東中
1954.01 781號p.21-22
(溫榮春)
1、成功教會。
佇成功鎮新港有兩間的教會。一間是本省的平地教會，猶有一間是山地 Amis 的教會。從前 Amis 的兄弟猶未起禮拜堂的時，是借新港禮拜堂teh聚集禮拜。今 in有簡單起一間禮拜堂佇番社，名叫成功禮拜堂。每禮拜差不多有成人200外人做禮拜，是Amis獨立的教會。這pang有開山地的指導者講習會佇遐，有80外名teh聚集。講師是駱先春牧師佮內地會的 (美籍的) 林寶華牧師，Miss Duncan & Miss Ashby兩位的姑娘，筆者也有機會去參加。這pang 的講習的目的，是予in有閣較深bat主的救恩佮怎樣來指導主日學的諸問題。也特別鼓舞in著緊緊自治、自養、自立的精神。因為佇新港有一間真媠的真耶穌教會(Amis 的)，約40 萬箍起的禮拜堂，攏是用水泥起--的。所以當地的 Amis 的教會也受激勵，用4年計畫，猶原欲起遐爾媠的聖殿。
2、玉里教會的消息。
1、 玉里教會對花牧師來奮興以後，不止有活氣，這pang佈道15日間，聚會53擺，聽眾有12,342人。慕道友共274名，本省147名，大陸同胞127名。願主祝福，無久會開花，結真媠的福音的種子來榮耀主名。
2、 山地講習會。玉里的教會為著山地的指導者，對11月19-25日，有開講習會。駱、林牧師佮Teng、Ai兩位姑娘也去鬥幫贊。也卓信德先生非常活動，設法指揮一切的事，差不多有70名左右來赴會，攏得著真好的訓練受造就。
3、鳳林教會。
本會對花牧師來佈道了後，加不止活氣。10月4-18日，有簽名的決志者 150名。其中30外名有繼續teh出席禮拜，主日學也加添三分一。現時每拜二暗7點半有開慕道友的培養會。也每拜6暗有特別慕道友 teh開羅馬字的講習會。
4、池上教會消息。
池上教會佇1954年正月初二 (拜6)，欲舉行獻堂的典禮。總工程費 7 萬外箍，無對外來募捐。也該堂的黃西川先生，照聽欲異動到佇西部的款。
5、東中常委消息。
佇12月21號頂晡9點，佇花蓮美侖教會聚集東中常委。今將較要緊的來報告。
1、准美倫教會升格。
2、准鄭鐵牧師復職閣佇東中做工。向望無久佇適當的教會來擔當聖工，榮光主。
(溫榮春 報)。 |
