廈門的火災
1902.10 211卷p.75
我佇本月初八日，有接著廈門的長老許文岩初3寫的批，講初二日，頂晡十點鐘，廈門關帝廟前石埕街失火。對10點鐘起燒到半暝11點火才落地，共燒13點鐘的久。所燒去的店共有千外間的左右；街市大小約有30外條。海墘Tek-kì-lī-sū洋行也紲燒燒去。
通廈門差不多去一半。在廈門大小的冊店，共有二十外間，只有燒偆教會內的 2間，就是培文齋活版舍，佮文岩長老in妻舅的石印店。
Hāiⁿ-ah！慘-ah！可憐-ah！這-pang教友拄著這火災，大約了有十外萬銀。計共所燒--的約達千外萬銀。
到天光就看見身屍發現的二十外人。閣彼tia̍p teh燒Tek-kì-lī-sū洋行的時有大隻火船的船長也佇遐鬥拍火；無拍損火對樓跤發，樓陷落去，船長也紲燒死；真可憐。咱的宋牧師彼時掖佇彼間樓鬥拍火，總是走離平安無事；這真通感謝上帝。閣佇廈門有四五間的禮拜堂，也有醫生館攏無事；這也是真歡喜感謝主的 恩典。
Taⁿ願上帝贊in 的氣力，心肝無餒志；經過試煉了後服事主那堅固，熱心綴主起頭到煞尾：是心所願。
吳道源寫的。 |
