pān-lí, che sī chhin-chhiūⁿ koé ê chi̍t-thé. Lo̍h sǹg khì chhoe, phòng sai-sai, nńg sìm-sìm(Sù-tô͘ Hēng-toān 9:31), Kiù chú tek-khak hoaⁿ-hí ēng tī kim-sè ê khòng-iá tē, lâi iúⁿ-chhī, m̄-nā gō͘-chheng lâng(Sù-tô͘ Hēng-toān 11:23─24; II Ko-lîm-to 5:9, 6:10).

  Hi-bōng m̄-nā pān-sū ê ki-koan chò chi̍t-thé, choân kàu-hoē káng kuí-nā bān lâng, ia̍h lóng chiâⁿ-chò chi̍t-thé, tek-khak ē chhin-chhiūⁿ hái-piⁿ ê chio̍h-poâⁿ, kian-kò͘ khiā-chāi, tí-khòng sè-chiūⁿ téng-téng ê hong-pho, lâi khah-iâⁿ(Iok-hān 16:33 ; I Iok-hān 5:4─5). 

  Thiàⁿ-thàng lán ê Kiù-chú Iâ-so͘ , í-keng ū thè lán kî-tó kóng, Goá m̄-nā uī-tio̍h chiah ê lâng kiû, ia̍h uī-tio̍h tuì in ê oē, lâi sìn goá ê lâng kiû; hō͘ in lóng chò chi̍t-ê; chhin-chhiūⁿ Pē lí tiàm tī goá, goá tiàm tī lí, hō͘ in ia̍h án-ni tiàm tī lán(Iok-hān 17:20─21). Goān lán tāi-ke ji̍t-siông ê seng-oa̍h ē si̍t-hiān Kiù-chú kî-tó ê hāu-le̍k, chiâⁿ-chò chi̍t-thé.