首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 查經培靈：復興教會
查經培靈：復興教會
卷期：第781號 本次： 日期：1954/1 刊名：台灣教會公報 頁數：22
篇名：查經培靈：復興教會 [ Cha-keng poê-lêng:Ho̍k-heng kàu-hoē ]
作者：蘇天明 So͘ Thian-bêng
  顯示 : 漢羅 全羅 並列  

查經培靈
求主復興教會
(蘇天明)
1954.01，no.781，pp.22-24

使徒行傳 1：12-2：47。
復興是各時代疼主的人所切望--的，使徒時代佇五旬節的日，聖靈降臨，開始一擺的大復興以來，基督教繼續發展佇全世界。咱若欣慕教會的復興，著對使徒時代來學習。
1.復興的祈禱會(使徒行傳 1：12－26)。
耶穌欲上天的時有共學生講，」毋通離開耶路撒冷，」in遵趁主的話，就踮耶路撒冷，佇馬可的樓頂聚集，佇遐做復興的祈禱會。
祈禱是復興的鎖匙，教會的復興是對祈禱開始，也是對祈禱會的成功來決定。上帝欲對咱同心合意的祈禱施落大恩，賞賜能力，這擺復興的祈禱會的參加者中，特別提起使徒的名，是teh表明in是教會的負責人。閣使徒全部參加，予咱通知影長執是教會的負責人，應該著全部參加復興祈禱會。這回的祈禱會的精神是在佇同心合意全務祈禱。
對祈禱了後，彼得就受感動，起來整理使徒的陣容，所以真實欣慕復興的人，對祈禱就會看出教會失敗的原因，來關心教會的欠缺。
2.復興的能力(使徒行傳 2：1-13)。
使徒佮信的人聚集做復興祈禱會，來盡一切的本份，迫切祈求的時，上帝的聖靈就做工，佇五旬節的日，大的復興就到佇耶路撒冷。
佇遮咱著相信，閣著明白一項，就是「復興是上帝的聖靈家己的工作。」復興是對上帝來--的，毋是人的能力佮工作，所以若有人講，我領導奮興會來復興教會，這是完全的錯誤，因為人不過是上帝所用的器具若定。五旬節的日，使徒的祈禱佮上帝親近的時，聖靈就充滿來復興教會，未有聖靈充滿的祈禱會，猶過無能力通復興教會。到聖靈充滿的時，才得著大復興。
3.復興的講道(使徒行傳 2：14-36)。
佇五旬節的日，彼得佮使徒受聖靈充滿，徛teh好膽解釋聖經，」眾人聽了心內刺鑿」(行傳 2：37)。In無傳別項，只有解釋聖經來證明耶穌基督，佇遮予咱知影，只有上帝的話才會 chhoā人悔改認罪，佮上帝來發生四正的關係，來棄sak偶像。
約西亞王的時，佇聖殿中揣著律法的冊，來做復興的大基礎。路德馬丁家己讀聖經的時，聖靈引chhoā伊明白對信稱義的真理，來改革復興歐洲逐國的教會。
今仔日是厭惡真理的時代，教會也受著這款思想的影響，只有對重儀式佮組織，無關心聖經。按呢通知影，信徒若看輕拒絕上帝的話，教會一定袂復興，所以見若欣慕復興的教會，著忠實學習上帝的話。
4.復興的結果(使徒行傳 2：37－47)。
「眾人聽了，心內刺鑿，對彼得佮其餘的使徒講，兄弟啊，阮著怎樣做？」(行傳 2：37)。使徒的教會有這號復興的經驗，現時有得著這款的經驗實在真少。請看當時得著復興的結果甚物款？
A)悔改者增加。「彼日約略加添三千人」(行傳 2：41)。全本使徒行傳記載使徒工作的成績，毋若是一擺。」信來歸主的，in 的數額不止濟」(行傳 11：21)。」對按呢加添濟濟人歸佇主」(行傳 11：24)。保羅佇伊所到的所在，就設立教會。咱每擺傳道了後攏袂通講，á是看見「濟濟人反悔來信主。」
有記錄的報告講，「有7000間的教會佇一年的中間，無引chhoā一人信主。」換話講，有7000名的傳教者一年久，除起特別的聚會以外，有40主日，最少有講56萬擺的道理。其中費了濟濟時間，力量，金錢，對幾十萬人講道理，袂通引chhoā一人信主，這是甚物毛病？咱敢毋是著來反省咱的工作，看咱的工作有效果á無？
B)對悔改者的造就，「常常專務使徒的教示，相佮交陪，peh餅，祈禱」(行傳 2：42)。這句話是訓練新的悔改者的工作(1)教示：屬佇培靈查經的工作。(2)相佮交陪：這項是信徒間相佮交換靈性的經驗，á是見證。(3) peh餅：就是守聖餐記念主。(4)祈禱：對靈修的工作的訓練佮繼續，咱對新的信徒的引chhoā，á是訓練，也是失落一款的工作。
C)生活的見證。一个的教會若得著復興，就成做理想的教會(參看行傳 2：43-47)。信心若復興，就生出疼心的生活，有疼心的所在，經濟的問題也解決。每日的生活中充滿喜樂佮感謝，所以得著眾百姓的歡喜，教會ná興旺。
今仔日教會所欠--的，就是屬靈的大復興，除去親像這款的屬靈復興以外，無路通興起教會。教會的政治組織，袂會予教會復興。今著求主佇這个年間，伸伊的聖手來復興每一間的教會。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461