主日學
老母的日
1952.05 761號 p.20-21
列位小朋友，5月第二禮拜日，濟濟人欲結剪絨花佇in的胸前來禮拜。有的人結白色--的,有的人結紅色--的。是因為teh紀念慈愛的老母。少年到老，逐人攏有一個老母。有的人的老母猶活佇世間，有的人的檢彩已經佇天頂。總--是平平來teh數念。這是一個真好閣媠的所做。老母猶活的人結紅花，過身的人結白花來分別。這是甚物意思--lè？
美國東海岸一個細細的庄社--nih，有一個婦人人，做主日學的教員26年久。伊真熱心，閣gâu引chhoā細囝捌道理。伊捌一擺說明十條誡的第5條「著孝敬父母」的時，有講起向望對恁中間會想出一個法度來紀念老母的大疼痛。彼時伊的查某囝也佇遐。伊不止印象老母所講這句話。後--來這个婦人人過身，教會有開追悼會來數念伊過去的奉仕。彼時伊的查某囝有將一籠的剪絨花來妝飾式場。這个就是用剪絨花的起源。後--來有一個大生理人贊成這个事，就佇五月第二禮拜日，踮佇伊的店內舉行老母的紀念會。這是老母日的起源，是拄拄主後1908年的事。這个好事就漸漸遍傳到世界逐所在。
用剪絨花表現老母的疼情，有幾若項的意思：
白色是純潔。
紅色是熱情。
芳味是疼痛。
茂盛是仁慈。
青翠是吞忍。
咱要緊毋若紀念，著實在佇老母在生的日，來孝敬--in，毋是只有用物件，著用順服佮尊敬；閣著有可取的信仰生活，免予伊掛慮，也毋通kan-ta 用一日來紀念，著用逐日來紀念。保羅先生教示講：「著尊敬你的父母（這是頭一條有kâⁿ應允的誡），欲予你亨通，長歲壽佇世間（以弗所6:23）。」 |
