KO TIONG
1954.01 781 hō p.20-21
(Iûⁿ Se̍k-lîm)
(Chiap chêng-goe̍h tē 18 bīn)
10.
Cha̍p goe̍h 22 ji̍t khai-sí tī Bān-tan chū-hoē. Pún kàu-hoē kiàn-siat 57 nî kú ê tiong-kan, Au Chìn-an Bo̍k-su tī-chia bo̍k-hoē chiàm ū 1/3 ê sî-kan－19 nî kú. Au Bo̍k-su tuì Sîn-ha̍k-hāu pit-gia̍p í-āu, chiū it-ti̍t toà tī chit ê só͘-chāi. Pún kàu-hoē ê lé-pài-tn̂g, Chú-ji̍t-o̍h khò-sek kap sin khí ê siok-sià put-chí chéng-chê ha̍p-ēng.
Au Bo̍k-su un-khûn ê bo̍k-hoē, kàu-hoē tit-tio̍h pó-siú khiā-chāi tī Chú ê un-tián tiong, hiān-chāi lé-pài-ji̍t chū-hoē lâng-gia̍h ū 200 goā miâ, S. S. ha̍k-seng ū 150 miâ.
11.
Cha̍p goe̍h 27 chá-khí lī-khui Bān-tan, lâi Tiô-chiu oāⁿ chē kong-lō͘-kio̍k ê chhia, tuì Tiô-chiu chhut-hoat, nn̄g tiám poàⁿ cheng āu chiū kàu bo̍k-tek-tē Hêng-chhun. Chē chhia ê tiong-kan iân-lō͘ iáu oē thang khoàⁿ-tio̍h siū 8 goe̍h boé toā hong-thai só͘ huí-hoāi ê chhù, kàu taⁿ iáu boē siu-lí ho̍k-goân. Hêng-chhun sī Tâi-oân tē-it lâm-pêng ê kàu-hoē só͘-chāi-tē. Sin chhut-lâi choè kang ê Png Chun-êng Sian-siⁿ toaⁿ-sin tī-chia teh khoàⁿ-siú chit ê sio̍k lêng ê teng-tâi. Poeh goe̍h ê hong-thai iā ū toā sún-siong lé-pài-tn̂g kap siok-sià, chóng-sī í-keng ū tāi-seng siu-lí chi̍t pō͘-hūn. Tī pún chiu-kan ê pài-saⁿ ē-po͘, Tāi-hoē Lâu Gī-tiúⁿ Chín-hong Bo̍k-su kap Lâu Su-kì Hoâ-gī Bo̍k-su ū toà hong-chai kiù-chè ê khoán-hāng lâi uì-būn pún kàu-hoē. piáu-sī Tāi-hoē ê koan-hoâi kap thiàⁿ-sim. Hit àm ū chhiáⁿ in tuì sìn-tô͘ káng-tō, tāi-ke tit-tio̍h chin hó ê bián-lē. Chit keng kàu-hoē bô lūn tuì jîn-sò͘ á-sī tuì keng-chè hong-bīn lâi khoàⁿ, sǹg sī jio̍k-siáu ê kàu-hoē, chóng-sī tāi-ke ū sim ài beh tui-kiû chìn-pō͘.
12.
Cha̍p-jī goe̍h 3 ji̍t, tuì Hêng-chhun chē tng-chām ê khì-chhia lâi Hōng-soaⁿ hù hit àm ê chū-hoē. Kàu tè, í-āu kap Âng Bān-sêng Bo̍k-su chiap-chhiok bô kú, chiū khoàⁿ-chhut i sī chi̍t uī chhin-siān (親善) koh khiam-pi ê bo̍k-su. Chi̍t lé-pài kú ê kau-poê, hō͘ kì-chiá it-hoat ke-thiⁿ kèng-thiàⁿ i ê sim. Bo̍k-su-niû tuì tī kàu-hoē kap ka-têng ê kang lóng chin un-khûn, sī Âng Bo̍k-su hó ê loē-chō͘.
Hōng-soaⁿ kàu-hoē nā chiàu sî-kan lâi kóng, sǹg sī lāu kàu-hoē (í-keng ū 86 nî ê le̍k-sú), chóng-sī nā khoàⁿ kiàn-tiok-bu̍t kap sìn-tô͘ ê kong-kéng khiok bô lāu khoán. Hiān-sî lé-pài ê jîn-só͘ ū 200 goā miâ, S. S ha̍k-seng ū 150 miâ. Tāi-ke ū tâng-sim teh thiàⁿ kàu-hoē, iā ū jia̍t-sim teh tui-kiû sio̍k lêng ê chìn-pō͘.
13.
Cha̍p-it goe̍h 9 ji̍t, tuì Hōng-soaⁿ lâi keh-piah ê Pîn-tong kàu-hoē. Pîn-tong ê lé-pài-tn̂g tuì goā-bīn chi̍t-ē khoàⁿ, oē hō͘ lâng kám-kak sī Tâi-oân tē-it toā keng ê lé-pài-tn̂g, iā put-chí tông-hông. Kàu uī, tāi-seng siū chiap-thāi tī èng-chiap-sek chē ê sî, khoàⁿ-kìⁿ piah-téng ū tiàu 3 nî chêng khèng-chiok pún-hoē siat-li̍p 80 chiu-nî ê kì-liām siá-chin. án-ni pún-hoē iā thang sǹg choè Tâi-oân goân-ló ê kàu-hoē. Hiān-jīm ê Chóng-hoē Gī-tiúⁿ Khó͘ Iú-châi Bo̍k-su toà tī chia í-keng 21 nî kú, chit tiong-kan hō͘ kàu-hoē tit-tio̍h lī-ek m̄-sī sió-khoá. Pún-hoē ū tô͘-su-sek ê siat-tì, ū khai-pān Iù-tī-hn̂g kap iá-goā Chú-ji̍t-o̍h, sêng-chek chin hó.
In-uī kàu-hoē ê chìn-pō͘ kap tē-hng ê su-iàu, chiaⁿ nî chêng Pîn-tong kàu-hoē tī chhī-lāi ū ke hun-siat chi̍t keng sin ê kàu-hoē－Hô-pêng kàu-hoē. Ū phèng-chhiáⁿ tiong-si̍t ê Khó͘ Tek-khiam Bo̍k-su lâi tam-jīm chit ê sin ê kang-tiâⁿ. Hiān-chāi Chú-ji̍t chū-hoē jîn-sò͘ í-keng ke-thiⁿ kàu 200 goā miâ.
Pîn-tong, Hô-pêng chit nn̄g keng kàu-hoē, sui-jiân tuì goā-bīn khoàⁿ sī pun-khui, kî-si̍t keng-chè kap chèng-tī iû-goân sī liân-ha̍p. Kì-chiá khoàⁿ-kìⁿ nn̄g pêng ê bo̍k-su kap tióng-chip ū chin bi̍t-chhiat teh liân-lo̍k ha̍p-chok, só͘-í siong-sìn Chú ê kang-chok tī pún chhī tek-khak ū hó ê chìn-tián kap sêng-kong.
Chit pái tī Pîn-tong chi̍t lé-pài kú ê chū-chi̍p, iā sī nn̄g keng kàu-hoē liân-ha̍p khui-hoē, só͘-í thang kóng sī chhin-jia̍t ê chū-hoē.
Tī chia ū chi̍t hāng sū tek-khak tio̍h thê khí-lâi kóng ê, chiū-sī Pîn-tong kàu-hoē ū teh si̍t-hêng soan-tō ê sù-bēng (宣道的使命), só͘-í ū phèng-chhiáⁿ siàu-liân iú-uî ê Ko Chùn-bêng Sian-siⁿ tī san-tē, tuì ko-san ê tông-pau teh thoân-tō. I siông ji̍p soaⁿ uī Chú cheng-chiàn hó ê cheng-chiàn. Goān Chú hián-bêng I ê sèng-lī tī san-tē ê ta̍k só͘-chāi.
(Iûⁿ Se̍k-lîm).
