Hóng-būn Sèng-keng toē [2]
{Muî Lo̍k-tek
Rev. J. Donald Mactavish}
1949.06 726 hō p.4-5
Jī-ge̍h goá siá Bí-lī-tāi hái-sū ê keng-giām tī lán ê Pò-choá liáu-āu, goá ū tha̍k H. V. Morton ê chheh. Chiàu Pó-lô ê lō͘, goá chai i ū hóng-būn Bí-lī-tāi, chóng-sī m̄-sī Pó-lô tú-tio̍h chûn phoà ê hái-sū. I kóng, "chhin-chhiūⁿ goá nā chiàu goá só͘ oē khoàⁿ kūn tī káng-oan ê pak-pêng ê chio̍h-gâm ê lō͘ lo̍h-khì, goá oē thang lo̍h-khì kàu hái-sū tuì-bīn ê hái-kîⁿ, iā kiám-chhái iû-goân oē keng-kè khì, in-uī hit ê kū-lī put-kò sī chhin-chhiūⁿ thiàu-hn̄g nā tiāⁿ. Kiâⁿ-kè 2,3 Eng-lí liáu-āu, goá lī-khui chhia, ti̍t-ti̍t tuì hé-soaⁿ-gâm lo̍h-khì kàu soa-po͘ ê hái-gān, chóng-sī tī hia chi̍t tiâu khoah ê kau tī goá kap soè-soè bô liâu ê chio̍h-gâm ê tiong-kan, kau chhim, lâu kín, beh keng-kè sī boē-oē. Hái-éng ek chēng(sic.) tio̍h chio̍h-piah, só͘-í pìⁿ-choè chi̍t-choā ê pe̍h chuí pho....." Morton sī khah choē hè. Goá tha̍k i ê chheh ê sî, goá lia̍h ka-kī sī choē hè, chiū kap i kám-kak siāng khoán, goá siû boē kè hit ê hái-sū, goá chiū beh chhiàⁿ chi̍t chiah soè-chiah chûn-á. Sió siūⁿ jîn-seng iàu-kín ê chi̍t hāng sī ài chhì khoàⁿ m̄-sī kiaⁿ. Che m̄-sī choè soat-kàu, sī choè lú-hêng ê kè-sū, só͘-í goá ài pò lín saⁿ hāng pa̍t khoán ê sū, goá iáu-bē lī-khui Bí-lī-tāi ê tāi-seng só͘ keng-kè--ê:
Chi̍t ji̍t, goán ê chûn-lāi ê lâng lóng chē khì-chhia keng-kè chit ê hái-sū, ài khoàⁿ kó͘-chá Kabreto siâⁿ-chhī ê goā-bīn, sèng An-gû-ló ê toē-hā koe-chhī. Bī-lī-tāi ê hái-sū sī hu-hu ê he-chio̍h lâi kiat-chiâⁿ--ê, tī Chú-chêng 500 nî, Hui-nî-ki lâng (Ka-lâm lâng) tuì chit ê he-chio̍h lâi phah chi̍t ê toē-hā siâⁿ-chhī, m̄-chai sím-mi̍h bo̍k-tek lâi khui; kiám-chhái sī ài siám-pī tuì-te̍k ê chhim-hoān. Chóng-sī lí kái-piàn lí ê tuì-te̍k choè lí ê pêng-iú, lí chiah ū si̍t-chāi ê an-ún, m̄-sī cháu bih. Só͘-í Hui-nî-ki lâng tuì Bí-lī-tāi siau-bia̍t, chí-ū in só͘ bih ê khang tī--teh nā-tiāⁿ. Goá tiám la̍h-chek, iā kiâⁿ saⁿ-oá; in-uī chit tiâu tē-hā-lō͘ ū 20 Eng-lí ê hn̄g, khoài-khoài bê-lō͘. Goán tè àn-nāi ê lâng pê chit ê tiong-lō͘ lo̍h-khì, keng-kè soè-soè ê pâng-keng, tī piah-lāi ū khang, in só͘ khùn ê só͘-chāi. In tek-khak sī chin soè-hàn; in-uī goá kā i tó khoàⁿ bāi, goá ê kha ê toā pō͘-hūn cháu chhut tī bîn-chhn̂g goā, koh in sī chin ióng, in-uī in tuì toē-bīn giâ toē tè îⁿ ê hoa-kong-chio̍h lo̍h lâi choè kian-kò͘ ê chio̍h-chân. Soà khoàⁿ bōng-toē, kaⁿ-ga̍k, kap chuí-chíⁿ tī toē-hā. Tī hia iû-goân ū choē-choē phìⁿ ê tiau-khek; hū-jîn-lâng ê thâu, chhiú, kha khoà--teh, ēng la̍h-chek hé chi̍t-ē khoàⁿ, oē tio̍h-kiaⁿ. Goá koh chhut-lâi tī Siōng-tè ê ji̍t-kng ê lāi-bīn, goá chin hoaⁿ-hí.
