Soaⁿ-lō͘ ê koa

1951.08 tē 752 hō p.18-19

(Khó͘ Iú-châi e̍k)

Tiāu ēng Sèng-si 93 siú.

Chit siú Si sī Chàn-bí-koa 444. Kiâⁿ-lō͘ tī Koân-soaⁿ te̍k-pia̍t chhun-thiⁿ, ū thang khoàⁿ tio̍h Tiong-iong soaⁿ-me̍h ê seh, chheng-chhái ê thiⁿ-khì, sì uî í keng hông-hun ê soaⁿ-kéng, lâi gîm chit siú, oē thê-ko lán sìn-gióng ê sim-chêng, iā oē án-uì kiâⁿ soaⁿ-lō͘ ê lâng. Chhiáⁿ tha̍k-chiá, chiàu Sèng-si 93 siú ê tiāu, gîm khoàⁿ māi, chiū lí oē kám-kak ji̍p khì kàu tī Koân-soaⁿ teh kiâⁿ-lō͘ ê kéng-tē, lêng-sèng iā beh chìn-kàu tī koân, koh Sèng ê lō͘-chiūⁿ--ni̍h. Put-kò hoan-e̍k liáu boē chin cha̍p-hun hó-sè, chhiáⁿ khoan-liōng.

1. Poâⁿ-soaⁿ koè-niá peh-kiā,

Ka-kī chi̍t ê teh kiâⁿ;

Chú ê Sèng-chhiú hō͘ goá oá-khò,

Sin, sim, an-jiân bô kiaⁿ.

2. Soaⁿ-nâ ê hong teh thàu,

Kheⁿ-té ê chuí teh lâu;

Ná-chún thiⁿ-sài ha̍p-chhiùⁿ siaⁿ-im,

Goá iā o-ló lâi gîm.

3. Kiû Chú sù goá sim pe̍h,

Chhin-chhiuⁿ soaⁿ-chiam ê seh;

iā hō͘ goá sim chheng-chheng chēng-chēng,

Chhin-chhiūⁿ bô hûn thiⁿ chheng.

4. Kham-khia̍t guî-hiám koh hn̄g,

Beh khì ê lō͘ iáu tn̂g;

Goá só͘ ǹg-bāng ài kàu ê tē,

Siáⁿ-sî oē kàu hit tè.

5. Chóng-sī Chú! Goá ê Chú!

Goá lóng m̄-káⁿ tiû-tû;

iā m̄-káⁿ kiû, beh kiám chi̍t chām,

Goān kiâⁿ che lō͘ kàu-thàng.

6. Chí kiû, ji̍t nā lo̍h-soaⁿ,

Chím-thâu ēng chio̍h thè-oāⁿ ;

Hō͘ goá tī-hia só͘ chò bîn-bāng,

Iû-goân su-bō͘ thian pâng.