"Iâ-so͘ kap Sat-má-lī-a ê Hū-jîn-lâng"
Iok-hān 4:1─42
Ńg Tek-hui
(Chiap 7 goe̍h tē 7 bīn)
1941年8月677期 5-6
5. Iâ-so͘ suî-sî ēng lō͘-hiān kiò-chhíⁿ I chong-kàu ê pún-lêng(本能) 17─20 chat. Iâ-so͘ lō͘-hiān I choân seng-gâi ê le̍k-sú, "Lí kóng bô tiōng-hu sī tio̍h in-uī lí bat ū 5 ê tiōng-hu......" Iâ-so͘ chit khoán sîn-sèng ê tong-chhat khoàⁿ chhut I koè-khì ê seng-oa̍h, só͘-í hū-jîn-lâng chek-sî khoàⁿ I chò Sian-ti, iā mn̄g I koan-hē chin-si̍t pài Siōng-tè ê só͘-chāi. Chē-chē lâng siūⁿ I hut-jiân thê-chhut lūn pài Siōng-tè ê só͘-chāi ê būn-tê. Chiū-sī I bín-chia̍t chhì-khoàⁿ ē thang kín piàn-oāⁿ hō͘ I put-an ê tâm-lūn, (chiū-sī Iâ-so͘ kiò I kiò tiōng-hu lâi, I kóng bô, Iâ-so͘ kóng, lí chêng ū 5-ê......), chóng-sī su-siúⁿ ê liân-lo̍k chin bêng. I m̄-sī beh cháu-tê. Lán siūⁿ Siōng-tè ê Sian-ti chhut-hiān, chiong I só͘ khàm koè-khì lâ-sâm ê seng-oa̍h lō͘-hiān, iā kiò-chhíⁿ teh khùn m̄-sī sí-khì ê chong-kàu sim ,iā I siūⁿ chong-kàu , chóng-sī chí-ū hêng-sek, gî-sek, tī chûn-siú gî-sek, iā bô chhoē-tio̍h boán-chiok kap pêng-an. Kiám-chhái siūⁿ I ê seng-oa̍h koè-khì ê án-ni pi-chhám, sī bô tī chin-si̍t ê só͘-chāi pài Siōng-tè ê in-toaⁿ, só͘-í ēng sêng-si̍t ê sim mn̄g Sian-ti ê ì-kiàn, koan-hē chong-kàu gî-sek kò-iú ê só͘-chāi, sī Iâ-lō͘-sat-léng á-sī Ki-lí-sim.
6. Lán ê Chú taⁿ ēng chí-ū kiò-chhíⁿ I ê ǹg-bāng 21─25 chat. Iâ-so͘ kà-sī hū-jîn-lâng , hō͘ I chai I ê put-an m̄-sī tī kèng-pài ê tiûⁿ-só͘ , I iáu-boē bat chin-si̍t pài Siōng-tè 24 chat. "Siōng-tè sī Sîn", chin-si̍t kèng-pài m̄-sī tiûⁿ-só͘ ê (問題), chiū-sī sìn-gióng kap thiàⁿ sim. Kap hêng-sek, gî-sek bô koan-hē, chí-ū ēng sîn kap sêng-si̍t. Kèng-pài ê tiong-sim sī chin-si̍t bat Siōng-tè sī thiàⁿ ê Pē, iā sūn-thàn I nā-tiāⁿ. Khiok Iâ-lō͘-sat-léng si̍t-chāi sī Siōng-tè só͘ chí-sī kèng-pài I ê só͘-chāi, "Chín-kiù tuì Iû-thài lâng chhut". Chóng-sī sî-kan í-keng kàu, kèng-pài taⁿ bô siūⁿ(空間,時間) ê chè-hān, iā bô koan-hē tiûⁿ-só͘ kap kì-hō, chí-ū ēng sîn ēng sêng-si̍t. iā khiàm Tiong-pó lâi pò in khah bêng chiah ê sū kap ín-chhoā in ê lêng-hûn sūn-thàn I nā-tiāⁿ(I chí Siōng-tè).
Chóng-sī 25 chat, chit ê hū-jîn-lâng ti̍t-chiap ìn-tap kóng, " goá chai Bí-sài-a teh-beh kàu, I nā kàu beh ēng it-chhè ê sū kā goán kóng". Sui-jiân I 10 hun gû-gōng, tāng-choē, chóng-sī Kiù-chú ê hi-bōng iáu tī ê sim teh oa̍h.
7. Taⁿ chit ê hū-jîn-lâng í-keng pī-pān piān-piān thang sêng-siū choè hó ê oē. Che sī soan-giân chhui-pek I ê sìn-gióng 26 chat. "Iâ-so͘ kā I kóng, Goá chit ê teh kap lí kóng oē ê chiū-sī". Hū-jîn-lâng ū sìn á-bô? I ê hêng-tōng pí kóng-oē khah hiông-piān. Iâ-so͘ 6 pái kā I kóng oē kà-sī I, muí pái I ū ìn-tap. Taⁿ tē 7 pái, Iâ-so͘ chú-tiuⁿ I sī Bí-sài-a. Hū-jîn-lâng bô ìn-tap ê oē. Chóng-sī lán tha̍k Sèng-keng chai I pàng-hē chuí-pân, ji̍p siâⁿ kā lâng kóng "lâi khoàⁿ chit lâng , goá pêng-sò͘ kiâⁿ ê sū I lóng kā goá kóng. Chit ê chóng bô sī Ki-tok ah? 28─29". Lán m̄-chai I ê sìn-gióng loā nih oân-choân. Chóng-sī kin-ná-ji̍t khoàⁿ, bô lūn lâm lú koan-sim tī Ki-tok, ū-sî pàng in ê kang-tiâⁿ, hoaⁿ-hí tuì pa̍t lâng thoân Ki-tok , Lán thang kiat-lūn I ê sìn-gióng sī chin-si̍t iā oa̍h. Hū-jîn-lâng sêng-kong ê thoân-tō piáu i ê sìn-gióng ū sìn Iâ-so͘ sī Bí-sài-a.
Chóng-kóng chit chām pò lán chai Chú Iâ-so͘ ê thiàⁿ bô pàng-sak chit ê tāng-choē khó-lîn ê lâng, hoaⁿ-hí ēng pún-sin piáu-hiān tī loán-lio̍k ê lêng-hûn lâi kiù i, chò I ê bí-niû. Lán tāi-ke sī choē-jîn , kàu-hoē sī choē-jîn ê chi̍p-ha̍p-só͘(集合所). Taⁿ tit-tio̍h Chú chin-si̍t , ǹg-bāng lán iā hoaⁿ-hí chhin-chhiūⁿ chit ê hū-jîn-lâng thoân hō͘ chhù-piⁿ, pêng-iú , koè-lō͘ lâng, pò in chai Iâ-so͘ sī Siōng-tè ê to̍k-siⁿ Kiáⁿ, choē-jîn ê Kiù-chú . Tû sìn Iâ-so͘ ê í-goā, sui-jiân jīm lí tit êng-hoâ, hù-kuì, sè-kan ê khoài-lo̍k, miâ-siaⁿ, tē-uī , iā bô lō͘ thang tit chin ê boán-chiok kap oa̍h-miā; in-uī lí só͘ tit it-chhè ê mi̍h, sī chhin-chhiūⁿ chit ê hū-jîn-lâng ê chhiú só͘ chhiūⁿ, (só͘ koāⁿ) chi̍t pân ê chuí nā-tiāⁿ, liâm-piⁿ ē liáu, bē thang éng-kiú chí lí ê chhuì-ta. iā lán bián kiaⁿ khùn-lân ê sî-tāi, tio̍h thoân 34─38 chat. "Kia̍h-ba̍k khoàⁿ hn̂g, í-keng se̍k, thang koah lah." (Oân)
