蠓仔毒的病
1902.10 211卷p.75
日本醫生佇台北愛查考毒熱病的原由；就佇彼號病當teh大發的時陣，有替一隊軍兵設法，保護in五月日久毋免予蠓仔叮著。到五月日滿，果然無一个有拄著彼號毒熱的病若是別隊的兵無用這號法保護--的，雖然無一盡染著，毋kú中間有259名患著毒熱的病。Taⁿ查考免予蠓仔傳毒入身體，就免驚患著毒熱的病，實在有明明的憑據。
所記這項消息，予咱在通持防彼號病；就著設法免予蠓仔叮，通免煩惱毒熱的病到身軀。
Báng-á to̍k ê pēⁿ
190210 211 koàn p.75
Ji̍t-pún i-seng tī Tâi-pak ài cha-khó to̍k jia̍t-pēⁿ ê goân-iû; chiū tī hit-hō pēⁿ tng teh toā-hoat ê sî-chūn, ū thè chi̍t-tuī kun-peng siat-hoat, pó-hō͘ in gō͘-goe̍h ji̍t kú m̄-bián hō͘ báng-á tèng-tio̍h. Kàu gō͘-goe̍h ji̍t moá, kó-jiân bô chi̍t-ê ū tú-tio̍h hit-hō to̍k-jia̍t ê pēⁿ Nā-sī pa̍t tuī ê peng bô ēng chit-hō hoat pó-hō͘--ê, sui-jiân bô it-chīn jiám-tio̍h, m̄-kú tiong-kan ū 259 miâ hoān-tio̍h to̍k-jia̍t ê pēⁿ. Taⁿ cha-khó bián hō͘ báng-á thoân-to̍k ji̍p sin-thé, chiū bián kiaⁿ hoān-tio̍h to̍k-jia̍t ê pēⁿ, si̍t-chāi ū bêng-bêng ê pîn-kù.
Só͘ kì chit-hāng siau-sit, hō͘ lán chāi thang tî-hông hit-hō pēⁿ; chiū tio̍h siat-hoat bián hō͘ báng-á tèng, thang bián hoân-ló to̍k-jia̍t ê pēⁿ kàu seng-khu.
