Kám-siā Siōng-tè<br />(Tân Thiam-ōng)<br />1954. 02, no. 782, pp. 26-28<br /> Tuì kū-nî sin-le̍k 11:12－12:16 hō, uī hóng-būn kàu-hoē, chhin-chhek, pêng-iú, ū kàu tang-pō͘. Ū choē-choē kám-siā Siōng-tè ê só͘-chāi; siá kuí-jī êng-kng Chú.<br />(1) Cha̍p-it ge̍h 12 ji̍t kàu Suī-hong, chhē chi̍t uī goā-séng chí-bē kap tiōng-hu, kiáⁿ-jî. Hit àm tâm-lūn tō-lí kàu 11 tiám goā. Ū siá phoe thok Iûⁿ Chiong Sian-siⁿ chio-ho͘ i, soà thoè in kî-tó.<br />(2) Lô-tong hioh nn̄g àm, pài-gō͘ hō͘ in lâu kàu lé-pài chá-khí káng-tō. Siū Tân Ngó͘-hok Sian-siⁿ kap Sian-siⁿ-niû hó khoán-thāi, sàng lú-huì; chin kám-siā. Lô-tong chū siat-kàu thâu-pái ū khí pài-tn̂g, siat-tì chin hó-sè, iā ū Chú-ji̍t-o̍h kàu-sek. Tân iāu-chong Bo̍k-su tī hia chú-chhî; hoē-iú chheng i jîn-keh-chiá.<br />(3) So͘-ò, Lâm-hong-ò, tâng sio̍k chi̍t uī kàu-hoē; thiaⁿ kóng ū sîn-jiah chin-choē, ū 20 goā hō͘ hoē-iú, Lâm-hong-ò ū 10 goā hō͘. Ū sî lia̍h-hî chûn tuì goā-uī lâi, bô uī hó lé-pài, só͘-í Lîm Eńg-choâⁿ Tiúⁿ-ló khí chi̍t keng hō͘ in chū-chi̍p. Chô Thiam-ōng Sian-siⁿ tī hia oa̍h-tāng.<br />(4) Hoe-liân chhī, kàu-hoē chìn-pō͘; 4 nî chêng goá khì ê sî chi̍t keng, taⁿ ū Hoe-liân, Sìn-gī, Bí-lūn 3 keng. Cha̍p-it ge̍h 21 àm, tī goá sió-tī Tân Chheng-gím ê ke, ū kú-hêng i kap hū-jîn-lâng 70 hè, kiat-hun 50 nî kám-siā lé-pài. I ū 5 kiáⁿ, 5 sim-pū, 3 cha-bó͘-kiáⁿ, 3 kiáⁿ-sài; lāi-sun 23 ê, goā-sun 10 ê, goā ka-ná-sun 4 ê. Goán ê cho̍k-chhin bē bat ū án-ni.<br />Jī-jī hō lé-pài chá-khí tī Sìn-gī kàu-hoē lé-pài chú-lí. Pêng-sî ū 120 chó-iū lé-pài; iù-tī-hn̂g ū 160 miâ. Hit àm tī Hoe-liân kàu-hoē lé-pài, iā 120 lâng í-siōng. Cha̍p-jī ge̍h 13 hō tī Hoe-liân kàu-hoē, ū 350 goā lâng. Hit ē-po͘ ū khì Siū-hong pò͘-kàu-só͘; hit àm koh lâi Hoe-liân lé-pài, pah-goā miâ; iù-tī-hn̂g 170 miâ. Hoe-liân Tân Suī-san, Sìn-gī Oân Hù-lâi, Bí-lūn Gô͘ Thian-sù, 3 uī bo̍k-su teh chú-chhî. Bí-lūn ū 80 miâ chū-hoē, pài-tn̂g lāi-bīn ê piah bē chiâu hó, khiàm keng-huì. Nā ū thiàⁿ Chú ê hiaⁿ-chí, chhiáⁿ kā in tàu oān-chō͘, lâi oân-sêng chin hó ê kang.<br />(5) Tî-siōng kàu-hoē sin pài-tn̂g oē iông-ún 300 chó-iū lâng. Pêng-sî ū 60 chó-iū lé-pài. Goá 29 hō tī hia lé-pài. Hoê-sióng 20 goā nî chêng, goá khì Sin-khui-hn̂g Chhoà En̂g-hoâ Tiúⁿ-ló ê chhù khai-sí lé-pài, āu-lâi soá lâi Tî-siōng, chiū chhiáⁿ bo̍k-su. Taⁿ khí chi̍t keng sin pài-tn̂g, khai 7 bān goā kho͘; tī 12 goe̍h 23 hō hiàn-tn̂g kiam chiok Sèng-tàn. Hiān-chāi N̂g Se-chhoan Sian-siⁿ tī hia teh oa̍h-tāng. Goá ū chi̍t ê goā-sun 8 hè tī hia, i the̍h hō͘ goá boé chia̍h. Sui-bóng sī sió sū, hián-bêng gín-ná ê khiām-iok, ū hàu-sim ê kà-sī.<br />(6) Tâi-tang kàu-hoē oa̍h-tāng, 12 goe̍h 6 hō, goá tī hia lé-pài; pêng-sò͘ oá 200 lâng chhut-se̍k, pài-tn̂g teh siuⁿ oe̍h. In ū siat chū-iû cha̍p-hūn-chi̍t ê hiàn-kim, muí-ge̍h thâu lé-pài ēng tē-á toé lâi hē tī tâi-téng; chi̍t lé-pài siu 1,000 goā kho͘. Hoe-liân sī 3 kò-ge̍h hiàn chi̍t pái. Lo̍h Bo̍k-su ê kang-chok, tì-ì kiàn-siat, i só͘ sûn-sī ê kàu-hoē tiong ū 4,000 goā ê A-mi cho̍k teh lé-pài. Tâi-tang kàu-hoē sī Un Bo̍k-su teh chú-chhî.<br />(7) Hù-lí kàu-hoē ū khí chi̍t keng sin pài-tn̂g, choân-pō͘ thih-kun khòng-ku-lí, khai oá 20 bān, oē iông-ún-tit 3, 4 pah lâng, chi̍t ki thah 3 chàn, ū chi̍t ê kńg-lê-thui, chin sim-sek. Chit pang khí pài-tn̂g ê sî, thiaⁿ kóng, chi̍t hō͘ pêng-kun hiàn 3,000 kho͘, chin thang kám-sim. Hiān-sî Tè Hé-goân Sian-Siⁿ teh oa̍h-tāng.<br />(8) Tāi-lí (大庄) kàu-hoē-tn̂g, toā toē-tāng ū hāi--khì, taⁿ lóng siu-lí hó-sè, ū 200 chó-iū teh lé-pài. Hiān-sî Tiuⁿ Hûn-gím Sian-siⁿ (Tân Bîn-chàn Sian-siⁿ khoài-sài) teh chú-chhî. In tit-tio̍h Siōng-tè siúⁿ-sù in siang-siⁿ kiáⁿ, kiû Chú chiok-hok.<br />(9) Cha̍p-jī ge̍h 11 àm, beh tńg-lâi Gio̍k-lí hù kî-tó-hoē, chin hok-khì, tú ū Soaⁿ-tē thoân-tō i-liâu-thoân lâi chiò hoàn-teng, (siá kuí-hāng).<br /> 1. Hiān-sî Soaⁿ-tē ê pài-tn̂g ū 200 keng.<br />2. Ū chi̍t keng oē iông-ún 1000 lâng, lán pîⁿ-toē káⁿ bô.<br />3. Chi̍t ê lāu-pô 80 hè, chhē bô oa̍h-lō͘, thiaⁿ Iâ-so͘ ê tō-lí, chiū koat-sim sìn.<br />4. Nn̄g chí-bē, iáu siàu-liân m̄ khéng sìn, in-uī sió-bē kiat-hun siⁿ-kiáⁿ soà sí; a-ché chiū kín sìn Chú.<br /> 5. Hoat-kok lâng chhut miâ chia̍h hun-chiú, kóng 90 lâng ū chi̍t keng chiú-ka, só͘-í in ê jîn-teng ti̍t kiám-chió.<br />Taⁿ chit pái kàu tang-pō͘, siū kàu-hoē, pêng-iú, chhin-lâng, iú-hêng, bô-hêng ê pang-chān, chin kám-siā. Cha̍p-jī ge̍h 16 ji̍t chē hui-ki pêng-an kàu chhù. Kám-siā Siōng-tè.<br />