Toā-oan kàu-hoē
1954.01 781 hō p.19
Gín-á saⁿ-phah khí toā-lâng sū, hō chò toā-oan; kî-si̍t m̄-sī án-ni, Toā-oan ê oan m̄-sī oan-ke ê oan, sī chuí oan ji̍p lio̍k-tē ê oan; án-ni thó͘-tē chiah ū lūn-te̍k, chiah gâu seng-io̍k. Sū-si̍t Toā-oan jîn-kháu chē, seng-oa̍h hó-koè, ū i-seng-koán kuí-nā keng, ū khí-kho, ū kok-io̍h-tiàm, ū ha̍k-hāu, kau-thong lī-piān, kīn Tāi-lâm. 50 goā nî chêng chiū ū kàu-hoē, 20 goā nî chêng, lâng-gia̍h bô loā-chē, tong-kio̍k bat kó͘-bú in tio̍h kap Eńg-khong ha̍p-pèng, chóng-sī ū iú-chì chhut-thâu khí hiān-chāi ê lé-pài-tn̂g, chiū bô ha̍p. Hit tiong-kan ū kuí-nā uī iú-uî ê thoân-kàu-chiá toà tī-chia bo̍k-hoē, chóng-sī bô sím-mi̍h ke-thiⁿ lâng. Choè-kīn Thài-chú-biō, Thô͘-khò͘-á chám-jiân ū ke-thiⁿ kuí-nā hō͘, ke chin ū oa̍h-khì, chiū pún chng iā teh ke-thiⁿ lâng-gia̍h. Kū-nî ū chi̍t-sî bô thoân-kàu-chiá tī chiá, nā-sī tióng-chip tāi-ke oa̍h-tāng chò kang, pò͘-tō, kó͘-bú hoē-iú, só͘-í kàu-sè bô sit. Chit pái ū chhiáⁿ Toh Ki-liông Sian-seⁿ chū-chāi tī chia, i gâu kó͘-bú, tāi-ke ū oa̍h-khì, iā chhiáⁿ Sîn-ha̍k-seng teh chí-tō Chú-ji̍t-o̍h kap sèng-koa-tuī, chin oa̍h-tāng. Chheng-liân thoân-khè kap tióng-chip hō͘-hia̍p, ài pò͘-tō thoân hok-im, só͘-í tāi-ke hoaⁿ-hí chhut chîⁿ beh bé khok-seng-ki (擴聲機 microphone) thang chò pò͘-tō thoân hok-im ê lō͘-ēng, pún goe̍h 20 hō ē si̍t-hiān. Koh tī 26 hō beh toā-toā khèng-chiok Kiù-chú Sèng-tàn. Goān Chú ê Sîn chò kang tī in tiong-kan, pang-chān in só͘ chò toā-toā êng-iāu I ê sèng-miâ.
(12 goe̍h 14 hō. It kì-chiá).
