蕭寶珠
1897.02 143 卷 p.9-10
前月教會報有講起Pó-chu已經脫離賊ê手倒去in厝。照伊講hit-tia̍p伊予賊掠ê時有差不多60人圍伊，代先掠伊到Tē-jī-pêⁿ，後來掠去大坪頂。 In踮佇遐無厝通蹛， kan-ta蹛佇一个亭仔，四面無壁。原本一日食3頓，後來較無，常常枵飢失頓。 佇遐差不多3日久，日本兵chiàⁿ來拍。 Hit時土匪走紲āiⁿ伊去， 毋過āiⁿ無法，兩人平平跋落溝，寶珠teh做下底。 Hiah-ê賊就放伊佇遐做in走。伊踮佇遐20日久無通蓋也無通食，因為伊ê腳疼所以袂走；hit時只有一个賊兩三日就提寡蕃薯來予伊食。佳哉有日本兵對遐過，伊有叫in來救伊，寫字予in知伊毋是賊。 In就chhoā伊去見in-ê官，伊吩咐人扛伊倒去。
十二月13，蘭醫生去崙仔chhoē伊，看見伊真lám，就叫人扛伊去彰化通佇遐較利便照顧伊。本底 teh向望伊會好；可惜12月20肺有發炎，ná久ná lám，到12月25，就是拜三下晡就過往。
咱聽見這號ê消息逐人煩惱。一項是大體貼伊ê父母，佇3月日ê中間有死兩个囝。咱著替in求上帝安慰in-ê心， 予in毋免餒志，雖然予歹人譭謗，也袂搖choah。又閣現時教會大欠工，逐人攏teh向望無偌久通得著伊ê利益。伊蹛佇大學已經有3，4年，予眾人呵咾伊真老實kài好性地；也是gâu讀冊，頂半年有考頭名。照阮teh向望伊今年著出去教小學；閣兩年通出去傳道；總是上帝ê旨意毋是按呢。
Taⁿ 咱心肝著受安慰，
向望相見佇天。 |
