Cha̍p-hoe gō͘-sek
1941年9月678期 5-6
1. Se-iûⁿ chi̍t ê î-sin ê uí-jîn miâ Khek-lîm-uí-ní. Chi̍t-ji̍t tú-tio̍h toā kàu-chiàn[sic.] ê sî, hut-jiân ū chhèng-chí phah tio̍h heng-khám, chóng-sī bô siong-tio̍h pō͘-uī. Kau-chiàn soah thǹg saⁿ khoàⁿ-tio̍h chhèng-chí, chǹg koè goā saⁿ, tiâu tī heng-chêng, só͘ khǹg hit pún sè pún ê Sèng-chheh lāi, siat-sú bô chit pún chheh sèⁿ-miā chiū hiu. Tng i teh siūⁿ lâi siūⁿ khì ê sî, koāⁿ lâu moá ka-chiah, kiaⁿ-hiâⁿ kap hoaⁿ-hí ê liáu-āu, siông-sè khoàⁿ chhèng-chí tiâu ê só͘-chāi , tú-hó sī tī Thoân-tō 11:9. Hiah ê oē sī kóng, Siàu-liân lâng ah, lí tī siàu-liân ê sî, tio̍h khoài-lo̍k, tī siàu-liân ê ji̍t-chí hō͘ lí ê sim an-uì lí , ia̍h tio̍h chiàu lí ê sim só͘ ài ê kap ba̍k-chiu só͘ khoàⁿ-kìⁿ ê lâi kiâⁿ; chóng-sī tio̍h chai uī-tio̍h che it-chhè ê sū, Siōng-tè beh sím-phoàⁿ lí. Chit ê uí-jîn tha̍k liáu toā kiaⁿ, chit-sì-lâng m̄-káⁿ bē kì-tit chiah ê sū.
2. Iû-thài ê sian-siⁿ ū i ê ha̍k-seng lâi mn̄g i kóng, Iâ-hô-hoa siáⁿ-sū ta̍k-ji̍t hō͘ Í-sek-lia̍t cho̍k ê má-ná, bô beh chiong chi̍t-nî chi̍t-pái lâi hō͘ in ah? Sian-seⁿ ìn kóng: Goá beh ēng phì-jū lâi ìn lín. Chá ū chi̍t ê ông chiong i ê thài-chú só͘ tio̍h ēng ê, chi̍t-nî chi̍t-pái hō͘ i. Tuì án-ni ê kiáⁿ lâi kìⁿ i ê pē chi̍t-nî ia̍h sī chi̍t-pái. án-ni ông chiū koh oāⁿ chi̍t ê hoat-tō͘, sī chi̍t-ji̍t hō͘ i chi̍t-pái. Tuì hit-tia̍p thài-chú ta̍k-ji̍t kìⁿ ông.
Siōng-tè khoán-thāi I-sek-lia̍t[sic.] peh-sèⁿ iā-sī án-ni: beh hō͘ I-sek-lia̍t lâng ji̍t-ji̍t lâi kám-siā i.
3. Ū chi̍t ê chun-kuì ê lâng tuì Iû-thài ê sian-seⁿ kóng: Lín ê Siōng-tè sī chò chha̍t , in-uī lín ê Sèng-keng kóng, Iâ-hô-hoa Siōng-tè hō͘ A-tong tāng-bîn teh khùn, lâi the̍h i chi̍t-ki hia̍p-ē-kut.
Sian-seⁿ ê cha-bó͘ kiáⁿ tuì in lāu-pē kóng, Chhiáⁿ lāu-pē hō͘ goá ìn chit hō ê lâng. Chiū kóng, Chā-àm chha̍t lâi goá ê pâng thau the̍h chi̍t-tè gîn-poe; ū chiong chi̍t-tè kim-poe hē-teh. Hit ê chun-kuì ê lâng kóng, Goān chit hō chha̍t ta̍k-mê lâi kàu goán tau. Sian-seⁿ chiū kóng, Siōng-tè khoán-thāi A-tong kiám m̄-sī án-ni mah?
