Hóng-būn Sèng-keng toē (1)
(Muî Lo̍k-tek
J. Donald Mac Tavish)
1949.03 723 hō p.2-3
Tī chiàn-cheng tiong goá tit-tio̍h ki-hoē hóng-būn Sèng-keng lāi só͘ kì choē-choē só͘-chāi, lín tek-khak ài thiaⁿ. Tāi-seng ài kóng Malta, kì tī Hēng-toān 28 chiuⁿ. Chit uī sī Pó-lô tú-tio̍h chûn kòng-phoà chiūⁿ-lio̍k ê toē. Hit-sî sī kiò choè Malita (Bí-lī-tāi). Tio̍h kè hái, chit ê hái-sū sī kē, iā chin pîⁿ. Tī hia bô chhin-chhiūⁿ Tâi-oân ū soaⁿ, sī soa-chio̍h sang-sang ê toē, pe̍h, chheng-khì, koh suí. Chit ê hái-sū khah bô Tâi-oân ê toā.
Goá sī choè Pó-lô tú-tio̍h chûn kòng-phoà ê khoán lâi chiūⁿ chit ê hái-sū. Tī hē-thiⁿ chin joa̍h ê chi̍t ji̍t, goá khiâ goá ê chū-choán-chhia keng-kè Valletta ê toā koe-lō͘ chhut-khì kàu chng-siā. Bí-lī-tāi ê lông-bîn kan-khó͘ choè kang, in-uī hn̂g ū choē-choē chio̍h. In chèng tomato, in kiò-choè "tofca". In iā ū be̍h hn̂g. Goá kiâⁿ kè in ê hn̂g ê sî, in teh siu-koah. Ū chi̍t koá lâm-lú teh choè kang, goá khiâ tuì in tiong-kan kè, goá boē-hiáu kóng Bí-lī-tāi oē iā in boē-hiáu kóng Eng-gú; chóng-sī in tuì goá chin chhin-chhiat, hō͘ goá chē tī in ê soè-soè ê chháu-liâu ê lāi-bīn, phâng chi̍t oáⁿ-kong ê cha̍p-chhài hō͘ goá chia̍h, lāi-bīn ū han-chû, chhang-á, mī-pau, gû-lin-iû tomato koé-á thàn sio kā i chia̍h。Goá chia̍h liáu koàn-sì, iā goá ū chia̍h tām-po̍h, chóng-sī goá bô hián-chhut khì-hiâm ê khoán.
Goá put-chí chhù-bī in ê siu be̍h. In ēng saⁿ chhe ê chhe-á (midra) chiong be̍h suī hiat tī khong-tiong, kó kap hio̍h thang hō͘ hong chhe cháu, āu-lâi ēng chhâ-thio (zapoonah) chū-chi̍p hiah ê be̍h, iā hū jîn-lâng ēng chhiū-le kā i sak kàu tiong-ng, kiò-choè skulpa. Lō͘-bé ū nn̄g lâng chiong be̍h kā i hē tī siak ê khì-kù kiò choè arbeal, āu-lâi siu be̍h ji̍p tī thih-tháng. Goá ū chhì-khoàⁿ in só͘ choè ê kang, koāⁿ lâu moá bīn, chai choè kang tī ji̍t tiong sī chin kan-khó͘. In ài goá khoàⁿ in ê chhù, só͘-í goá iok tò-tńg ê sî beh khì khoàⁿ in khiā-khí ê só͘-chāi. āu-lâi goá ū khiâ 15 mile chiūⁿ pak, kàu Sèng Pó-lô ê káng-oan. Tī chit ê káng-oan ê tiong-ng ū chi̍t ê soè-soè ê hái-sū, kiò-choè Sèng Pó-lô hái-sū, chiàu liû-thoân kóng Pó-lô ū tī chia lòng phoà chûn. Tī chit ê hái-sū ê tiong-ng ū khiā chi̍t ê kì-liām-pi, ū Pó-lô ê tâng-siōng. Goá khoàⁿ liáu kám-khài bû-liōng. Tī hia sì-uî bô chûn-chiah; só͘-í goá koat-ì lo̍h khì siû. Káng khoah, lâu koh kín. Kàu poàⁿ-káng ū khoàⁿ chi̍t chiah kū chûn, chûn toé hiòng thian. Goá siūⁿ ài chiūⁿ chit chiah chûn-toé sió-khoá hioh-khùn, āu-lâi chiah koh siû hit chi̍t poàⁿ. Goá thǹg saⁿ hē tī chio̍h kha chiū chhàng lo̍h-khì. Lâu thàu, kàu goá koh khí-lâi chûn-toé-nih, kám-kak chin siān. Goá koh ho̍k-tò goân-khì, khoàⁿ sì-uî ê sî, ū khoàⁿ-kìⁿ nn̄g lâng tuì goá chhàng saⁿ-khò͘ ê só͘-chāi cháu lī-khui, goá lia̍h choè in thau goá ê saⁿ, goá chiū kín thiàu lo̍h chuí siû tò-tńg. Chóng-sī goá siû kàu goân-uī ê sî, khoàⁿ goá ê saⁿ kap chîⁿ lóng tī-teh. Taⁿ goá chai lâu chuí ê kín siáⁿ khoán, tē 2 pái goá chiū ti̍t ti̍t siû kàu hit ê hái-sū, lō͘-tiong bô hioh hit chiah phoà chûn.
Goá bô chhēng oê, só͘-í goá peh chio̍h gâm ê sî kha thiàⁿ. Kàu goá chiūⁿ kàu téng-bīn ê sî, chi̍t-ē khoàⁿ chit ê hái-sū lóng sī chhì-phè, chhì-á chha̍k goá ê kha, āu-lâi goá teh siūⁿ beh lo̍h-lâi ê sî, khoàⁿ-kìⁿ hia ū chi̍t niá phoà lāi-saⁿ tī hū-kūn ê chhì-phè ê téng-bīn. Goá kā i thiah-khui pau goá ê kha, thang kiâⁿ kàu kì-liām-siōng ê só͘-chāi. Pó-lô ū chin hó ê hêng-thài, chhēng tn̂g-saⁿ, chhiú kia̍h koân, chhin-chhiūⁿ teh thoân tō-lí. Nā-sī tī tâng-siōng ê ē-kha ū khek tuì Sù-tô͘ Hēng-toān the̍h ha̍p-ēng ê Sèng-keng kù.
Goá beh lī-khui ê sî, goá ū bán chi̍t luí âng ê hoe khǹg tī té-khò͘ ê phê-toà nih, siû kàu goân-pún ê só͘-chāi. Beh tò-lâi Valletta lō͘-tiong, goá hioh-khùn tī chi̍t keng chhâi-hông-tiàm, pài-thok kā goá thīⁿ chi̍t-lia̍p liú-á tī goá ê lāi-saⁿ. I suî-sî kā goá thīⁿ, soà chiong chi̍t tiâu chhiah soàⁿ, chiàn-cheng tiong oh-tit boé ê hō͘ goá. Goá beh chîⁿ hō͘ i, i m̄ the̍h.
Goá iû-goân thàm chhân-chng ê chhù chiàu só͘ iok-sok. Tī hia hō͘ in chhiáⁿ tê; chóng-sī bô koh ū cha̍p-chhài thng. Goá chin kám-siā. Peh-sìⁿ sī chhin-chhiūⁿ Bí-lī-tāi toā-pō͘-hūn ê lâng ê khoán, sī Thian-chú-kàu ê sìn-chiá. Ū chi̍t ê lāu jū-jîn-lâng chhoā goá khì i ê khùn-pâng, iā pò goá khoàⁿ i soè-soè ê chè-toâⁿ, ū saⁿ tiuⁿ teh ho̍k-sāi ê siōng tī piah-nih, chi̍t ê sī kiâⁿ soé-lé Iok-hān ê thâu-khak tī poâⁿ-nih, chi̍t tiuⁿ sī Má-lī-a, i siūⁿ Iâ-so͘ sī Pô-lô, in sī bô sím-mi̍h chai-iáⁿ, iā chin bê-sìn; chóng-sī in chin chhin-chhiat. Goá khiâ chhia kàu goá ê chûn hioh ê só͘-chāi, ji̍t beh lo̍h, thiⁿ âng-âng chin suí, goá kì-tit Pó-lô ê oē, "Hoan lâng ēng hán-tit ū ê jîn-ài khoán-thāi goán." Kuí-nā nî āu, goá siông-siông péng goá ê ji̍t-kì, iā khoàⁿ-tio̍h lāi-bīn ū hit luí soè-soè âng ê hoe, hō͘ goá hoê-kò͘ goá hóng-būn Sèng Pó-lô hái-sū ê sū.
