Chiang hoà I-koán ê Siaⁿ
1941年12月681期 2-3
Hiān-chāi ê I-koán sī 45 nî chêng Lân I-seng khí ê kiàn-tiok-bu̍t, sǹg sī chin kū-sek. Tuì kuí-nā nî chêng ū kám-kak put ha̍p lō͘-ēng , ài beh sin kiàn-tiok, nā-sī ū chó͘-tòng iân-chiân kàu chit-tia̍p; ko͘-put-chiong chiām ēng, tio̍h ài kái-sin hō͘ i-goā-koan khah hó khoàⁿ, ū àn 3 chheng kho͘ ê kang-sū, taⁿ iā í-keng teh beh chheng-chhó , chám-jiân chin hó khoàⁿ.
Ū kám-kak kuí-nā hāng iàu-kín ê sū kì tī ē-bīn:─
1. Pēⁿ-sek tio̍h chheng-khì, hō͘ hoān-chiá ū hó ê ki-mo-chi(氣持).
2. Chit-oân tio̍h ài ū chong-kàu tō-tek, chhin-chhiat bín-chia̍t.
3. Khàn-hō͘-hū tio̍h chài kàu-io̍k. Ta̍k-ji̍t ū 2 tiám thiaⁿ káng-gī Loē-iông ū Kái-phò-ha̍k(解剖學), Kok-bûn(國文), Siu-sin(修身), Phêng-toà-ha̍k(繃帶學), Sèng-keng(聖書), Khàn-hō͘-hū-ha̍k(看護婦學).àm-sî tio̍h chū-siu bô goā-chhut, khoán-thāi sī ha̍k-seng, tāi-ke bô êng koh chin bián-kióng, ǹg-bāng Siōng Chú chiok-hok si-in tī in ê kang, ē thang lī-ek pún-sin kap pa̍t-lâng.
4. Khàn-hō͘-hū siok-sià ū soá ji̍p I-koán-lāi ,khah keng-chè, khah lī-piān.
5. Sù-bū tio̍h phài lâng khì chham-koan pa̍t-uī. Khah kán-tan bêng-liâu ū chhù-sū, só͘-í ū phài sū-bū-oân khì Má-kai I-īⁿ chham-koan ; ǹg-bāng hoān-sū khah ê chheng-chhó koh hó-sè.
6. Chong-kàu hong-bīn.Kám-kak chèng chit-oân tio̍h ài kai Thoân-tō ê cheng-sîn, chiah ū thiat-tí-tek hōng-sū hoān-chiá. Ta̍k-ji̍t chò-kang chêng-ū chit-oân Tiau-hoē lé-pài(朝會禮拜). Muí goe̍h ū khún-tâm-hoē, ū-sî Sèng-chheh gián-kiù , ū-sî hùn-hêng, che lóng sī ài hō͘ chèng chit-oân khah thiat-tí bat lán I-koán ê sù-bēng.
7. Ū siat àn-nāi(案內) ê lâng, chiū-sī ū chho͘ hoān-chiá lâi, thang chí-tō chhoā i ê lō͘.
8. Bí, phoè-kip í-keng kau-sia̍p hó-sè. Hō͘ hoān-chiá khah lī-piān, pēⁿ-īⁿ iā khah an-sim.
Téng-bīn hit 8 hāng í-keng teh si̍t-hêng lah.
Chêng goe̍h ji̍p-īⁿ hoān-chiá muí-ji̍t pêng-kin ū 40 goā lâng, chhiú-su̍t téng goe̍h ū 41 lâng.
Chhiáⁿ ēng kî-tó saⁿ pang-chān; ǹg-bāng bô ko͘-hū Chú kap lia̍t-uī.
