首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 講壇：福氣是sím-mi̍h？
講壇：福氣是sím-mi̍h？
卷期：第770號 本次： 日期：1953/2 刊名：台灣教會公報 頁數：8
篇名：講壇：福氣是sím-mi̍h？ [ Káng-toâⁿ:Hok-khì sī sím-mi̍h? ]
作者：
  顯示 : 漢羅 全羅 並列  

福音講壇
「福氣」是甚物？
1953.02 770號 p.8-9
(胡文池)
農曆的新年若到，家家戶戶有用「福」這字貼佇in的門斗頂。有人寫「五福臨門」貼佇門頂。按呢人攏teh向做有福氣的人。雖然是按呢，猶久真濟人無十分明白「福氣」是甚物。
山地的人無「福氣」這句話。因為這句有真複雜閣包含的意思佇--leh。至少福氣有三款的意思佇--leh。
I. 物質方面的福氣。
較常人若有錢，濟囝，做官，長歲壽，按呢就叫伊做有福氣。「福」這字是對「示」佮「畐」來做成的，「示」是「神」的意思，就是講，「福氣」是神的賞賜，「畐」是物質充滿，抑是每一人有田的意思。
實在咱中國人攏是信「天賜平安福」，所以常常人愛號名叫「天福」。咱中國人有「五福」的理想，佇「書經」有講，這五項福氣是：壽、富、康寧、收好德、老終命，意思是長歲壽，有錢、平安、好德行、好死。這通講攏是對天頂的上帝賞賜--的，所以咱著服事上帝，毋通得罪天的主。
總是物質的福氣是福氣的小部份若定。閣人常常對這个惹災厄，有人有錢帶金器予強盜刣--死，有人致到放蕩，家庭冤家等等，對有錢反轉不幸。有人長歲壽予囝孫不孝，苦毋緊死。有人做官反轉惹災厄。
聖經路加12:16-21，有記一个好額人teh歡喜伊的富有，家己講伊一世人有福氣。總是上帝講伊是憨人；因為伊享受彼个袂著。按呢這世間的福氣毋是久長，是暫時，是袂通倚靠；所以愛倚靠這个，有時是憨。
II. 對信仰的福氣。
福氣的內容是歡喜佮安心。人著獎券二十萬，雖然伊的心歡喜， 猶久伊若知彼暗，人teh欲搶伊的錢，按呢伊無有福氣。有人囝真濟，人講伊有福氣，猶久伊真散，逐日為著囝著煩惱，按呢伊無福氣。按呢福氣是歡喜佮安心來連合，是心肝的感覺。
有人趁100箍真歡喜，有人趁1000箍teh不平。閣人較常錢那濟，心那大，不平那濟。若是世間的物質是有限，人的心是無限，所以物質袂予人得著真的幸福。
第一要緊，人著對信仰來得著幸福，是親像細囝，無論伊的父母是散抑是好額，佇伊的老母的胸前感覺幸福一樣。
(a)揣著天父的歡喜。親像細囝第一歡喜的是伊的父母。咱對揣著天頂的父也是第一歡喜。「咱出世無帶甚物來，過世也無帶甚物去；若是有通食，穿，咱就欲知足。」按呢雖然佇散hiong也會踮佇天父的疼來感謝，歡喜。
(b)倚靠天父得著安心。「莫得倚靠無定著的錢財，只著倚靠將萬物滿滿予咱享受的上帝(提摩太前書6:17)。」試看天中的飛鳥.....恁的天父也teh試in。恁敢無比遐的較貴氣--mah？按呢咱對倚靠天父會安心。
(c)得救的福氣。「過失得著赦免，罪過得著遮khàm--的，這人有福氣」 (詩篇32:1)。孔子有講：「君子憂道不憂貧。」按呢咱有良心的人teh煩惱的主耶穌有救咱，所以救主的道理對佇全人類是福氣的消息。
III. 永遠的福氣。
細漢的時，我夢見佇路--裡抾著錢，盡所會袋到lak袋滿滿。總是歡喜了紲醒，袋仔閣摸，才知是夢，猶原空空。按呢人的一生也是親像眠夢。猶久咱有永遠的活物，所以這个世間的福氣若對永遠的時間來看是親像眠夢抾著錢。
這世間極有福氣的人也未免有艱苦，病痛、煩惱、罪惡、目屎；若是天堂攏無。這世間極長歲壽的人也無上一百歲，若是到佇遐天國是永遠無死(啟示錄21:4)。
這世間有錢的人有淡薄金，抑是寶石，就真寶貝掛佇手--裡，抑是phoa̍h佇頷頸來做榮光。若是信主的人佇天國看這款做極小可的物。因為佇天國城牆是寶石，街路是舖金 (啟示錄21:18)。有人做官幾年久，也掠做真福氣，若是信主的人欲佇永遠的世界佮基督相佮做王。所以保羅先生比著這款的大閣永遠的福氣，看這款地上的福氣做糞圾一樣。咱細漢的時看尪仔標做錢，看涼水的王冠做財產。到彼時咱猶原會親像保羅先生看遮的做囡仔物，做糞圾一樣。
列位！咱著看較遠，心著囥較大，來向望較大閣久長的福氣。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461